Dunya pemerindang Album Sayau Selama Iya

BALA penyanyi enggau sida ke bisi bekaul enggau pengawa ngasilka Album Sayau Selama Iya begambar nyadika pengingat maya ngelancharka album nya ba Am Lepak Music Café, Kota Samarahan.

BETEMU baru kitai ba ruang pemerindang ke minggu tu. Sekali tu kitai begulai enggau siku artis ke madahka penatai diri ari Tamin Selangau. Sinar Mas nya siku artis ti ngatika diri tang ngeluarka album solo iya ngena nama Kaban Music Production (KMP).

Album Sayau Selama Iya ngundan lapan iti lagu. Lapan iti lagu nya Sulu Dikerindu, Selamat Bekelala, Bulan Nyadi Saksi, Pengerindu Aku, Pengerindu Luya, Bujang Manchal, Beraika Nuan, Sayau Selama Iya enggau Simpan Meh Pengerindu Tua.

Ba album Sayau Selama Iya tu, Sinar Mas enggau Robert Achu dibantu mayuh orang ti endang landik ba pengawa muzik, lirik, grafik enggau video. Entara raban sida tu iya nya Toy Houstan, Alexandar Kam, Sinarmas, Adraf Jimmy, Ricky Jay, Eric, Raffie Hujan

enggau Jeffry Tegong Uching.

Ditanya baka ni iya ulih ngeluarka album Sayau Selama Iya taja pan ngena belanja diri empu, Sinar Mas madah, iya semina ngena nama KMP tang semua belanja endang datai ari iya empu magang.

“Aku ti bendar endang udah lama deka ngerikot lagu tang baru diatu niat nya nyadi nyata. Terima kasih ngagai kami sebilik enggau semua orang ti udah meri peransang ngagai aku ari ngelamatu ti udah. Ba aku, pengawa ngeluarka album penuh baka tu ukai mudah enti enda mutus ati. Kebuah pia laban iya ngena belanja ke mayuh amat,” ku Sinar Mas ngepunka saut iya ba randau kami duai.

Kelimpah ari Sinar Mas empu, album Sayau Selama Iya mega bisi siku artis baru Robert Achu. Ba album tu Robert Achu mai lagu Simpan Meh Pengerindu Tua.

PENGAWA NGELANCHARKA ALBUM

Pengawa ngelancharka album Sayau Selama Iya udah mujur diatur kena 11 May 2018 ba Am Lepak Music Cafe di Samarahan. Pengawa bejadi album nya digulu raban artis lama enggau baru, bala composer enggau pemuzik.

Komiti pengatur pengawa ngelancharka album ti betuaika Nicholas Jors Nick bisi ngangauka Mr Gibbson Rentap ari KMP enggau Isa Lee bejadi album nya. Dalam jaku ti dipansutka seduai iya mega mayuh agi meri peransang ngagai sida ti bisi ati deka

nyadi recording artiste.

Siti pekara ke mesti bisi sebedau nyadi recording artiste nya pengerindu ti dalam ba pengawa belagu, penemu tauka skil belagu lalu nemu mai diri ba industri. Nambahka nya, sida ke nyadi artis mega mesti liat ati lebuh betapi enggau penguji ba dunya pemerindang.

PENGARAP

Kitai arapka Sinar Mas enggau Robert Achu terus mujur nyadi artis ti tebilang. ‘Nothing is impossible’ laban jereki siku-siku kitai nadai orang nemu. Ba dunya pemerindang, kitai mesti mai ati ti positif lalu mesti mega mai ati ti baruh. Kebuah pia enti ti kitai mai

ati ti baruh kitai ulih belajar mayuh penemu ari orang ti landik agi. Tang enti kitai mai ati ti tinggi kitai enda belajar laban ngasaika diri lebih ari orang bukai.

TERIMA KASIH

Sebedau ngelengka randau kami duai, Sinar Mas meri besai terima kasih ngagai semua orang ti nulung iya nyengkaum aya iya empu Steward Ringgit, sida sebilik, dj radio enggau raban media tauka pemberita.

“Terima kasih ngaga semua kita. Terima kasih mega ngaga Robert Achu laban udah enggau aku belagu ba album Sayau Selama Iya tu. Aku arapka peminat lagu Iban ulih nerima kami duai. Terima kasih mega ngagai artis lama ke mayuh meri jaku lalau enggau jaku peransang. Aku chukup beterima kasih ke semua pemanah kita,”  ku Sinar Mas ngujungka randau kami duai.

Dikarang: MR TUBAI PENGERINDU