Juluk ati deka numbuhka produksyen kediri empu

UTAI ke besai selalu bepun ari utai ti mit. Juluk ati ti mit nyadi pun pengawa tauka pemujur ke besai. Nadai salah ngembuan juluk ati tauka ‘dream’ laban nya pun singkang nuju pemujur enggau pemansang. Orang ke nadai juluk ati baka apung balu; kin kia dibai pasang nadai tunga enggau pengujung. Kitai mensia ke nadai batang tuju ba idup diri lubah mansang enti dibandingka enggau orang ke bisi juluk ati tauka meras ba pengawa diri. Orang ke baka tu deka tetemuka pemujur sebarang maya.

Minggu tu ruang pemerindang maika kitai siti band ke ngembuan juluk ati deka numbuhka produksyen kediri empu. Rentak Pengabang Band madahka penatai diri ari Kanowit. Sebedau ngena nama Rentak Pengabang Band, band tu dulu suba dikelala enggau nama Mixxcell Band. Ditumbuhka dalam taun 2005, raban Rentak Pengabang Band diatu semina tinggal empat iku iya nya Wandie Alie (vokalis / drummer), Brandon (lead), Nariey (rhythm) enggau Nicholas (bassist). Rentak Pengabang Band suah nyadi band pengiring ba mayuh bengkah pengerami nyengkaum ngiring artis popular Iban ba mayuh bengkah tempat. Kenyau ari taun 2005 ngagai 2016, sida sebuat kala dikangauka orang merindang ba Pesta Kanowit enggau Pesta Pakan.

LAGU ENGGAU MUZIK

Nyadi band pengiring enda tentu mudah laban enda ulih enda nemu mayuh bengkah bansa lagu tauka lagu orang. Artis band bisi bida laban sida semina bemainka lagu sida iya aja lalu enda kelalu irau ati laban semina betatika lagu sida iya aja. Wandie Alie ke nyadi ketuai band madah maya ke benung aktif ngiring artis popular suba, sida sebuat nyendiaka diri belatihka lagu artis ti deka belagu begulai enggau sida enda ngira siang enggau malam. Penanggul ke pemadu besai ku iya enti lebuh sekeda raban band benung gawa ba menua bukai. Nya kadang-kadang ku iya nyadi ke kebuah sekeda band bepechah enggau pangan diri. Taja pan pia, nya ukai ketegal laya tang ketegal nitih ke periuk asi diri empu.

SINGLE – NINJAU NUAN

Tebal agi artis baru ngeluarka single sebedau ngeluarka album penuh. Tuju album single nya dikena ngabas diri; sekali ke diterima peminat lagu Iban tauka enda. Lagu ti badas ukai semina bepanggai ba vokal penanyi tang iya mega bepanggai ba melodi lagu, leka lagu enggau muzik. Kelimpah ari nya, klip video mega beguna endar laban lagu nya agi tau kena pejai orang enti klip video enda manggai ba standard ti dikedekaka peminat.

Single Ninjau Nuan ari Rentak Pengabang Band tau dikumbai chukup benasit laban lagu nya digaga tauka dipekuhka mayuh orang ke udah bisi nama ba industri muzik Iban.

“Lagu Ninjau Nuan tu dirikot kami ba CJNR Studio di Sibu Jaya. Melodi lagu tu digaga komposer Nicklesdom (ari Kanowit) lalu leka iya digaga aku empu dalam taun 2012 suba. Muzik Ninjau Nuan mega digaga kami empu tang udah nya digaga baru (new music arrangement) ulih Cami Ranyai, ba Ranyai Studio di Kuching,” ku Wandie Alie ngepunka saut iya ba randau kami duai.

Ditanya cherita dalam single Ninjau Nuan, Wandie Alie madahka lagu nya tau dikumbai chukup ‘special’ laban iya berindik ari kenang cherita ke amat bisi nyadi.

“Lagu Ninjau Nuan nya ngenang dua iku orang ke benung besulu. Taja pia seduai iya beserara laban mayuh penanggul ti enda ulih diseliah. Taja ati seduai iya sama sayauka pangan diri tang seduai iya nerima pekara nya enggau ati tebuka; laban sigi nemu diri nadai selatan idup tauka ‘jodoh’.

