Seiku indai nerima bantu ari Hope Place

TERIMA KASIH… Orang ke numbuhka Hope Place, Kelvin Wan (Kiba) meri bantu ngagai seiku indai enggau tiga iku anak iya ke agi mit sereta diperatika pengari ari Anjung Singgah, Aldrin Lanen (Kanan) ba premis Hope Place, Kuching kena Hari Lima ke udah.

KUCHING: Empai lama ke udah Anjung Singgah ngasuh Hope Place meri bantu ngagai seiku indu sereta tiga iku anak iya ke nadai rumah endur diau.

Orang ke numbuhka Hope Place Kelvin Wan madahka, seiku indai ke beumur 29 taun  enggau tiga iku anak iya udah ngelarika diri ari rumah sua laban nyadi mansa kena jamah.

“Anak indu ke beumur setaun lebih, tiga taun enggau enam taun dikenuluka laban kedua-dua nembiak mit nya pemadu mit sereta dipeda kurang pemakai.

“Ketegal penanggul enggau penusah ke baka nya, indu nya datai ngagai  Anjung Singgah ngambika bisi endur  ngenduhka diri,” ku iya.

Pengudah dipadahka senentang kes nya penagri ari Anjung Singgah, Aldrin Lanen mai indu nya ngelawa Hope Place ngambika meri bantu ke patut.

“Hope Place udah meri bantu baka kain ampin anak mit, tusu tepung enggau penutup mulut enggau idung ngagai indu nya.

Ku iya, Anjung Singgah ba Jalan Rubber mega meri servis kaunseling sereta mantu nginga pengawa ngagai sebarang orang ke begunaka tulung. Anjung Singgah bekerejsama enggau Hope Place mantu mensia mayuh ke begunaka tulung.

“Baka kitai ke udah nemu, Anjung Singgah nya siti Palan Servis Sosial dikena mantu orang ke nadai endur diau lalu sida iya diau enda lama ba endur nya, diberi pemakai enggau iya ke bukai chara pechuma.

Sebarang sapa deka betanya ngagai Gerempung Pengelantang Pendiau Hope Place tau nanya ngena lumur 082-525987 berengkah ari pukul 8.30 pagi ngagai 5.30 lemai maya Hari Satu ngagai Hari Lima sereta pukul 8.30 pagi ngagai 12.30 tengah hari maya Hari Enam.

Ketegal nya mensia mayuh diperansang meri bantu ngagai gerempung nya.