Dayak, Iban Borneo

DAYAK BORNEO… Sekeda ari bansa Dayak ti agi diau mendam di Kalimantan nyentuk ke maya hari diatu.

Tusun Ke-36

Ari Batang Kapuas ke Batang Ai 

Tentu kitai udah ninga cherita tuai kelia pasal Tuai Dayak Iban ti benama Jelian, Gelungan enggau Langkup ti nguluka bala nembiak sida pindah ari Batang Kapuas di Kalimantan ke Sarawak nengah entigis sungai. Bisi mega Tuai Dayak Iban nguluka nembiak sida pindah ke the Batang Ai nengah Sungai Kumpang, pati  Batang Ai di ulu Engkelili. Tuai bansa Dayak Iban ti keterubah mai bala nembiak iya pindah ke Kumpang iya nya Lanong. Tegal sida mih raban bansa Dayak ke terubah tama menua baru lalu diau enda lama nebing Sungai Kumpang. Sida tu lalu ngumbai diri Iban Kumpang.

Siku agi Tuai Dayak Iban ti nguluka bala nembiak iya nengah jalai tu pindah ari Batang Kapuas ke Sarawak iya nya Medan.

Iya enggau bala nembiak iya mega diau enda lama di Kumpang lalu udah nya pindah ke Sengkarong di ili Engkilili. Medan tu Tuai bansa Dayak Iban ti tebilang; lalu sekeda bala ichit wit peturun Medan agi diau di menua antara Kumpang enggau Undup pati Batang Lupar nyentuk ke sehari tu. Sida ti nitihka Ambau dudi agi seretai diau bumai betaun di Tanjong Melarang lalu Semalanjat milih Bungkap lalu ngumbai bansa diri Dayak Iban Bengap.

Siku agi Tuai bansa Dayak Iban nguluka bala nembiak iya pindah ari Tinting Tiang Laju lalu diau mendam di Meriu semak  Engkilili. Diatu sida bebagi raban; sekeda diau mendam di  Belambang di ili Engkelili lalu seraban agi ke Sungai Lemanak pati  the Batang Lupar ti benanga ba ili  Engkelili.

Bepechah Pindah Nginga Menua Baru

Udah bepuluh-puluh taun Sungai Undup diuan bansa Dayak Iban ti betuaika Gelungan, Jelian enggau Langkup, dua iku Tuai ti benama  Meringgai enggau Manggai nguluka bala nembiak seduai pindah ke ili agi lalu ke Skrang lalu diau mendam ba Nanga Sungai Tisak. Maya nya Nanga Skrang udah diuan Lau Moa sereta bala nembiak iya ti pindah ari Sadong enggau ili Batang Lupar. (Iya tu engka seiku ari nembiak Sera Bungkok ti pindah ari Tanjung Datu ke nanga Sungai Rajang begulai enggau menyadi iya ti benama Senaun, apai Tugau ti peturun aki ini bansa Melanau, enggau bansa Iban Ili Rajang.)

Udah Manggi enggau Meringai pindah ke Skrang, makin mayuh  tuai-tuai bansa Dayak Iban mai bala nembiak sida pindah ari Batang Ai enggau Undup baka: Guang ke Nanga Enteban, Entigar ke Nanga Belaai,  Chaong ke Tanjong Lipat enggau Sudok seduai menyadi iya Malang ke Lubok Numpu.

Udah nya Manggai enggau Tindin anak Chaong ti pindah ke  Saribas lalu nitihka menyadi indu iya ti benama Rinda ti belaki jadi enggau Demong anak Tuai bansa Baketan ti benama Entinggi di Paku.

Di Batang Ai, siku Tuai bansa Dayak Iban di Seremat ti benama Bau bebini jadi enggau Selangka lalu beranakka Chandu (Indu), Sentu (Indu), Buja (Lelaki), Mawan (Lelaki), Pagan (Lelaki), Gemong (Lelaki), enggau Lanyi (Indu), Chandu belaki jadi enggau Galau anak Mawar Biak di Entanak Sungai Saribas. Menyadi iya ti bukai nya pindah ari  Seremat ke ulu lalu ke ili sungai Batang Lupar.

Siku indu bansa Dayak Iban ti ti benama Niok enggau laki iya sereta bala anak iya pindah ke nanga Lubang Baya di ulu Batang Ai. Ari menua nya anak telesak peturun seduai iya nya Naga seduai Sumping pindah ke Batang Kanyau di Kalimantan. Ari Batang Kanyau seduai pindah ke Ulu Katibas lalu nyadi bansa  Iban ti keterubah diau mendam di Sungai Katibas. Parai Naga seduai Sumping diganti bala anak telesak seduai baka Unggat, Matahari, Gerinang enggau Keling. Ari Sungai Katibas, Song anak telesak sida tu betambah mayuh beranak betelesak lalu pindah ke Sungai Balleh di Kapit.  Sida tu mih peturun aki ini tuai-tuai bansa Iban ti benama Penghulu Jinggut, Kumbong enggau Jimbun di menua Balleh.