“Leka enggau melodi lagu tu chukup badas laban ba pengujung cherita seduai ke bepangan nya tadi semina baka nyaga sulu ke ungkup orang bukai. Kebuah pia laban seduai sama-sama diempu orang bukai udah nya,” ku Wandie Alie becherita pasal Ninjau Nuan.

Lebuh dipinta meri penerang ke dalam agi sentang lagu nya, Wandie Alie enda tentu berani madaka cherita nya cherita ke amat bisi nyadi ba iya empu. Leka lagu Ninjau Nuan ku Wandie Alie endang mayuh bepanggai ba utai ke amat nyadi. Nya mih kebuah sekeda ari lagu balad tau ngasuh ai mata lebuh keberai kelebih agi enti leka lagu nya bisi mansa jerita pengidup diri. Ba sentang lagu Ninjau Nuan, Wandie Alie ngaku iya endang cherita ke amat bisi nyadi enda tentu jauh ari pengidup iya empu.

PERANSANG ARTIS BARU

Kelimpah ari aktif bemain band Wandie Alie mega aktf ngaga lagu sereta meri peransang ngagai orang bukai. Ba industri pemerindang, orang ke meri peransang tauka selalu meri motivasyen nya raban orang ke chukup beguna ba bagi pengawa ngangkatka lagu Iban. Sida ke udah nyadi artis popular diatu dulu diperansang bala apai indai tauka orang bukai ke semak enggau sida. Orang ke meri peransang tentu ngembuan penemu enggau peneleba ke mayuh sereta manah.

“Ngagai bala nembiak ke baru deka ngangkatka diri nyadi penanyi, aku arapka sida iya nyadi sida iya empu. Nyadi mih diri empu; reti nya mantaika gaya enggau penemu diri empu tang ukai kelalu nunda tauka niru gaya enggau chara orang bukai.

“Nadai salah enti kitai ngaga lagu baka chara lagu bansa bukai tang taja pan pia kitai enda tau ninggalka rentak asal kitai Iban. Enti ulih daya idup bansa Iban patut bisi dalam lagu ti digaga. Lagu Iban sigi patut nyereminka bansa Iban. Dia mih kitai mantaika gaya idup nyengkaum pekayan, pemakai enggau pendiau kitai dalam rumah. Nya mih kebuah lebuh kitai ngaga klip video kitai patut beati-ati laban enti salah gaya salah chara kitai tau ngemalu bansa diri,” ku Wandie Alie ngelalau nembiak rebak baru.

Aku besetuju enggau penemu Wandie Alie sentang kualiti lagu enggau muzik lagu kitai Iban. Badas amat enti lagu kitai ulih ngangkatka pemanah pendiau enggau nama kitai Iban. Chunto ke pemadu manah nya lagu k-pop enggau hip-hop ari Korea, Jepun enggau sekeda menua barat ke bukai. Kitai tetarit ati laban pekayan, fesyen bok enggau tanda sida. Penanyi sida ukai semina bajik / sigat tang pendiau sida mega narit ati. Ari pemanah utai nya tadi sida udah nyual menua Jepun, Korea, China enggau ke bukai. Ukai utai ke enda masuk akal enti rayat Malaysia sanggup nemuai ngelantangka ati ke menua nya laban kitai tingatka menua ti chukup badas baka ke dipeda kitai dalam klip video.

TERIMA KASIH

“Aku meri besai terima kasih ngagai Cami Tan ari Ranyai Studio Kuching, Dicky J Ding, Mr Nanong, Jeff Adeng ari CJNR Studio, Nicklesdom ke nyadi komposer lagu aku. Meri besai terima kasih mega ngagai kami sebilik laban seruaran nyukung pengawa kami ke nyadi pemerindang. Bala pangan ba faceboook mega selalu meri peransang lalu bekunsika penemu pasal lagu enggau muzik. Kaul enggau sukung ngagai pangan diri mih utai ke pemadu beguna ba industri tu. Kebuah pia laban enti kitai semina ngatika diri empu aja, pengawa seni kitai tetap enda mansang,” ku Wandie Alie ngujungka randau kami duai. 

Dikarang: MR TUBAI PENGERINDU