Cherpan: Kudi Covid -19

TUSUN KEDUA

JANTAN UMBAT

TU ti dikumbai kuarantin. Lebuh sida nya ditemu bisi kena rampit, sida lalu diperubatka di sepital. Berita madahka orang ke mudah agi tau kena rampit penyakit tu nya orang ke udah beumur ari atas enam puluh taun enggau nembiak mit. Tu ti ngasuh Jang nangi sereta irau bendar ati nyepi iya enggau ini orang nya bela baka pejalai mata panas ti udah jauh ngalih hari.

ATUR MINDAH BETAGANG      

Naka pemedis-medis pengidup sekumbang Atur Mindah Betagang tu. Orang ke dikemendarka pansut laban deka meli pemakai nya semina siku ari sepintu bilik. Lebuh pulai ke rumah ari ni-ni, sida enda tau enda berunsut enggau hand sanitizer, iya nya ubat dikena munuh agi penyakit ti dibai jari. Orang nya mesti mandi lalu gari ke dikena iya mesti dibasu enda begulai enggau gari diri sebilik ke bukai. Pemampul idung enggau nyawa ti udah dikena mesti dibuai enggau likun. Nya enda tau dibuai sebarang alai tang disimpan manah-manah dalam plastik lalu dibuai ke dalam tung uras. Orang seruran digerah awakka nyeliahka diri enggau orang begelumu tauka diau ba endur ke besedul enggau orang mayuh tauka ba endur ke betutup. Orang ditangkan enda betabi jari tauka beberap enggau pangan diri lebuh betemu.

Opis Menteri Pengerai begulai enggau Opis Menteri Pengelikun Menua seruran meri penerang ke baru pasal pengerembai Covid 19. Tiap-tiap hari, jaku ari Menteri Kanan (Pengelikun Menua), Datuk Sri Ismail Yaakob enggau ari Tuai Pengarah Opis Pengerai, Datuk Dr. Noor Hisham Abdullah ditaburka ari radio enggau televisyen madahka angka orang ke kena rampit ti pengabis baru. Dipadahka mega menua di dunya tu ke mayuh kena rampit. Kelimpah ari orang ke kena rampit ke masuk sepital, pemayuh orang ke udah gerai tauka tudah ke ninggalka dunya pan dipadah. Tiap-tiap hari digerah pasal pemesai guna nyaga pemeresi diri.

KOMITI PENYANGGA PENUSAH NGENYIT

Di Sarawak, tanggung pengawa nyekat pengerembai penyakit nya dilempaika ba bau kaban Komiti Penyangga Penusah Ngenyit ti betuaika Sapit Kepala Menteri, Datuk Amar Douglas Uggah Embas ti mega meri ripot tiap-tiap hari pasal angka orang ke bisi kena rampit penyakit nya, orang ke dikuarantin, orang ke bebadi nyawa enggau orang ke pansut ari sepital ke udah gerai dipadahka magang. Perintah ngaga undang-undang dikena nyekat pengekai penyakit nya, nya alai dipadahka bagi orang mayuh ke bisi ngelanggar undang-undang lalu kena kompaun. Dikena nentuka orang enda belalai mindah, perintah ngatur sekat ba jalai raya enggau chara ngempang jalai di antara pelilih menua enggau ba garis antara menua enggau Indonesia.

Jang ngasaika pengidup sekumbang Atur Mindah Betagang, PKP tu balat merinsa. Taja bepeluang begulai enggau diri sebilik, diau di rumah ukai nyamai. Enti sejam dua nadai ga apa. Nya nyau bebulan-bulan. Sekula ditutup. Nembiak sekula enggau pengajar beperam di rumah. Nasit siku anak enggau uchu seduai bisi enggau seduai. Anak enggau uchu ke bukai diau ba endur bukai di Kuching. Ke nembiak sekula, bisi diatur kelas chara on-line tang nya bisi penanggul ketegal arus internet ti enda tentu meruan. Kedai mayuh ditutup, nya alai orang ngidupka diri ngena meli utai on-line mega. Jang enggau ini orang nya balat irauka bala uchu ke nadai ulih datai ngusung seduai tauka digusung. Rumah panjai seduai enda ulih diabas. Orang di rumah panjai enda nerima orang datai ari mengeri pulai ke rumah panjai maya penyakit nya ti benung berampit. Bisi mega orang tepagang laban ti mindah sebedau PKP nya dipejalaika. Bisi sekeda orang tepagang di Semenanjung laban penerebai bilun nadai.

BETAMPUNG …