Baka ni anak mit senurutka SOP?

BALA anak mit Smart Reader Kids menggau penutup mua, sengkabung mua enggau ubat munuh igi penyakit sereta suah nuchi jari.

SAPA madah anak mit mar deka senurutka Prosedur Operasi Standard (SOP) maya pandemik Covid-19 diatu? Sebendar iya, anak mit muntang diseridi ketegal sida nerima aja pekara ke dipadah enggau nadai besangka.

Ditu pengawa raban pengajar ngembing bala anak mit sida ngereja pekara ke patut. Endang iya tanggungpengawa tu enda muntang tang tu pemar ke disan ulih raban pengajar tadika enggau taska diatu.

Ba tadika Smart Reader Kids di Sarawak, nyata amat besenurutka SOP ulih anak mit nya tinggi.

Tu ketegal penemu sereta penyedar bekaul Covid-19 ke udah diajar olih pengajar kenyau ari Perintah Mindah Betagang (PKP) dipejalaika enggau mega dibantu apai indai ke ngemeratka enggau pengelikun anak sida lebuh sida di tadika.

Tebal ari anak mit nya meretika tuju SOP dikena ketegal sida udah dipadah enggau penerang-penerang nya nengah pelajar chara arus maya PKP dipejalaika kelimpah ari jaku padah chara enda peputus ari apai indai enggau media rama.

Lebuh datai di tadika, anak mit Smart Reader Kids menggau  penutup mua, penangkup mua ke disediaka ulih Smart Reader Worldwide enggau ubat munuh igi penyakit sereta suah nuchi jari.

Bala anak mit mega senurutka seraka rama lebuh di tadika enggau enda dipadah beulang-ulang. 

Nundaku Direktor Smart Reader Kids Tabuan Jaya Baru 2, Evelyn Law, penerang pandak bekaul Covid19 enggau mega tunjukchara bekaul enggau SOP begulai enggau nembiak digaga sebedau enggau pengudah kelas tamat, kelimpah pengajar ngembing bala anak mit bekaul enggau chara SOP ke patut dititih.

“Kitai pechaya nyema suah dikereja begulai enggau bala anak mit sida nyamai ingatka jalai pengelikun dalam SOP udah nya kelama-lama nyadi peneleba ungkup sida,” ku iya.

Pengempu Smart Reader Kids Sunlight Garden 3, Miri, Patricia Carolyn Latit nyebut proses pelajar bejalai lanchar nyengkaum nitihka SOP nyengkaum seraka rama taja pan keterubah iya berasai lain mimit ketegal duduk jauh antara sesiku.

“Taja pan aktiviti beraban enda ulih dipejalaika orang pengajar nyediaka mayuh bengkah kereban pelajar ke ngait ati digaga sesiku sida anak mit.

Pengerindu lebuh belajar patut diteruska kena nerenak pengerindu ba pelajar awakka bala anak mit rindu ke sekula.” tambah iya.

Ba apai indai, sebedau berengkah sesyen sekula tadika dibuka baru, sida udah diberi penerang ba SOP ke dipadah perintah enggau mega disediaka ulih Smart Reader Worldwide.

Apai indai mega dipinta nyerahka pom ngesahka pekara pengerai anak sida sebedau nganjung sida ke tadika.

Kelimpah nya, apai indai enda tau enda bekerejasama enggau orang ke bempu tadika ungkup ngatur sesyen nyema penyampau anak mit ngelui ari penyampau ke udah ditetapka perintah .

Apai indai mega disasuh negenukuka bala anak sida gerai sebedau dianjung ngagai tadika kena nyeliah ari pekara ke enda manah ke tau nyadi.

Ba Siti Khadijah Atok, 38, iya nganjung anak iya ngagai Smart Reader Kids Rubber Road West, Kuching, lalu iya pechaya amat kepala pengajar enggau bala pengajar deka ngereja pekara ke manah kena ngenukuka anak sida semampai dijaga.

Baka ni enggau bala anak mit ?  Ba Aryanna Faiha Zalfa Fahmi Izzuddin Johnny , 5, ari Smart Reader Kids Sunlight Garden 3, Miri, iya gagit nurun ke sekula ketegal ulih betemu enggau bala bakih.

Indah ku anak mit tu, iya rindu belajar sereta ngereja aktiviti taja pan duduk jauh ari pangan diri sereta meretika leka pelajar taja pan aktiviti dipejalaika chara kediri.

Bakih iya Airish Irdina Syafiyyah Abdullah mega sebaka. Iya semampai rindu nurun ke sekula, gagit lebuh ngereja aktiviti di dalam kelas sereta meretika pekara ke dipelajar iya.