Cherpan: Hari Bansa

GAMBAR pengiyas

ENGGAU penumbuh Malaysia, Presiden Sokarno ari Indonesia lalu ngelancharka perang nganchurka Malaysia, iya nya Ganyang Malaysia. Beduduk ari nya mih Perang Konfrantasi nyadi. Keterubah endur dialahka soldadu Indonesia iya nya Balai Polis Tebedu. Berebak enggau nya mega, Presiden Macapagal ari Philipine lalu ngambu menua Sabah menua pegai sida iya. Maya tu mih dipeda bala soldadu di jalai raya kelebih agi ba menua ke semak enggau antara menua enggau Indonesia. Nyerumba maya tu, mayuh raban China di Sarawak ngelesapka diri ke babas, ngumpul senyata lalu begulai enggau kaban parti komunis Indonesia, Clandestine Communist Organization (CCO) tauka PERAKU ari Kalimantan Barat. Sida tu numbuhka pengachau di Sarawak ngujungka adat bekurung Sarawak State Emergency dipejalaika.

NGERUGA PENGELIKUN

Bala komunis di seluruh Sarawak balat bendar ngeruga pengelikun. Sida nguna bemacham-macham akal dikena ngiga sukung. Sida bulih sukung belalai ari kaban belayan enggau sapa ti serunding enggau sida enggai ngemendarka penumbuh Malaysia. Sida napatka sekeda endur ti mudah alai sida bulih sukung. Ari nya sekula China mayuh nyadi target sida. Aki Atup ingatka mayuh bendar orang kena bunuh komunis kelebih agi enti sida nya ditemu bisi ngeriput pasal pengawa sida ngagai perintah. Maya nya bala ti jauh di ulu sungai enggau ba endur ti suah dikachau sida dipindahka perintah begelumu ba siti endur. Ari nya, mih diatur perintah tukul pemadat baka di Siburan, Beratuk enggau Tapah di bagi Kuching awakka perintah ulih nyaga sida nya ari dikachau komunis.

PENGACHAU MAJAK NYADI

Maya adat bekurung, Sarawak State Emergency dipejalaika ketegal pengachau majak nyadi datai ngagai taun-taun 1970. Pelilih menua ti dibungkur adat bekurung balat ngasaika pemerinsa. Bala komunis nyau nyadi penyelawai, terrorists ti numbuhka pengachau di mayuh endur ba antara menua. Soldadu pengelikun menua bebendar nyaga rayat lalu nyidi tuai komunis. Soldadu mujur mujuk tuai sida ke benama Bong Kee Chok nyerahka diri di Bandar Simanggang lebuh 4 March 1974 ti ngujungka Simanggang diberi nama Bandar Sri Aman.

Perintah bebendar deka ngemunaska bala komunis, nya alai ngatur mayuh operasi dikena ngabiska tugau komunis ti agi chakah bejalaika pengawa sida ti ngelaban perintah. Ari nya, siti opis ti nyaga menua ti balat kachau nya baka RASCOM, Rajang Security Command. Soldadupengelikun di RASCOM deka munaska pengawa komunis ba sekayu Batang Rajang lalu nya meruan datai ngagai taun 1990.

Ati aki Atup sinu ngingatka pengachau tu ti munuh nyawa bala soldadu pengelikun ti berambunka nyawa ngenanka menua. Suah bendar didinga menua kitai bulih meredeka nadai tumpah darah.

Nya nyebut pasal kitai ti nadai bemunsuh enggau Orang penjajah tang Sarawak balat tebunsa laban iya nyau nyadi palan tauka medan perang, belaban enggau munsuh ari luar ti deka ngemuntanka penumbuh Serakup Malaysia. Ari peneleba ti nemu menua tu tau diserang munsuh, enti kitai enda nyaga pengelikun enggau penegap iya, patut bendar ditanam semangat taluk sereta angkunka menua.

Nya alai patut bendar pengerami ngintu Hari Kebangsaan tu diatur enggau chukup rami dikena ngingatka tanggung pengawa rayat nyaga pengelikun enggau kedaulatan menua.

Taja pia, hari-hari bulan ti betul patut ditusun enggau manah awakka rebak baru nemu sejarah menua ke betul. 31Ogos 1957 nya Hari Merdeka Persekutuan Tanah Melayu, 22 Julai 1963, Sarawak Merdeka ari British lalu 16 September 1963 nya baru Hari Penumbuh Malaysia.

Pengerami Hari Kebangsaan patut diperetika rayat awakka pengangkun enggau penyayau rayat ke menua balat agi diasaika. Nambahka nya, fakta ba bup teks dikena di sekula patut ditusun baru ngemasukka peristiwa ti bendar bekaul enggau penumbuh Serakup Malaysia.

Ari nya, sugu rambai jaku, Malaysia Prihatin deka balat agi ngentung sereta ngeramak ati semua rayat Malaysia.Selamat nyambut Hari Kebangsaan enggau Hari Malaysia taun 2020.

Oleh Jantan Umbat