Bebetah nyelam kena negi pengamat

LAYA ringin enggau gerama (baka ke dipegai bala sida di atas) meh ke ngujungka orang berengkah nemu kalam ai kelia.

LEBUH bala orang rumah panjai deka ngaga skim kebun getah kawin ba taun 1961 kelia, mayuh amat mensia ba menua kami charut ka tanah. Kebuah pia, laban tebal agi, enti enda semua, tanah ke deka alai numbuh kebun nya nadai bepala.

Nya alai maya nya, mayuh bala sida ke tuai-tuai kelam kabut, ke lalu ngujungka bala sekeda bisi ngambu tanah orang bukai, lalu dipadahka tanah sida. Berindik ari tu, mayuh amat laya tanah udah nyadi rambau nya, enda nyalah-nyalah baka ba ujung taun 1980an ngagai pun taun 1990 suba lebuh SALCRA baru deka berengkah ditumbuhka ba genturung menua batang Kedap enggau sungai Burui di Saratok.

Nyadi kes charut bempu tanah maya SALCRA nya udah diatur enggau jalai chara ba kourt. Tang dalam taun 1961 suba, mensia agi jauh siga runding, nya alai ukai semua kes charut bempu tanah dibai bechara ngagai kourt tauka atur tuai rumah tauka penghulu.

Ba genturung menua kami, rebut tanah nya ukai semina entara diri serumah tang bisi mega enggau orang ari rumah bukai, lalu tebal agi ukai kaban belayan semak baka diri petunggal.  Nya alai bisi aya aku siku (ke enda ngasuh nyebut nama) charut enggau siku tuai orang dalam Batang Assam (nama iya sengaja enda disebut ditu). Seduai bela madah tanah nya, ba tebing sungai Burui, pati Melupa, enggi diri empu. Siku orang bukai pan enda berani jadi saksi laban tuai ari Batang Assam nya mayuh penemu ngemedis orang nyengkaum pengaruh bisa.

Nyau ujung iya, sida milih deka ngatur penyarut nya kalam ai. Reti kalam ai nya bebetah nyelam bepegai ba tungkat tauka turus kayu ke dijuak lalu enda mudah techabut, dikemataka bala mayuh, lalu chukup enggau piring enggau ading.

BEBETAH NYELAM

Dalam atur kalam ( ke dalam) ai, dua iku pengari ari dua piak (siku-siku sepiak) ke bisi penyarut nya, lalu asuh bebetah nyelam bepegai ba turus nya. Sapa ti betah agi nya menang. Sapa dulu pansut ari dalam ai nya alah.  Nyadi alah, nya reti iya alah ba penyarut nya. Enti charutka tanah, reti nya iya ti alah nya enda ulih ngempu tanah nya.

Nyadi ba dalam taun 1961 suba, lebuh kalam ai tegal penyarut tanah sida di Burui, aya aku ari menua kami milih niang pungka lelaki siku iya nya Ngauh anak Narang ke bensumbar ’Layang Mandi Pukul Lapan’ – iya bisi bedengah dua iku lebuh ke mawa belelang di menua Miri enggau Baram kelia –  ngarika tuai aya nya nyelam lebuh sida enggai bechara tang nguji minta sah petara ngena jalai lama, iya kalam ai. Bala sida ari Assam nyin pan bisi manuk sabung sida empu, ke enda disebut nama ditu,laban enggai ke kena bantah bala anak, bala uchu-ichit iya. Enti baka manuk seduai ke diambi nyelam nya endang sama bulu enggau tisik bisa, endang sama suah udah disabung ba menalan besai.

Lebuh ngatur pengawa sida bisi madah bala tuai-tuai ba ai kami awak ka sama enggau ngemata lalu jadi saksi pengawa kalam ai sehari nya. Enti enda salah ingat aku niang Pengulu Guyang ari Kerangan asai ke bisi datai meda pengawa nya. Aku agi mit tang udah ingat. Sida milih alai kalam ai nya ba siti pala lansar, kaki lubuk ke pemanah iya penalam. 

