Rambau Nikah Melah Pinang:Jaku Nanyaka Pejalai

Janang anak Ensiring

Tusun kelima

AMAT ga kitai tu udah betemu mua betapak muka
Baka ke udah bekelala,
Tang laban kitai tu udah basa
Kumbai orang, sama sereta tebalan bungah.

Tang mih kebuah kami ke datai tu
Tentu lah agi girau, ngeregau ati kita serumah
Seagi-agi kita apin nemu pesu enggau tuju kami ke datai tu.

Nya alai baka nya ku jaku tu, menyadi.

Nya alai selemai ke udai, lama ke udah
Sekumbang terang di penyarang arung rumah tu
Pasang gitang, tungkun lampu ditunu pasang mejah;
Dia aku tak kesal di jungkal kelah-kelah
Dada tak berasa ukai mudah
Dalam berendam kandang gundah
Ati terunti serimbai tussah.

Tak kenyau ari mit ke lelachit gamal megah
Sampai ke besai ke jejangai sigat manah
Sekali ga aku menya udah, unggal
Dipanjah sida kerubung karung mengenah
Enggau anak puchung
Kumbai orang duyung jayau rajah
Ke nembpuah ngaba bau.

Ke menya, unggal
Enti maya agi kena batak niang Rekaya Biak
Nya baru jaku kitai beansak-ansak
Baru betemu duduk betapak,
Nya baru sida bebatak
Niti awak batang jalai.

Tang jaku kitai segaji
Penemu kitai seati
Sedada setapa jari
Parang endang mengkang ari belakang mulai ke daie
Bejaku tukang tau landik siru pandai mereti,
Nya baru manah, punggal.
Tang ukai rari anak lelaki
Semina enda tau enda beuji-uji
Niti sentali jalai penyemerai.

Tang anak mega kitai tu riput takut rawan,
Laban tu nadai bejuluk bukai
Tu bejuluk, kumbai orang, lingkuk miga betegam
Endang ga ke baka
Bejaku karung didinga nuan.
Kati ku enda baka nya—
Nuan jaguk manuk jelayan;
Aku tuntung enseriban
Tang enda mega tu bengat tan
Bepupuh belaban besehari-sehari