Mawan enggau bala anak iya pindah ke Ulu Lingga lalu diau bumai betaun enggau raban Dayak Iban Dau enggau Dayak Iban Balau. Buja enggau sida sebilik pindah ke ulu Batang Ai lalu diau mendam di Nanga Buie. Menyadi seduai ti benama Sentu ngansak ke ili Batang Ai lalu diau bumai betaun ti Nanga Kumpang lalu seiku agi menyadi seduai ti benama Gemong pindah ke ulu lalu diau di Sungai Delok. Pagan pindah ke Sungai Mepi lalu dia iya nyadi peturun aki ini Rabai ti belaki jadi enggau tuai kayau Iban Batang Ai ti tebilang jelai nama ti benama Penghulu Ngumbang “Berauh Langit” di  Mepi.

Laya Iban Skang Enggau Batang Ai

Nitihka utai ti dipeda kitai dalam kar menua, Lemanak nya menua ti diuan raban bansa Dayak Iban Batang Ai enggau raban bansa Dayak Iban Skrang. Nya mih kebuah, bala Dayak Iban ti diau di Lemanak suah tasah laban laya ti selalu nyadi antara Iban Skrang enggau Iban Batang Ai. Laya sida tu mega bepun ari asuh perintah Raja Brooke. Ambi ke chunto Perintah Raja Brooke suah mai bala Iban Skrang, Saribas, Batang Lupar enggau Sadong ngayau Bantin “Ijau Lelayang” enggau Ngumbang “Berauh Langit” ti angkat ngelaban Perintah Raja Brooke. Sida selalu betempuh di tanah orang Lemanak. Nya mih kebuah menua Lemanak enda kala penuh diuan bansa Dayak Iban. Lama-lama  nyau majak puang laban bala Dayak Iban dia ti ngerarika diri ari laya Perintah Raja enggau Bantin.

Ngumbang Berauh Langit

Maya jeman nya mega Tuai Iban Batang Ai ti benama Ngumbang “Berauh Langit” enggau Bantin ‘Ijau Lelayang’ ringat. Seduai nyangka sekeda Iban Lemanak ti udah nundukka lalu nanahka Perintah Raja Brooke ngelaban seduai. Nya mih munyi ke sempama Melayu: gajah sama gajah berekak, pelanduk mati di tengah-tengah. Puas ti tasah baka nya, mayuh bala Dayak Iban Lemanak pindah ngena chara belalai tauka rari enda madahka tuai-tuai sida empu. Mayuh raban bansa Iban tu nitihka Mujah “Buah Raya” pindah ke ulu Julau, Kanowit, Sarikei, Sibu lalu ke serata menua bagi ke Ketiga (Batang Rajang). Mayuh ga raban sida tu pindah lalu diau mendam sebelah Sungai Julau, pati Sungai Kanowit.

Sebedau raban bansa Iban nya pindah ngagai menua baru sida nya, sekeda sida nya ngetu lalu bumai betaun sebelah ulu Sungai Saribas / Sungai Layar. Maya nya endang udah mayuh raban bansa Iban ti udah nguan sereta bempu menua nya. Taja pia, sida nadai penanggul bekaul enggau sida ke dulu datai dia laban sama bejaku ngena Jaku Iban lalu enggau nya sida pan nemu diri sama saum aki ini ti asal penatai ari  Batang Kapuas di Kalimantan Barat dulu kelia menya. Tang, maya nya menua Saribas udah penuh diuan bansa Iban, kenyau ari jeman Patinggi Ngadan. Nya  alai Iban Lemanak pan ngiga menua baru tunga ke Batang Rajang / Batang Igan). (Benedict Sandin, 1994)

                                    (Betampung ba Tusun Ke-37  minggu nyin ila)

Nama kebuah bansa Iban di serata menua Sarawak bejaku ngena Jaku Iban ti sama taja pan bisi bida mimit ba senentang patah sebut enggau pengaya jaku (kosa kata)? Nya mih pun asal penatai bansa Dayak / Iban ari Saribas ke menua Sungai Kalala – Krian, Melupa, Awik. Berengkah ari nya mega Iban majak begiga ke menua baru tunga ke Batang Rajang nyentuk ke  menua tanah Batang Rajang (Sarikei, Bintangor, Pakan, Julau, Sibu, Kanowit, Song, Kapit). Maya jeman nya Iban ukai semina bekaul jaul sereta bekrisis enggau bansa Baketan tauka Seru aja tang  bansa Beliun, Seduan, Tajung @ Rajang enggau Orang Ulu (Benedict Sandin 1994.) Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146  

Ditulis Harry Usup Umbar (B.Sc  Hons. Human Development, UPM)