Agama Adat Iban dalam Politiesme • Manang Entayang Seduai Manang Gelanyang

NGABAS PENYAKIT… Manang benung nilik semengat orang ti tabin ba batu ilau sebedau iya belian.

Tusun Ke-50

BALA sida Entayang sebilik, kaban menyadi iya tusah bendar ati meda Entayang nadai pulai ke rumah udah iya ke nampuk ba pala Lubuk Batu. Ku sida, udah mati laya danjan, parai nengali lemai, diempa antu. Tang taja mega penemu sida munyi nya, sida agi ngiga iya. Kira-kira sebulan udah sida nganti pemulai Entayang, nadai ga iya pulai. Meda baka nya sida sebilik sereta enggau Tuai Rumah lalu mai sida serumah baumngerapuh Entayang.

          Udah ngerapuh Entayang, sida pan nanggam ulit tiga bulan. Sebarang sapa bisi ditemu ngelanggar adat ngulit endang deka ditinggang ukum.  Sungai enda tau ditubai, enda tau dipansai dalam kandang tiga bulan nya. Semua sida serumah tusah bendar ati ditinggalka Entayang, lebih agi sida sebilik.

BERUNDING PINDAH

Ensepi diri tusah amai ati, bala menyadi Entayang berunding deka pindah ngagai menua bukai. Sida pan putus runding pasal deka pindah nya, tang apai seduai indai sida enda dibai sida laban ke udah tuai sereta enda dapat bejalai jauh.

Pemindah bala anak seduai iya ngagai menua bukai nambahka penusah ati apai enggau indai Entayang. Seduai melaki-bini iya berengkah enggai makai enggai ngirup lalu ngujungka seduai sama kena sakit balat. Enda lama udah seduai iya ke sakit baka nya, seduai pan mati seretai saum pendam.

            Di menua siti, Entayang seduai Manang Gelanyang ti begulai lebih tiga taun padi diketau. Ngelama seduai iya ke begulai, seduai iya endang nadai ngereja pengawa bukai kelimpah ari belajarka leka pelian. Lebuh Manang Gelanyang diambi orang belian, Entayang pan nitihka iya. Entayang mansang pandai-sepandai ba pasal pengawa belian. Meda iya udah pandai baka nya, Manang Gelanyang bejaku.

“Uchu, dipeda aku bisi bendar pengerajin dek. Kati deka dek nyadi Manang baka aku?”

“Aku endang sigi deka nyadi Manang, Aki. Nya mih kebuah enda berasai nitihka dek ke ulu ke ili lalu diau sejalai enggau dek. Nyadi Manang baka dek mih utai ke endang dikedekaka aku,”

“Nyadi aku tu, uchu, endang nadai nadai orang enggau begulai laban kaban, anak, uchu enggau ichit aku udah mati magang. Aku endang enda tau mati laban aku bisi ngembuan batu buah janggat enggau batu lukut. Kini-kini pan aku endang enda lengka ari tubuh aku mih ubat nya. Enti iya tebeleka ari tubuh aku, tekala nya aku mati,” pia ku Manang Gelanyang bejaku baru.

      “Au, pia nih, Aki.”

“Nya alai, dek uchu peda aku lurus ati, manah pendiau, lalu umur dek pan umbas  besai tuai. Nya alai, dek mih nganti aku nyadi Manang,” ku Manang Gelanyang.“Semua ubat ke dikembuan aku, aku beri ngagai dek magang. Aram tua uchu bejalai ngagai lubang gua ba baruh bukit nyin. Din lagi baru aku mangun dek, awakka dek tetap nyadi manang baka aku.”    

MANANG BEBANGUN

Datai seduai ba lubang gua ke enda jauh ari rumah Manang Gelanyang, Manang Gelanyang pan mangun Entayang. Lebuh ke bebangun nya, Manang Gelanyang mai Entayang bepusin-pusin. Udah kelalu lama bepeling sebelah nya, Entayang pan berasai ngelu pala. Nyau kelama, Manang Gelanyang pan malu pala Entayang ngena mayang pinang. Entayang pan luput tingkap. Udah nya Manang Gelanyang pan ngebab Entayang ngena pua tekalung. Enda lama udah nya Entayang pan ngeleda.

“Diatu baru dek tau dikumbai Manang laban dek udah dibangun aku,” pia ku Manang Gelanyang. “Tu pengaruh dek, uchu. Enti orang bisi tabin raya, kitai manang enda tau enda belian berua lalu nirika pagar api. Orang ke indu lalu diasuh melah dekuh. Dekuh nya patut diengkahba pun pagar api. Udah nya manang pan berua nangkap semengat maya iya luput.

