Dayak, Iban Borneo

IBANIC GROUP… Dipeda ba senentang ngepan indu Dayak tu endang datai ari peturun Dayak ti bejaku Iban.

Tusun Ke-30

Dayak Iban-Dayak Kantu Badu Bemunsuh

Engka bisi sekeda pemacha apin macha tauka enda ingat: nama kebuah dalam cherita tuai bansa Iban mayuh cherita pasal kayau tauka perang antara bansa Dayak Iban enggau Dayak Kantu. Enti nitihka tusut ari Bunsu Petara – tujuh iku anak Telichai baka ti di baruh ditu, Dayak Kantu enggau Dayak Iban endang saum aki ini. Dua raban bansa di Kalimantan Barat tu sama bejaku ngena jaku Iban lalu nya kebuah disebut “Ibanic Group”. 

  1. Si Gundi – Apai Keling, orang Panggau Libau
  2. Retak Dai – Apai Serapoh nurunka bansa Dayak Iban.
  3. Lalak Pala – Apai Bujang Sakunding Mupong
  4. Berenai Sugi – Apai Kumpai Berenai Rarat Beratong nurunka Dayak Iban
  5. Kurong Mayang – Nadai temu peturun
  6. Bui Nasi – Nurunka bansa Dayak Iban Batang Ai
  7. Belangkat – Indai Remias (bini Pateh Ambau) nurunka Dayak Iban

“Lebuh bansa Dayak Kantu ninga rita pasal Serapoh ke munuh nembiak mit ti diiru iya nya, ukai main pemedis ati sida. Tekala nya bansa Dayak Kantu betesau diri sekaban belayan lalu sedia deka ngayau rumah panjai sida Serapoh. Sida deka bebalaska pemati anak sida ti dibunuh Serapoh nya. Bansa Dayak Kantu tu mega seraban Dayak ti bejaku ngena jaku Iban sereta peturun ari Sengalang Burong mega. Nya alai sida tu mega mayuh bala bujang berani ti berantu sereta pama. Enti dulu diuti tundi, dipungkar tanjal bansa orang bukai, sida tu pan angkat engkerawai nurun bebalas.” 

Bemunsuh Ketegal Penyalah Sarapoh

Nya mih, kebuah lalu nyadi pun bansa Iban enggau Kantu dulu kelia bemunsuh ari penyalah Sarapoh. Nya alai ti sama peturun Bunsu Petara, mayuh ga bansa Bunsu Petara “Dewa” mantu dua raban bansa tu bebaik awakka badu bemunsuh datai ke maya hari diatu.    

Dulu kelia bisi seiku bansa Dayak ari peturun Serapoh ti tebilang benama Jelian. Iya ada di menua Merakai di Kalimantan Barat. Gamal Jelian tu tinggi sereta sigat. Kati enda tinggi, engka laban  iya mega peturun ichit wit Remi seduai Rukok @ Damu ti endang peturun bansa antu gerasi.

Maya agi beumur bebalas taun, Jelian enggai tentu jenuh pendiau. Iya enggai tentu diau di rumah diri empu. Iya suah agi bejegau sereta nemuai ngagai rumah orang bukai lalu berandau  enggau bujang berani pasal mayuh macham daya idup bansa Dayak.

Hari seiti, Jelian duduk ngimbai indai iya ti benung beranyam di dalam bilik sida.

“Indai…, enti aku bebini, sapa indu ti dipilih nuan? Nuan mih ngigaka aku,” ku Jelian ngepunka randau seduai mindai.

“Apo nih anak…!,” pia ku timbal indai iya seraya merening mua sigat anak iya ti baru deka berangkat bujang nya.

“Aku milih Tiong. Iya anak dara bansa Dayak Kantu mega ti benama Beti ti bensumbar Merebai. Burak sereta bajik indu nya, Jang. Iya anak umbung Beti. Semua utai ti dikedeka iya dikereja ulun iya magang. Tang…, bisi utai nanggul ga…” ku indai Jelian.

“Utai nanggul? Nama utai nya dih, indai,” ku timbal Jelian. 

“Ukai nuan enda nemu bansa sida nya kala bemunsuh enggau bansa kitai jeman aki nuan, Serapoh kelia.”

“Nya jeman kelia menya…! Ukai enda jeman aki kitai Rukok, bansa Kantu udah nyerahka diri lalu bebaik enggau bansa kitai?” pia ku timbal Jelian baru.

“Enda nemu mih kitai…! Engka sida nya agi bedendam enggau kitai,” ku saut indai Jelian baru. “Tang uji ngapa mih anak..”.

Ninga indai iya milih sereta muji Tiong, Jelain makin gagit ati deka betemu enggau indu nya. Nya alai iya pan meranika diri lalu nurun ngagai rumah bansa Kantu nya ti enda tentu jauh ari rumah panjai sida. Datai ba tengah laman, enda ga iya berani niki ke rumah. Nya alai iya pan niki sepun kayu nangka ba ujung bilik sida Tiong. Ari endur nya iya andalka diri ulih meda gamal Tiong ti nurun mandi. Engka iya apin nemu, anak umbung jarang mandi ba ai sungai. Iya mandi ngena ai ti diangkut bala ulun iya ke meligai  di atas din. Malam nya, udah semua sida serumah nya tinduk, Jelian empekang ari dan nangka nya lalu ngerayap begadai-gadai nengah lubang ba atap meligai anak dara Beti nya. Ari nya iya bejalai ngagai peninduk Tiong.

