Agama Adat Iban dalam Politiesme

PIRING… Tu mih sebengkah agi perengka ti di kena manang belian dalam adat agama Iban.

Tusun Ke-51

Manang Entayang Bangun Manang Gelanyang

Lemai nya, Tuai Rumah ngelumuka sida serumah laban iya bedara lalu miau Manang Entayang enggau manuk. Iya mai sida serumah bala bela gaga ati meda Manang Entayang ke disangka udah mati tau pulai baru gerai nyamai.  Orang mayuh pan begelumu ba ruai Tuai Rumah, ngulu penatai Manang Entayang. Sekeda sida ke bisi ngulu iya lemai nya murus tubuh iya, bisi nya merap Manang Entayang laban tekelalu gaga ati. Ari pengaga ati, Tuai Rumah sida iya mantai mayuh utai diempa enggau ai tuak. Udah semua mensia terenah duduk, Tuai Rumah bejaku.

“Bala kitai serumah dipeda aku udah mega bisi ditu magang. Baka kitai ke begempuru ba ruai aku lemai tu, bisi nya kitai ketawa lalu bisi ga nya nyabak. Taja pia, kitai tu ukai begempuru tusah ati, tang gaga ati meda penatai Igat Entayang ke disangka kitai mati ngelama tu. Lemai tu kita serumah tau beramai makai ngirup, kena kitai mantaika pengaga ati ke penatai Igat Entayang enggau lantang senang. Naka mih penusah ati kitai di menua sekumbang ke ditinggalka iya,”  ku tuai rumah.

Tuai Rumah pan majakka jaku nusi semua penusah ke udah nyadi ba sida serumah nya sekumbang Manang Entayang ke nadai, lebih agi baka sida serumah ke ngulit sereta lalu ngerapuh Manang Entayang. Lebuh ninga cherita nya, dia Manang Entayang  enda kebut-kebut. Mua iya suah mega bebali mirah, sinu ninga penusah sida serumah, lebih agi baka sida iya sebilik empu. Tembu iya bejaku, sida ke nembiak lalu nyadung ai tuak enggau utai diempa. Sebedau orang bukai, sida ngasuh Manang Entayang ngirup dulu kena nyelamatka penatai iya.  Bala mensia ngenjing richah beirupka ai tuak dia. Maya nya mega, Tuai Rumah ngasuh orang ngetu bejaku enda lama laban deka nanya berita ari Manang Entayang empu.

Pengelenyau Manang Entayang

“Nya alai Igat Entayang bisi ga enggau kitai   berami  lemai tu. Kitai dijangka sama bela deka ninga berita ari iya pasal iya ke lama udah ninggal ka kitai.

 “Nya alai, kitai minta tusika dek cherita berengkah dek ke nampuk nyentuk  ngagai pemulai dek ke rumah kitai tu,” ku Tuai Rumah nampung jaku iya.

Udah nya Manang Entayang pan lalu nusi pasal iya ke nampuk nyentuk ke ngagai iya ke begulai sejalai enggau aki iya niang Manang Gelanyang. Semua sida serumah nadai engkeretik. Sida tegenung baka empelekung mabuk ambuh, baka engejungau mabuk keruh ninga cherita Manang Entayang. Sida berasai sinu, ninga cherita  Manang Entayang tang gaga sereta temegah ati  meda Manang Entayang nyau udah nyadi manang ti bendar.

Lebuh iya ka nusi berita, Manang Entayang dipeda baka ke enda tusah ati, tang dalam ati iya din iya endang selalu sinu ngenang bala menyadi iya ke udah abis pindah ngagai menua bukai, laban sida ke nyangka iya udah mati. Pia mega iya berundingka apai enggau indai iya ke udah mati laban tekelalu tusah ati.

Maya iya ke di rumah, Manang Entayang endang enda enggau orang gawa bumai betaun, Tuai Rumah sida enda ngasoh iya enggau orang gawa laban sida Tuai Rumah endang mayuh ulun gawa ka sida iya.

Manang Entayang Nyadi Tebilang

Kira sebulan Manang Entayang udah datai di rumah sida iya, rita iya ke udah nyadi manang ti dibangun Manang Gelanyang pan makin tebilang ditemu orang mayuh di menua sida di Batang Ai.  Nya alai, semua orang ke tabin endang selalu berubat ngagai iya. Pia mega, sida selalu ngambi iya belian. Nya iya enda tentu diau di rumah. Orang ke ngambi iya belian nya endang enda alah tiap hari enggau malam.        

