Pantai Belawai dipilih mensia mayuh endur piknik

NYADIKA PENGINGAT… Angy Ng (berdiri dua kiba) enggau sida iya sebilik sereta bala bakih begambar nyadika pengingat ba Tebing Tasik Belawai kena 31 Julai.

BELAWAI: Pelilih Belawai udah dipilih siti ruang bilik ari Bandar Sibu endur ngatur aktiviti rekreasyen sereta ngelantangka ati kena Hari Lima ke udah.

Sida iya ngena peluang maya hari pemisi nyambut Hari Raya  Aidiladha ngelawa sereta  ngelantangka ati ba endur nya.

Ku  Angy Ng S L, iya rindu amat meda gaya ke manah amat ba endur nya nyengkaum mayuh bengkah perengka ke bisi disediaka ba endur tebing tasik nya.

“Iya ke betul, dua minggu sebedau tu kami sebilik bisi ngelawa endur tu. Aku nusi jerita senentang peneleba kami ngagai bala bakih ba sibu. Ketegal rindu amat ninga nya, sida iya madahka diri deka piknik ba endur nya mega. Nya alai kena Hari Lima ke udah kami sama bela ngelawa endur nya pengudah meda mayuh bengkah gambar Tebing Tasik Belawai baka ke dipadahka aku ngagai sida iya,” ku iya.

Ku iya, antara aktiviti ke ngerinduka ati maya hari nya nyemerai ba kandang tebing tasik ke beresi sereta manah amat.

適elimpah ari nya kami mega bejalai ba tebing tasik sereta nyereta aktivti rekreasyen bukai baka nyumai pemaki kediri empu chara relak, nunun sayap manuk enggau iya ke bukai. Kami sigi endang ngasaika penegrindu ati lebuh maya ba endur nya,・ ku iya.

Taja pan sida iya diau ba bandar, tang Angy tetap muji mayuh bengkah perengka ke bisi disediaka ba endur nya baka chalet ke ngerinduka ati semua orang ke bisi datai ngagai endur nya.

“Tebing tasik ba Belawai sigi beresi sereta manah amat endur relak lebih agi ngagai orang ke rindu ngambi gambar.

“Lebuh maya kami ba endur nya umbak dipeda sigi endang jelan iya sereta selamat ngagai sebarang orang ke deka nyemerai tauka bemain ba tebing tasik. Taja pan agu enggau bilik tinduk ke bisi ba chalet nya sebaka enggau ba endur bukai, tang beresi sereta ulih narit ati orang lebih agi ba maya baka ke diatu ngemeranka sosial pengerai,” ku iya.

Iya mega madahka, ba kandang endur deka tama ngagai tempat nya bisi siti kolam endur nyemerai ke numbas iya pemesai endur nembiak mit mandi.

Ketegal Bandar Sibu tauka ba serata bagi menua ketiga Sarawak nadai tebing tasik, nya ngasuh Angy enggau sida iya sebilik milih Tebing Tasik Belawai ke enda jauh ari Bandar Sibu endur piknik.

“Pemakai ke bisi ba endur nya mega nyamai, aku rindu makai bihun enggau mee goreng. Sua siti meja enggau endur ke jelan iya pemesai semina RM6 aja, nyengkaum endur ‘barbeque’. Aku ngasaika tebing tasik ba Belawai sigi manah amat sereta beresi lalu kami deka ngelawa endur nya baru jemah ila,” ku Angy.