SK Kpg Klid, SK Kpg Teh Sekula Nyulut UPSR 2019

TABI PUJI… Dato‘ Sri Fatimah Abdullah (kiba) nyuaka setipikit apresiasyen ngagai Kepala Pengajar SK Kampung Sklid, Latip Abu Bakar maya pengerami ke diatur ba Kampung Teh empai lama ke udah.

OYA: Dua bengkah sekula primari ba Pelilih Dalat meri pengaga ngagai peranak endur nya pengudah diberi anugerah Sekula Nyulut UPSR 2019.

Pengawa nyuaka anugerah nya beserimabi enggau pengerami nyambut Hari Pengajar Tikas Nengeri Sarawak ke udah diatur ba Kuching kena 1 Julai ke udah.

Sekula ke ngerikot 100 pesen pas nya Sekolah Kebangsaan (SK) Kampung Teh ke bulih Gred Purata Sekolah (GPS) 3.15 sereta SK Kampung Klid/Plajau (GPS 2.07).

Pengudah bulih pemujur ke baka nya Kaban Kunsil Nengeri (ADUN) Dalat, Dato‘ Sri Fatimah Abdullah nyuaka setipikit apresiasyen ngagai kedua-dua bengkah sekula nya empai lama ke udah.

Fatimah ti mega Menteri Pengelantang Pendiau, Pengelantang Komuniti, Indu, Ruang Bilik enggau Pemansang Nembiak Mit nyuaka setipikit nya maya ngatur Program Nemuai ngagai Kampung Teh kena 26 Julai.

Ku Fatimah, faktor ke ngasuh sekula nyulut nya berengkah ari pengawa ke diatur sekula enggau komitmen semua pengajar maya ngajar kelimpah ari sukung enda bebagi ari bala apai indai enggau komuniti ba endur nya ke seruran mantu sekula.

Kepala Pengajar SK Kampung Klid, Dalat Latip Abu Bakar ngumbai pemujur ke baka nya mega ketegal bala nembiak sekula enggau pengajar ke diau ba Batang Oya sigi enggau naka ulih ngaga pengawa sida iya empu.

“Bala nembiak sekula sigi bebendar maya belajar chara beraban ninting kelas tusyen sereta bala pengajar ke merambu mayuh bengkah program akademik ngena sesyen dialog nyengkaum analisis pemujur enggau pemutus peresa sereta nusun Program Intervensyen ke patut ngagai chalun ke bedau bulih Gred A,“ ku Latip Abu Bakar.

Ku Latip, ketegal nyadi tuai instruksional ba tikas sekula iya ngasaika diri temegah sereta meri puji ngagai pengawa ke udah digaga bala pengajar ke enda nemu leju neruska  momentum transformasyen ba pelajar dikena ngemansangka modal mensia ba abad ke-21.

“Nya setipak enggau pengawa milih KPM SK Kampung Klid/Plajau nyadi siti Sekula  Transformasyen 2025 (TS25) ngagai kohort Lima Tikas Nengeri Sarawak,” ku iya.

Kelimpah ari nya SK Kampung Teh, Oya mega ngerikot 100 pesen pas Ujian Pencapaian Sekolah Rendah (UPSR) ke bisi nembiak sekula nyulut (semua A) ninting taun ke ngasuh sekula nya nyadi institut penemu (ngemeranka pelajar).

Kepala pengajar sekula nya Dahlan Pamuda meri terima kasih sereta apresiasyen ngagai bantu ke udah diberi Fatimah, komuniti kampung enggau komuniti sekula ba mayuh bengkah sukung dikena ngemujurka pelajar nyadi platform dikena ngasuh bala anak SK Kampung Teh nyediaka pengidup dudi hari.