PETARA, ANTU!

KUASA PETARA… Kuasa mistik amat nyadi ba mensia ti begempuru tu.

TUSUN 12

iii. Kuasa Mistik Petara (God Almighty)

Kuasa mistik tau dibagi ngagai 3 raban nya: i. Mistik Antu  ii. Mistik Antu Bunsu Petara(Dewa-Dewi)  iii. Mistik Petara (God Almighty, Tuhan, Allah Taala).  Ba Tusun Ke-12  tu aku mai kita bebagi penemu lalu bepikir ngena tikas tinggi pasal kuasa iii.

Kuasa Mistik Petara. Sebedau aku nyingkang jauh, dulu aku madah, utai ti dipansutka aku dalam artikel sigi amai nyelai tang amai nyadi: taja pia sekali ke kitai Iban pechaya tauka enda, nya bepanggai ba pengarap kita empu: aku semina nusi laban deka bebagi penemu @ idea. Sebedau tu aku udah nusi ngagai kita pasal penatai Antu: sitan, jin, iblis ke dunya mensia maya hari diatu.

Dulu agi ari nya udah ga aku  nusi ngagai kita pasal  penatai Antu Bunsu Petara: Orang Panggau Libau & Orang Gelong  taun 2006, 2013, 2016 dalam pengidup bansa Iban. Pechaya kita? Nya alai, minggu tu aku deka bebagi peneleba enggau kitai Iban pasal penatai  kuasa mistik Petara (God Almighty) ke dunya mensia kandang taun 2006 – 2015.   

BESUGANG LALU BESAMPI

            Gerija Hosanna di menua Gua, Sri Aman tediri tegal kuasa mistik ari Petara. Kenu ku sida ti nyaga gerija nya ti dirandau aku, dalam kandang taun 1990 suba, sebuah kerita ngetu ba senentang menua nya. Seiku indai indu China pansut ari kerita laban deka kemi ba tisi jalai dia. Enda mukai-mukai iya pan tepedaka senera gamal Lord Jesus Christ tampak bebendang tunga ke bukit ba endur nya. Iya pan besugang lalu besampi minta diri gerai ari penyakit kanser ti benung ditapi iya nya. Utai ke bendar tuju pejalai iya ke ari Sibu ke Kuching laban deka beperubat kanser ngena kemotrapi di Hospital Besai Kuching. Sebedau diperubat, indu China nya pan diperesa doktor dulu laban deka nentuka pemalat tikas raya penyakit kanser iya nya. Lama bala doktor hospital di Kuching meresa indu nya. Pengujung iya, sida tekenyit amai ati laban nadai tetemuka sel kanser dalam tubuh indu China nya. Indu China nya ti tabin kanser nya tadi baka ke pulai mandi, nadai apa nama. Nya mih ensepi diri udah gerai baka selalu tegal kuasa mistik ari Petara nya tadi iya pan minta diri meli tanah ari orang ti empu tanah ba bukit nya. Ngena duit diri empu indu China nya pan ngaga gerija nya.

           Kenyau ari nya, gerija Hosanna nya nyau tebilang pasal kuasa mistik ti ulih ngeraika mayuh macham penyakit mensia ti datai minta sembiangka Paderi ba gerija nya. Taun 2008 terubah aku niki ke gerija nya, aku meda mayuh kayu tungkat orang. Kenu ku orang dia, nya tungkat sida ti lungung tegal kena mayuh macham penyakit. Udah ti diperubat sereta disembiangka Paderi ba gerija nya, mayuh sida nya gerai lalu enda betungkat agi pulai ari gerija nya. Nya mih kuasa mistik Petara (Tuhan, Allah Taala).

            Gerija St. James di Bt. 15 Jalai Oya – Sibu udah tediri kenyau ari taun 1963 tang jarang orang datai sembiang dia. Ukai pia aja tang enda kala diintu nyentuk  ke cheremin jenila semua pechah. Pia mega atap, dinding, pagar enggau utai bukai mayuh mega ti udah rusak nadai tukuh agi. Kala mega semina atap aja ti dipeda ari jalai raya laban ti dilindung babas enggau kayu-kayu ti besai ngelingi gerija nya. Repa, baka langkau ti udah nyadi tembawai.

           Enda mukai-mukai taun 2013, bisi utai nyelai ba seiku Tuai Rumah ti lama udah enda tentu dapat tegal  langai-langai tabin pedis perut. Kenu ku iya becherita, “Malam 31.05.2013 semua orang gaga ati ngirup Ai Pengayu  nyambut  Hari Gawai Dayak taun nya. Aku anang ke ulih berami enggau sida, angkat pan enda ulih. Tinduk malam nya aku asai ke pansut ke tanju sambil merap uchu aku. Maya nya aku tepedaka tiga iku orang ti begaun burak apus nurun begadai-gadai ari langit baka gamal melikat. Siku ari sida nya lalu bejaku: “Anang dek tusah ati Tuai Rumah. Badu dek sakit udah tu lalu intu  mih gerija ti semak rumah dek nya.” Udah nya Tuai Rumah nya pan nyerugang lalu nyium kaki enggau jari orang ti bejaku nya.