“Dani wai,” ku Jelian ngerak Tiong.

“Apoo…! Sapa kita tu, berani amai niki kitu? Nadai orang lelaki kala niki kitu,” ku Tiong.

“Nama aku Jelian, unggal wai. Aku datai kitu laban diasuh indai aku bebini jadi enggau nuan.”

“Au…, pia. Indai aku pan baka nya; ngasuh aku belaki jadi enggau lelaki ti benama Jelian. Nama kebuah sida baka nya, nih? Tang…, aku agi kakang ati laban… nuan tu peturun antu gerasi tuk tuie kenu ku apai indai aku. Nya alai baka ni aku ulih jadi enggau nuan? Tambah mega peturun kita pan kala bemunsuh enggau bansa kami dulu  kelia menya,”  ku Tiong.

“Nya mih…, aku pan enda nemu. Aku nitihka asuh indai aku,” saut Jelian.

Ninga munyi nya Tiong pansut ari meligai iya lalu ngerak apai iya lalu madah, Jelian bisi ngayap. Iya nusui semua utai ti udah dipadahka Jelian ngagai iya tadi.

“Engka amai munyi ku Jelian nya. Setuju ga aku enti nuan deka jadi enggau iya. Tambah mega,  ngena chara belalai indai Jelian suah madahka aku lalu ngambu nuan ke menantu iya kenyau ari nuan agi dalam kandung indai nuan,” saut Beti. 

Melah Pinang Jelian Enggau Tiong

Enda lama udah nya Tiong enggau Jelian pan jadi melaki bini ngena adat Melah  Pinang. Ba pengerami melah pinang nya Beti “Merebai” ngangauka orang Batang Empanang, Sungai Kantu, Sungai Merakai enggau Sungai Kedumpai datai ngagai pengerami nya. Lebih seratus iku pengabang datai ba pengerami adat melah pinang Jelian seduai Tiong. Dua iku babi ti umbas pemesai disayat ke lauk sida serumah sereta bala pengabang maya nya.

Udah makai lemai nya, Beti pan ngasuh sida serumah sereta bala pengabang ari ulu ari ili datai ngagai ruai iya. Sebedau adat melah pinang dipenyadi malam nya, Beti “Merebai”, pan bediri lalu bejaku.

 “Sebedau kitai berengkah ngintu adat Melah Pinang anak aku Tiong enggau laki iya Jelian lemai tu, aku deka madah ngagai kita semua: aku udah nangkap seiku antu gerasi tuk tuie ti aku  kurung dalam sangkar. Begedi amai aku meda antu gerasi nya laban iya mega suba iya udah munuh anak menyadi aku ti benama Numpang maya sida ngayau bansa kitai di kitai di Merakai suba,” pia ku Beti seraya merening mua bala mayuh. Ninga munyi nya begau bala Dayak Kantu laban sida berebut deka meda antu gerasi nya ba mua mensia mayuh.

“Ni iya? Ni antu gerasi munsuh kitai nya? Bunuh iya…!” ku bala pengabang.

 Enda lama udah nya Beti pan bediri baru lalu enda ngasuh semua sida ke datai nya inggar.

“Uji sengian enda lama, unggal,” pia ku Beti seraya malik ke kiba, malik ke kanan.

Lemai nya udah laun bendar, sempun api getah ba sebelah tiang rumah nya terang bendar nampakka mua iya.

“Taja pia…, ba mua kita bala mayuh aku udah ngemendarka anak umbung aku Tiong  jadi enggau Jelian ti antu gerasi ku aku nya, iya mega anak tuai Dayak ti munsuh kitai ngelama tu. Enggau tu mega aku arapka sida enda bemunsuh enggau kitai di Sungai Kantu ditu agi,” ku iya.

Ninga munyi nya semua kaban belayan Beti gaga amai ati. Pemutus penemu iya manah amai laban pengerami Melah Pinang antara Tiong enggau Jelian ulih ngaga pemaik antara bansa Dayak Iban enggau bansa Dayak Kantu nyentuk ke diatu datai ke  belama-lama iya.

(Betampung ba Tusun Ke-31  minggu nyin ila)

Nya mih pun penatai nama bansa Dayak ti bejaku ngena jaku Iban di Sarawak sepengudah sida belaya lalu bemunsuh enggau diri sebansa. Bansa Iban ti pindah melunggang ke Sarawak, endang sepengudah ti bebaik enggau bansa Dayak Kantu. Nya alai, bansa Dayak Kantu enggau Dayak Iban di Sarawak tauka sida ti agi di Kalimantan Barat  nadai agi ingatka laya nya dulu kelia. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatsapp tu: 013-8325146