Udah turus diunjam lalu bisi enchukak mimit alai bepegai, seduai ke jadi manuk sabung asuh kalam ai, nya lalu asuh sedia. Dulu ari nya, seduai udah ngatur piring seduai kediri empu. Tuai akim lebuh nya, niang Jerampang anak Saat ke bensumbar ’Pintu Batu Nanga Igan, Indu Balu Tengah Malam’ pan udah ga sedia. Udah bekau orang nyampi minta adu, minta intu petara aki petara ini, lebih agi Seragindi Petara Ai, sereta piring udah diengkah ba kelingkang lalu gantung ba atas ai, seduai lalu asuh nyelam bepegai ba turus.

 Lama ga seduai bebetah, nyentukka siku ari Assam nyin nyau melepung bepegai ba turus tang nyau kelama enda tan agi lalu pansut. Nyadi Ngauh lalu apin merabubuk ai, sereta mengkang nadai engkebut. Menang meh tuai aya ari rumah kami. Enda lebu ga ngasuh niang Ngauh menya, ke bisi ngembuan batu tekuyung, lalu enda mudah nginsit rarat tauka melepung.

Nyadi ba menua bukai rambau nya, tauka dulu agi, endang suah bala Iban udah nguji ngatur penyarut sida ngena jalai kalam ai. Nyadi ba menua kami, udah nya nyentuk ka seharitu, nadai agi nemu bisi orang kalam ai.

BUP RAJA DURONG

Iban kelia nemu kalam ai ari laya gerama  seduai ukui. Laya tu belabuh ari ukui ke seruran memunyi kaing kaing tegal bedarah telu pelir udah bekau kena gigit gerama lebuh iya ke gali ba atas kerangan. Nyadi ku cherita tu, gerama ke ngigit nya kejang iya baru deka mulai diri ngagai lubuk.

Rambau nya kelia, menua agi balat siga, lalu bala Iban pan agi semak enggau antu, enggau jelu. Lalu lebuh ukui ke didinga kaing-kaing nya, sida baru deka mulai ka diri udah bekau ninga Simpulang Gana ke ngatur siti laya, iya nya entara Ribut enggau Simpang Impang, nitih ku niang Benedict Sandin menya dalam bup iya Raja Durong.

Nya alai meda gerama balat beduan ukui, orang mayuh lalu ngasuh ngiga gerama ka dalam lubuk awak ka iya kena ukum. Tang sida nadai chara ngiga gerama ka dalam lubuk, laban lubuk nya nyau gadung letu empa pemesai enggau penalam.

Meda baka nya Raja Seragindi lalu bejaku ngasuh ringin ngiga gerama laban ringin tu betah nyelam. Ringin pan lalu nyelam, lalu berangkapka rau, begigaka gerama. Nyau kelama baru iya pansut manggum gerama lalu dibai iya ngagai semak ukui ke agi kaing-kaing.

Sereta ukui meda gerama, iya lalu nekus merejuk-rejuk, ama ngetup, ama dilengka ka iya ga. Udah nya ringin lalu bejaku. Ku iya, ”Laban aku udah nulung penusah nuan ukui, ke agi tu ila badu agi nuan nyalak bansa kami nyentuk ke uchu ambu peturun tua ila datai ka jemah ila.”

UKUI BESUMPAH

Ninga munyi nya, tudah ukui pan lalu nitih pinta ringin sereta lalu besumpah madah diri badu agi nyalak ringin. Iya lalu mesan ngagai uchu ambu iya nyentuk ka dudi hari enda ngasuh sida nyalak ringin. Bala ke diau be menua ulu nyangka udah bidik tepeda ka ukui ke sigi enda nyalak ringin. Anangka iya deka nyalak, enti iya tetemu ka tai ringin ke makai gerama, ukui ukai semina ensium iya, tang lalu ngali ka diri malai tai nya nyentuk ka sehari tu. Tudah pangan, amat meh suah mansa tai ringin ke ngenjing apus dunya laban penyai bau iya, bedau kala meda ukui ngali diri ba tai ringin. Tang ku bala sekeda ke selalu mai ukui bejalai endang, amat munyi ku jerita nya tadi.

Nyadi ukui udah nya lalu ngasuh ringin bepemakai ka gerama belama lama iya. Nya alai nyentuk ka saritu, ringin endang bepemakai ka gerama bumur umur, laban iya udah ngemediska ukui.

