Tungkun sebatang, nyadi senyadi sampai gian

SEMBILAN ari sepuluh bansa penyakit kanser ke ngambi nyawa kitai mensia bepun ari gian nginsap. Kategal gian, mayuh bala penginsap ditemu udah parai tumu, tauka parai lebuh baru manggai tengan umur.

Nyadi bansa penyakit kanser ti jampat ngambi nyawa bala penginsap nya baka sakit kanser perut, kanser rekung, kanser tusu (indu), kanser sarang anak (indu), kanser pebuyan, kanser lempuang enggau penyakit kanser ti bukai. Tu nitih ka siti pemadah ari Gerempung Riman Malaysia tauka National Cancer Society of Malaysia (NCSM) apin lama ti udah serimbai enggau kimpin menua tu nagang orang nginsap.

Nyadi orang penginsap patut nemu pengian sida nya mai lebih pengerusak ari pemanah ngagai sida. Endang amat sigi mayuh kebuah siku-siku mensia belabuh nginsap ke lalu ngujung ka sida nyadi gian insap. Siti ari kebuah nginsap nyangka nya kategal deka nguji laban begulai enggau bala pangan ke udah teleba nginsap tauka udah jadi penginsap. Lalu kesuah udah nguji, orang nya pan lalu nyadi gian.

“Mayuh kebuah orang mula nginsap. Bisi mega sida ke nyadi gian bepun ari deka ngelenyauka penusah enggau pemeba ati kategal mayuh macham kebuah. Bisi mega nginsap kena nginsurka gaya diri awakka diterima nyadi pangan tauka nyadi raban sekeda geng. Nyadi sekeda ari penusah ke ngachau runding bala sida tu ke ngujung sida nyadi penginsap nya ulih sida ari endur kereja baka ba opis enggau sebarang endur bukai. Ku runding sida tu, insap nya dikarapka ulih ngubat penusah sida nya. Enda sida nemu gian nginsap nya mai penusah ke berat agi ngagai sida, iya nya baka belanja lebih enggau penyakit riman ke selalu ngujung ka sida parai tumu,” ku kaban sama sekula kelia Dr Wong Howe Tung ke bisi klinik iya empu di Kuching ditu.

Ba senentang belanja ke lebih besai kena meli insap, Gerempung Pengerai Dunya tauka World Health Organisation (WHO) udah madah ka ba menua Malaysia, 30 pesen ari gaji tauka belanja ulih siku-siku penginsap sebulan-sebulan dikena meli insap. Nyadi enti deka nemu berapa penyampau mata duit, bala penginsap ulih ngira bepun ari dua bungkus sehari kali enggau rega sebungkus. Nitihka penerang ke sama, bala penginsap di menua tu mayuh ari berasal ari ruang bilik ti kurang penatai pemisi.

Siti ari kebuah alai mudah nyadi penginsap laban kategal insap segerit tu bisi aja sebarang endur, lalu nadai besekat meli, nyau sepeneka ati. Orang ke nyual insap segerit ngira untung aja lalu taja pan bisi lalau ari perintah ba chara enggau jalai nyual sida nadai beduli ke nya tang sigi nyual ngagai sebarang sapa ke nyua duit soh sida.

 Nya kebuah bala anembiak ke baru mansang, ke agi bau kerungan udah belabuh belajar nginsap. Kitai ulih meda ba kandang Bandaraya Kuching, bala anembiak sekula ke baru pansut ari pagar sekula lalu udah baka chuit nginsap, lalu nadai peduli kena peda pengajar enggau orang mayuh.

Perintah udah suah nikika rega insap, dalam kandang kurang lebih setaun ke udah tu. Lalu ke penudi iya tu tadi insap ditikika baru rega entara RM15.70 ngagai RM18.60 sebungkus insap segerit ke benama agi baka Benson & Hedges, Malboro, Salem, Dunhill, Mild Seven, Winston enggau sekeda segeri bukai. Taja pia, rega segerit ke niki nya meri peluang ngagai sekeda mensia ke kempang lalu mai mayuh segerit masuk enggau belalai. Nyadi ari tu bala penginsap  agi ulih majak meli insap kena nupi gian sida enggau mudah. Sekeda segerit  ke dijual belalai mimit  nya dibai masuk ngena mayuh macham jalai. Bisi mega segerit nya dibai terus ari menua USA lalu iya ke tulin tang ngerari ka chukai masuk.

