Cherpan: Menua Kudi

JANG tekenyit panggung bingung ninga berita siti penyakit berampit di pelilih menua Wuhan di menua China ti udah jampat ngekai ngagai selampur dunya nyengkaum menua Malaysia. Penyakit nya ti bepuncha ari sebansa igi penyakit virus ke dikumbai Novel Corona Virusti ditemu dalam taun 2019. Nama nya diubah orang ngagai Covid 19 awakka nyamai agi disebut sereta mudah dikingatka. Covid 19 nya puntang ke penyakitCorona Virus Disease ti ditemu ba taun 2019.

Mayuh macham cherita ti madahka penyakit nya dibai jelu siga baka tengiling ti dibunuh ke pemakai. Bisi mega berita madahka nya berampit ari sebansa entawai ti bekaban-kaban bekupan ba selikap atap batu rumah orang di menua China. Jang nyau gelesi tingatka iya empu bisi udah meda bemacham-macham utai ti enda tau diempa di menua Malaysia baka kala, lembayar, indu gerinang enggau mayuh macham utai idup bukai tang diempa orang di menua China. Ku cherita orang din utai nya tau ke ubat magang-magang. Jang ingatka seduai bini iya ke kala meda nya lebuh seduai iya bisi nemuai raun ngagai mengeri Beijing dalam taun 2008.

Penyakit Covid 19nya besai bendar kuasa; jampat ngekai ngagai selampur dunya, ukai semina di benua Asia tang di Ai Rupa (Europe), Amerika, Amerika Selatan, Kanada, Benua Afrika enggau Australia sereta menua ke mit-mit bukai ti alai bejuta-juta mensia udah kena rampit lalu mayuh udah bebadi nyawa. Lebuh ke irau nya, Jang lalu ingatka sejarah penyakit berampit kelia ti dikumbai ‘black death’. Jang ingatka penusah ampuh bah besai rambau sida Noah. Iya mega ingatka penyakit berampit di menua Mesir rambau orang di menua nya ke udu merinsaka orang Israel nitihka jerita ba bup kudus. Pengingat Jang pulai ngagai penyakit berampit muang ai, cholera di menua Sarawak rambau orang bekayau kelia ti dikumbai ngayau lus. Taja pia, nadai udah ba pengingat Jang bisi penyakit berampit ngemalat Covid 19 tu sepemanjai umur iya ke diatu manggai tujuh puluh lima taun.

Penyakit Covid 19nyau udah ngekai balat-sebalat ti ngujungka iya nyau balat agi ari maya pandemik. Iya nyau nyelamar sereta ngambi nyawa bejuta-juta mensia di dunya datai ke Gerempung Pengerai Dunya (WHO) lalu begerah madahka nya nyau nyadi pandemik. Gerempung Pengerai Dunya udah minta semua menua di dunya tu ngaga adat ba menua diri dikena nyekat pengekai penyakit nya. Taja pia, nasit enda tentu manah, menua Malaysia bisi terunda-runda mimit; laun ngiga chara nyekat pengekai iya. Kebuah iya pia, laban ra penyakit nya nuntung menua, ra ga bala tuai ke ngiring menua tu charut berebutka kuasa merintah. Sepenyempat perintah ke dulu ari tu badu bekuasa alai perintah baru enda belingah-lingah ngambi tanggung pengawa belabuh mutarka penusah nya.

Jang ingatka Menteri Besai baru ke jampat ngambi berat pasal pengelikun rayat lalu begerah ba kacha telivisyen. Belabuh ari 18 Mac 2020, Perintah Kawalan Pergerakan, PKP, iya nyaAtur Mindah Betagang belabuh dipejalaika di seluruh menua. Menua Sarawak enda tinggal dikena bungkur atur nya. Bisi berita madahka pengekai tu betumbuh ari bala orang ke bisi ngulu pengerami begelumu Ijtimak Tabligh di Masjid Sri Petaling, Kuala Lumpur. Seraban orang ari Sarawak pan bisi enggau begelumu tu lalu ngasuh penyakit nya jampat ngekai di Sarawak. Nambahka nya, di Sarawak empu, bisi ga seraban orang Kristian begelumu maya pengerami melah pinang di sebuah hotel ke alai bisi ari bala dia bisi udah kena rampit penyakit nya. Kedua-dua raban tauka cluster tu ti ngasuh penyakit nya jampat berampit di Sarawak. 

Jang, bini iya enggau siku anak indu seduai sereta siku uchu seduai iya baka mayuh kaban bukai balat teguran ninga berita tu. Ukai mudah nitihka Atur Mindah Betagang nya. Atur nya nyekat pemindah orang ari pelilih menua siti ngagai iya ke bukai. Orang diperintah diau di rumah lalu enda tau mindah. Orang dipinta enda begelumu lalu enti bisi berimbai enggau orang, mesti betakah tiga meter antara pangan diri. Orang mayuh, enti pansut ari rumah deka meli pemakai di kedai tauka ketegal tuju bukai, enda tau enda ngena pemampul idung enggau nyawa. Kebuah iya pia, laban penyakit Covid 19 tu berampit ari pechik ai liur tauka ingus orang ke udah kena rampit penyakit nya lebuh orang nya bekasi tauka lebuh orang betegu enggau iya ke bisi penyakit nya. Orang ke apin ditemu sakit deka diperesa lalu dibagi orang awakka diau kediri jauh ari orang bukai.

Betampung …