ST. JAMES BERENGKAH AKTIF

            Pagi hari nya, Tuai Rumah nya pan berundingka jaku orang ti betemu enggau iya dalam mimpi nya. Ukai semina nya aja tang iya mega asai ke diasuh betemu enggau seiku indu ti sebaka enggau gamal orang dalam mimpi iya nya.                           

            Kenyau ari nya gerija St. James pan berengkah aktif penuh belama endur orang Kristian  besembiang. Tiap-tiap minggu Ke-1 enggau minggu Ke-3 bisi sembiang Missa diuluka Paderi ba gerija nya. Mayuh tulung duit ringgit ari mensia mayuh udah diterima dikena ngadu sereta ngemanahka gerija nya. Kelimpah ari Tuai Tumah, bisi kuasa mistik Petara besaup ngintu sereta ngemataka gerija nya. Utai nyelai pan suah nyadi ba gerija nya. Enti nuan deka nemu, uji nuan besembiang seiku aja kira-kira maya pukul 3.00 lemai ba gerija nya. Tau ga enti nuan deka nguji bemalam tinduk dalam gerija nya. Enti nuan bidik, engka bisi nuan ninga mayuh macham bunyi.  Taja pia, kitai Keristin ti arap 100%  ke Petara anang takut sereta irau. Nya ukai Antu: sitan, jin, sihir tauka iblis. Utai ke memunyi nya dipelabaka semengat @ roh sida ti udah lama ninggalka dunya tu lalu pinta disembiangka kitai ti agi idup.

          Musin Taun Baru China 2008  bisi utai nyelai ‘miracle’ nyadi di Semalatong, Simunjan. Nama kebuah tanda regang, mua Lord Jesus, Virgin Mary @ Maria  tau ayan sebelah pun nyiur: sekeda ayan ba batang, takang enggau daun nyiur. Mayuh cherita ti nyelai-nyelai bisi besangkut paut enggau  Kuasa Mistik Petara di Simunjan nya. Berita tauka cherita pasal tanda regang ti bisi ayan ba daun nyiur mayuh udah nyadi di serata dunya baka: di Palembang taun 2006 di Keningau, Sabah taun 2007. Kelimpah ari nya, tanda regang mega bisi ayan ba tapa jari bala nembiak di menua bansa Arab Lebanon.

         Pia mega, gambar Maria @ Virgin Mary suah dipeda ayan di serata dunya sebelah ai chiru, rumah ti udah rubuh enggau mayuh ti bukai. Kenu ku sekeda penemu mensia, kuasa mistik Petara ti baka nya mudah ayan ba mensia ti enda tentu pechaya ke Iya. 

          Nyau enda alah tusi mih utai ti nyelai pasal kuasa mistik Petara (God Almighty), mistik Antu Bunsu Petara (Dewa) enggau mistik Antu: sitan, jin, iblis. Seiku-seiku mensia bisi pengarap diri empu. Ni bagi tiga mistik nya ti  dipechaya kita amat nyadi? Utai tu sigi bepanggai ba diri empu. Agi mayuh peneleba tauka randau aku ti besangkut paut enggau semua tiga iti kuas mistik tu. 

KEREJA AJIH

         Tuju aku ti mansik pasal tiga pekara tu ukai deka ngelaku lalu meransang kita berubat enggau kuasa-kuasa mistik nya tang aku deka mai kita bepikir ngena tikas tinggi tauka meda ngena Deria Ke-6 & Ke-7. Ni bagi kuasa ti tau diandalka kitai Iban? Enti deka minta pengerai maya ti tabin raya, ni bagi tiga kuasa mistik tu ti patut dikena kitai Iban; endur minta utai kereja ajih ti tau nyumanka kitai?   

       Tentu bisi kitai  Iban nyaut, guna magang-magang mih, uji aja. Ukai utai jai ti dipinta kitai nya: pengerai. Amat jaku nya. Nadai kitai deka minta utai jai tang utai ti patut ditemu semua kitai mensia iya nya semua tiga kuasa mistik nya  semina datai ari  Petara (God Almighty) aja. Nama kebuah baka nya, dih?  Nitihka penemu semua agama tauka pengarap di dunya tu, semina seiku orang ti disebut sida ‘super being, god, superior diety, dewa ti maha berkuasa’ ari atas semua Antu Busu Petara (Dewa Dewi) enggau Antu: sitan, jin, sihir, iblis, enggau ti bukai . Sapa orang nya, enti ukai Petara (God Almighty, Tuhan). Munyi ku aku ba Tusun Ke-1 dulu suba, sebedau Antu Busu Petara tauka Antu  bebalut kaul enggau pengidup mensia sida mesti minta pemendar ‘izin’ ari Petara (God Almighty).  Kitai ti beagama Kristian diperansang milih kuasa mistik ari Petara (God Almighty) enti  bisi penanggul jalai pengidup.  

          Pia mega, munyi aku dulu suba, sekali agi ku madah, tuju aku mai kita macha tauka mansik pasal dunya misteri tauka mensia mistik,  ukai aku deka mai kita nyembah ANTU tauka ANTU BUNSU PETARA tang tetap nyembah Petara (God Almighty, Tuhan Allah Taala)  taja kitai ngena chara ti bebida.