Bisi ga sekeda bala kaban ke penginsap nya madah, udah bekau sida nginsap baka LA (ari Indonesia), endang tak enda nyamai agi insap baka Salem enggau chap ke berega agi nya. Tang bisi ga orang madah, insap murah nya mayuh bendar undan narkotin, ke tau ngujungka orang balat agi gian nginsap iya. Kebuah pia, laban insap murah nya nadai dijaga perintah undan narkotin iya laban dijual belalai tauka ‘ensuruk’ (baruh mija). Nyadi tu siti pekara ti balat agi mai pengerusak ngagai orang mayuh ti nginsap iya.

Nya alai, amat meh perintah udah niki ka rega sigarit, tang nya semina ngasuh mayuh agi sigarit ke berega mudah dibai masuk belalai, kelebih agi ari menua Indonesia. Reti nya rega ke niki nya semina kena nyekat orang meli sigarit ke manah agi, tang enda ulih nagang mensia nginsap.

Nyadi taja pan rega insap udah niki, tambah enggau mayuh bansa penyakit ke mudah nyerang tubuh kitai ketegal gian insap, mensia mayuh sigi enda mudah deka ngelengka sereta ngenyauhka diri ari insap. Nama kebuah pia? Uji tanya bala sida penginsap.

Kebuah pia, segerit tauka ruku enggau nginsap asap semakau bukai tu siti pengian. Nyadi gian nginsap tu baka gian dadah lalu tusah ka dibuai. Orang gian nginsap tu ukai orang besai tuai aja tang mayuh mega bala anembiak ke benung mansang lalu agi biak umur udah sama enggau. Ketegal tu, pengawa muai tauka ngapus ka gian tu siti ari pengawa ke enda tau enda dikemeranka perintah menua kitai.

Ba serata dunya tu, siku dalam lima iku anembiak ari baruh umur 19 taun diatu nya udah nyadi penginsap. Nyadi diatu kira bisi 80,000 ngagai 100,000 iku anembiak antara umur 13 – 15 taun belabuh nginsap tiap-tiap ari. Ba menua udah maju bisi 85 juta iku anembiak udah ampit kena tepuk asap ruku ba rumah sida tiap taun. Lalu ba menua ke benung tauka baru deka mansang kira bisi 625 juta iku anembiak ke udah ampit kena tepuk asap ruku baka ke udah kena sebut dulu tadi.

Nitih ka siti pansik, sebagi ari empat bagi anembiak ba genturung menua Pasifik Barat deka mati ketegal pengawa gian nginsap. Pansik nya mega madah ka sebagi ari tiga bagi bala anembiak ari baruh umur 30 taun dalam menua China deka mati laban nginsap. Bala ke mansik tu mega madah ka semakau deka munuh mensia ba dunya tu lebih ari semua bansa penyakit bukai baka pedis perut, TB, mati lus enggau mati beranak dichampur begulai.

Nyadi enti kitai ngira berapa pemayuh duit kitai ditunu ngapa nyadi asap sigarit, tentu kitai deka nemu udah nya manah agi duit nya kena kitai meli pemakai tauka utai dempa ke meri pengerai ngagai tubuh kitai. Kitai mega ulih ngena duit nya meli gari ke manah, tauka kena kitai nginsurka pelajar bala anak awak ka lebih pandai. Lebuh ngenang tu, kitai ulih ngira berapa duit tebuai ngapa.

Muai gian nginsap tu amat tusah tang iya meseti ulih enti kitai bebendar. Pengeran ati kitai ulih muai gian tu. Kebuah pia laban mayuh orang ke nginsap tu ukai ari tegal nginsap kena ngerai ka tubuh. Reti nya nginsap ukai ambi ka ubat kena ngerai ka tubuh tang mayuh agi nginsap ketegal rindu tauka deka nguji tang ujung-ujung nyadi gian. Mayuh mega nginsap ambi ka bisi gaya, bisi stail enggau mayuh macham kebuah bukai.

Taja pia, mayuh orang ke nginsap enda nemu sigarit nya deka munuh kitai enggau jampat. Nitih ka siti pansik apin lama ti udah, iya madah ka orang penginsap, lelaki enggau indu deka parai lebuh umur sida baru manggai ba 50 – 60 taun. Tang enti sida ngetu nginsap ba umur kurang lebih maia ke disebut nya, sida ulih ngemanjaika umur sida jauh lebih ari orang ke enda ulih muai gian nginsap.

ULIH TELESA EMPERAN