Udah bekau tembu semaya ukui enggau ringin, dinga bala mensia dia nyau richah bechakah enggau pangan diri. Sida nya bechakah laban sekeda bisi enda arapka ringin ke semina mesai lengan tau ngulihka gerama dalam lubuk ke ngenjing baka tasik. Ku sekeda tau, laban besai ari nya pen endur belalai, enti belalai tegal penyalah ulih meh giga, ku sida.

Tang sida agi majak balat bechakah. Nyau terit rekung bala sekeda, sampaika sida nyau beripih deka ngelaban pangan. Nya alai ninga sida lalu enda badu betalat ka utai nya, Raja Seragindah Petara Tanah lalu bejaku madah, “Nya ukai pasal laban betah alai gerama ulih ngiga ringin, tang laban iya bepenyalah. Nya alai enti kitai belalai mai penyalah, dini -dini endur kitai diau pan ulih giga.”

Taja pia, agi bisi empat lima iku sida bukai ke madah enda patut ringin ulih tegiga ka gerama ba lubuk ke ngenalam enggau ngemesai nya.

Nyau kepuas sida ke betalat baru Seragindah ngasuh kalam ai. Lebuh nya, ikan semah ke betah lalu ke endang tuai ikan diau dalam ai, asuh nyelam ngarika bala sida ke ngumbai penyalah ulih lalai. Ringin ke diau ba darat, asuh sida nyelam ngarika bala orang ke ngumbai penyalah enda ulih dilalai.

LEKA SAMPI SERAGINDAH

Nitihka tusui Benedict Sandin dalam bup Raja Durong, sereta seduai deka nyelam, dia Seragindah lalu nyampi munyi tu:

     Ni kita Raja Ai, Raja Munti,

     Raja Ikan, Raja Gemian,

     Raja Adung, Raja Kulung,

     Raja Tapah, Raja Semah,

     Raja Lelabi, Raja Genali.

     Peda! Tela! Iching! Perening!

     Sebarang sapa seduai tu ngari

     Ka utai bula, utai ngapa,

     Nya tanggung, nya pelepungka.

     Sapa seduai ngari ka utai

     Bendar, utai amat nya asuh

     Menang, asuh lantang, anang

     Betunsang anang betunggang utai!

Abis sampi Seragindah, semah seduai ringin lalu nyelam. Pama pengelama seduai ke nyelam. Sekumbang seduai ke agi dalam ai, bala ke ba tebing agi majak bekelikuh, sama ngeringka manuk sabung diri.

Lama bendar seduai udah nyelam. Peda sida semah pansut belubah-lubah ngabul ke atas ngambi angin.

”Nyah,” Ku Seragindah, ”alah semah, laban iya diasuh ngarika utai ngapa, utai bula laban enti iya ngarika utai amat, utai bendar, ni ringin tan laban iya, ga iya endang tuai orang dalam ai.”

Nya alai, udah bekau nya Seragindah bejaku baru madah, ”Kenyau ari seharitu, sapa kitai mayuh tu bisi utai dipebelitka enggau pangan, tang enda ulih sara enggau adat, laban bisi landik ngelindung penyalah diri enggau jaku, laya ke bakanya patut diaduka ngena kalam ai, awakka laya nya diatur Petara enggau rurus, enggau manah.

Lalu ku iya, enti orang ngena jalai nya ngatur penyarut, orang ke diasuh nyampi ari sepiak-sepiak enda tau enda ngangauka orang ke empu menua alai sida nyelam baka Raja Lelabi, Raja Genali, Raja Semah, Raja Tapah, Raja Adung, Raja Kulung, laban sida endang orang diau dalam ai kenyau ari jeman dunya nyadi. Sida nya, ku iya, tau enggau Petara ngatur pemetul mensia.

Berengkah ari nya, enti Iban bisi utai dipechara ngelaban pangan diri enda ulih atur enggau adat, bala tuai lalu ngatur orang nyelam ke dalam ai, ngambika Petara ngemparu laya iya ngena pengelurus.

ULIH TELESA EMPERAN