Bisi sekali orang datai ngambi iya belian. Orang nya enda temu ari ni penatai, lalu enda mega dikelala. Bisi ga orang nya madahka nama menua diri tang sida Manang Entayang serumah nadai kala ninga rita endur menua ke disebut orang nya. Nitihka atur sida manang, enti orang ngambi belian, sida enda tau enda datai, enti nadai kebuah ti berat. Maya nya, Manang Entayang enda mantah lalu nitihka bai orang  ke ngambi iya belian nya.

“Aku tu diasuh Raja kami ngambi dek belian  laban anak Raja kami lama amat udah tabin raya. Iya pedis ba pun rekong.

“Iya ti berubat, endang enda ngetu ngelama tu tang lalu ga enda suman-suman. Raja kami madah, sebarang sapa orang ulih nyumanka penyakit anak dara iya nya, orang nya deka diambi iya ka menantu,” ku orang nya.

Udah makai tengah hari, Manang Entayang pan nurun mupuk ari rumah sida nitihka orang ke ngambi iya belian nya. Sida pan bejalai betunda udi mupok nurun ke pangkalan. Datai ba pangkalan Manang Entayang enda dibai orang nya nepan perau, tang dibai orang nya terejun ke dalam ai. Sebedau orang nya mai iya terjun, orang nya mai Manang Entayang begari masukka baju. Manang Entayang enda bemunyi ninga orang mai iya begari. Iya nitih aja semua utai ti disebut orang nya. Iya pan masukka baju. Enda berasai iya pan meda    gamal diri bebali nyadi baya. Orang ke ngambi iya pan bebali nyadi baya.

Udah terjun ke dalam ai, Manang Entayang asai ke datai ba menua orang. Iya endang enda diasuh orang muka baju iya enti apin datai di rumah.

“Enti nuan muka baju, enggaika orang bukai meda lalu deka munuh dek,“ ku orang nya.

Diambi Raja Baya Belian

Manang Entayang pan nitih aja  ajar orang nya. Menua ke endur iya nya endang menua Raja Baya. Lemai nya kira-kira udah silau manuk, Manang Entayang enggau orang ke ngambi iya belian nya pan datai ba pangkalan Raja Baya. Lebuh nya, Manang Entayang pan ingatka ajar aki iya niang Manang Gelanyang ke ngasoh berunsut ngena engkerabun dulu ngambika orang enda ngelala iya anak mensia.

Lebuh ba pendai bisi mega sekeda orang mai Manang Entayang mandi, tang iya madahka diri udah mandi. Udah nya sida pan terus niki ka rumah. Manang Entayang pan dibai sida duduk ba ruai Raja Baya. Menua nya endang menua Raja Baya, munyi iya ke dijangka Manang Entayang. Raja Baya empu berupai gaga bendar meda penatai Manang Entayang laban iya endang kala ninga rita pasal Manang Enayang.

Nyadi anak dara Raja Baya ke tabin nya nyau deram-deram didinga ari ruai, ngetanka pemedis diri. Manang Entayang sinu bendar ninga anak Raja Baya nya. Iya pan berundingka pemedis anak Raja Baya nya. Maya orang makai lemai, sida pan makai. Udah tembu makai lemai nya Raja Baya pan ngasoh semua sida serumah begempuru ngemataka Manang Entayang belian, ngubat anak iya. Anak dara Raja Baya ti tabin raya nya endang bebungkur apus, enda ulih angkat.

Nyumanka Anak Dara Raja Baya

Semua orang udah duduk magang, Manang Entayang pan berengkah belian, ngubat anak Raja Baya nya. Iya mantaika lupung iya lalu ngebakka pua ke dikena anak Raja Baya nya bebungkur. Peda iya mata ginti mengkang ba rang anak Raja Baya nya. Merinsa amat gamal iya ngetatka rang iya ti kena kait mata ginti besi nya.  Enda lama udah nya, Manang Entayang pan ngunsut tubuh anak baya iya ngena pengaruh iya. Jenuh mimit anak Raja Baya nya. Iya pan kurang agi demuh-demuh.