Reti kitai luput ba kitai Manang, iya nya kitai nangkap semengat orang ke sakit lalu mai semengat iya pulai enggau kitai ke menua. Enti enda pia, semengat, nya tau lelang nitihka semengat orang ke lama udah parai di menua Sebayan. Enti kitai enda nemu luput, kitai apin tau dikumbai manang. Kitai manang enda tau enda bisi iyang, laban iyang nya tau nulung kitai, nunjukka jalai kitai ngagai menua Sebayan.

           Entayang, enda nimbal Manang Gelanyang tang semina nagun-nagunka pala iya. Iya berasai gaga ati.

“Diatu asai ke numbas ga maya aku ngelengkaka semua pengaruh aku ba dek. Aku mati ditu lagi. Taja, aku mati, aku nyadi batu ke tau dipeda peturun dek ila.” Tekala nya, Manang Gelanyang pan bebali nyadi batu ke dugau-dugau ba mua lubang gua nya. Manang Entayang pan mupuk mulai kediri ngagai rumah Manang Gelanyang. Sinu mih ati iya ngenang tudah Manang Gelanyang ke udah nadai. Taja pia, ambis mih pengaga ati iya laban semua pengaruh enggi Manang Gelanyang udah diempu iya magang.

              Kira seminggu udah diau kediri-diri ba rumah niang Manang Gelanyang,Manang Entayang pan deka berunding mulai kediri ke menua diri mepu. Iya tusah bendarlaban enda nemu jalai pulai agi.

NGANGAUKA IYANG

Iya pan nyau mupuk berundingka jaku ajar niang Manang Gelanyang. Puas iya ngingatka semua leka jaku ajar nya, dia baru iya ingatka diri ke bisi iyang. Iya belabuh belian ngangauka iyang iya. Iya minta iyang iya nunjuk jalai iya pulai ke menua.

          Nya alai iyang iya ti benama Entawai Rantai pan mupuk bejalai nguluka iya. Enda berasai seduai ke bejalai, Manang Entayang pan rembus balubuk ke endur iya nampuk suba. Gaga amat ati iya ensepi diri udah datai di menua iya empu. Iya duduk dugau-dugau bapala lubuk.

Enda lama udah nya, iya tepedaka orang dua ikuorang melaki bini mudik ngena perau. Seduai melaki bini nya endang ngelala iya nya Manang Entayang. Seduai iya pan beguai-guai nujuka luan perau seduai ngagai endur Manang Entayang ke duduk nya. Manang Entayang pan nepan ba perau seduai melaki bini nya tadi, mudik ngagai rumah sida ke ulu.

Lebuh sida merau nya, dia seduai melaki bini nya madahka ngagai Manang Entayang pasal sida serumah ke udah ngerapuh iya. Manang Entayang mega nusui cherita kenyau ari iya ke nampuk nyentuk ke ngagai iya ke nyau begulai enggau niang Manang Gelanyang enggau pasal utai ke nyadi maya iya diau enggau Manang Gelanyang. Sida berandau sambil bekayuh. Enda berasai sida tiga pan sangkai ba pengkalan rumah sida Manang Entayang enggau seduai melaki bini nya endang saum pengkalan.

Datai sida ba pangkalan, Manang Entayang pan jengkak-jengkak mansang niki ngagai rumah sida iya. Nadai enda tekenyit semua sida serumah meda penatai Manang Entayang. Iya pan tama ke bilik sida iya empu tang meda bilik sida iya puang. Tuai Rumah sida mai Manang Entayang begulai sebilik enggau sida. Taja Manang Entayang begulai enggau sida Tuai Rumah sebilik, enda ga iya ngelakka bilik sida puang ngapa. Iya mega ngibun sereta tinduk ba bilik iyaempu.

(Betampung ba Tusun Ke-51)

Tibak cherita Manang Entayang di atas nya, nunjuka “spiritual practice” bemanang nya endang siti ari pengarap agama Adat Iban ari dulu kelia. Diatu taun 2020 pengawa tu mega agi dikemeranka bansa Iban taja makin kurang-sekurang; laban mayuh kitai Iban udah megai agama Kristian. Terima kasih ngagai kita pemacha semua lebih agi kita ke bisi ngirum gambar ke guna dalam Sada Sarawak tu. Engka nyema bala pemacha bisi utai tanya, tujuka ngagai  whatsApp tu; 0138325146.                  

Oleh Harry Usup Umbar