Udah nya baru Manang Entayang ngasuh anak Raja Baya nya nukangka raang iya, awakka murah endur iya nyabut mata ginti ti lekat dalam nyawa iya nya. Udah nyawa anak baya nya tebuka Manang Entayang pan mantun mata ginti nya lalu disimpan iya dalam lupung iya.

 Anak dara Raja Baya diau jenuh, enda demuh-demuh agi. Udah nya iya pan madahka diri lapar, minta makai. Bini Raja Baya pan beguai ngambi asi ke anak iya. Bulih bendar anak dara Raja Baya nya makai laban ke lama udah enda makai asi, tulang iya nyau majak lemi. Udah tembu makai, anak dara Raja Baya pan  duduk. Gamal iya dipeda nyau berupai regas agi. Manang Entayang  majak belian ngambi semengat anak raja baya nya. Ku Manang Entayang, semengat anak baya nya udah jauh ngejang laban ti udah lama tabin raya. Iya pan belian semalam-malam nya.

Tawas pagi hari siti, anak dara Raja Baya nya berupai gerai. Iya pan nyau tau bejaku, tau ketawa. Iya nyau regas bejalai kin kia. Iya mega madahka diri nyau gerai, nadai pedis apa-apa agi. Gaga bendar mih Raja Baya seduai bini iya meda anak dara seduai iya ke udah gerai baka selamai. Raja Baya nyau berundingka semaia iya lebuh iya ke ngasuh anak buah iya ngambi Manang Entayang belian suba. Iya  enggai bulaka semaya. Nya alai seduai melaki bini pan  deka ngenanka Manang Entayang, enda ngasuh iya pulai laban dekan ngambi iya ke menantu.

“Aku meri besai terima kasih ke pemanah ati seduai melaki-bini ke deka ngambi aku ke menantu seduai. Tang enggau ati lurus aku madahka seduai, kami manang enda tau bebini. Semua orang endang nyadi ke anak kami magang-magang,” pia ku Manang Entayang.

Guchi Pengaruh Besai

Ninga munyi nya Raja Baya pan nanyaka upah Manang Entayang ke belian nya. Manang Entayang madah kediri enda beupah, amat ga orang ke sakit nya gerai, nya mih upah iya. Ninga munyi nya Raja Baya nyau nyintak seput iya, laban berundingka pemanah ati Manang Entayang. Iya enda nemu jalai malas pemanah Manang Entayang ke udah ngeraika anak iya. Nya alai iya enda berunding panjai agi, tang nyuaka guchi seigi ngagai Manang Entayang.

“Guchi lama kami tu bai dek, Manang. Guchi tu tau nyadika pengaruh besai. Dek mih ngibun guchi tu laban dek ga enda begunaka upah bukai. Aku nemu di menua kita din endang mayuh munsuh. Tang ngena pengaruh guchi tu dek tau nyaga menua kita ari langgar munsuh, lalu kita enda alah laban munsuh. Sebarang orang ke bisi jai ati deka ngelaban tauka deka ngalahka menua kita, dek tau ngirah guchi tu aja, enda iboh ngena duku, enda ngena sangkuh, mati lus mih munsuh dek. Barang sapa nangkin guchi tu enti lebuh ngayau, sida enda alah pantap munsuh.  Nyadi guchi tu enda tau dikena ngayau dua kali dalam setaun, tang kita tau berunsut ngena ai iya, ngambika kita kebal sereta kering. Enti kita nyerang munsuh dua kali dalam setaun, ngena guchi tu, serang kita sabau lalu bala kita deka pedis,” pia ku jako Raja Baya.

(Betampung ba Tusun Ke-52)

Tibak cherita Manang Entayang di atas nya, nunjuka “spiritual practice”  bemanang nya endang siti ari pengarap agama Adat Iban ari dulu kelia. Diatu taun 2020 pengawa tu mega agi dikemeranka bansa Iban taja makin kurang-sekurang; laban mayuh kitai Iban udah megai agama Krestin. Terima kasih ngagai kita pemacha semua lebih agi kita ke bisi ngirum gambar ke guna dalam Sada Sarawak tu. Engka nyema bala pemacha bisis utai tanya, tujuka ngagai  whatSAp tu: 013 8325146.       

DIKARANG HARRY USUP UMBAR (B. SC Hons. Human Development UPM)