Cherpan: Petenah Madu Berachun

GAMBAR pengiyas

Tusun ketujuh

UDAH terebai tiga hari tiga malam, baru Burung Raya datai di menua. Iya lalu terus betemu enggau Burung Tuktada, betati deka nampung pesan ngagai burung nya.

“Unggal Burung Tuktada, lalu pechahka ulih nuan telu Burung Kung Kapung ke diperam nuan,” ku Burung Raya, agi mai sengih. Seput iya masih lunggak-lunggak, lelak bekau terebai ari menua jauh.

MERI ANAK MANDI

“Nadai kuasa aku berani mechahka telu tu enti nadai ijin ari Burung Kung Kapung empu. Kereja aku semina dipesan iya meram telu tu,” saut Burung Tuktada, kesal. Iya masih merembam telu Burung Kung Kapung ngalan ba atas tanah. [Keba ku cherita tuai, kenyau ari cherita tu ke nyadi kelia nyentuk ke seharitu, burung tuktada betelu ngalan ba tanah, enda besarang baka burung bukai sebelah-belah puchuk kayu tauka di baruh daun].

“Pia ku leka pesan Burung Kung Kapung,” ku Burung Raya.

“Enti nya peneka Kung Kapung empu, medis ni dih aku mechahka telu nya. Iya ga endang lama udah aku peram,” pia ku saut Tuktada.

Keselalu agi, lebuh malam hari Burung Tuktada kiruh betebahka nyawa, “Tuk! Tuk! Tuk!” Pengawa iya ke betebahka nyawa “Tuk! Tuk! Tuk!” sepemanjai malam nya endang nadai tentu tuju, kelimpah ari iya ke neruska peneleba diri ke bemunyi nya. Burung Tuktada/Tuktarau ke bemunyi ketuk-ketuk nya endang ari asal. [Kenu ku cherita tuai, semua bansa Burung Tuktarau endang peturun siku Iban ke parai telih lebuh beban perau; nyawa Tuktarau ke “Tuk! Tuk! Tuk!” nya endang bunyi ketuk pantap Iban nya ke beban perau kelia. Lebuh ke beban nya iya telih lalu mati mabuk darah. Semengat iya lalu nyadi burung tuktarau].

DIINTU NAKA PENYIRU

Malam nya Tuktarau ngendaka diri betebahka nyawa. Iya kiruh diri mechahka telu Burung Kung Kapung ke diperam iya sepengelama kira-kira tujuh taun ke udah.  Udah dipechahka iya ari telu, Tuktarau lalu ngintu anak Kung Kapung enggau naka penyiru baka ke ngintu anak diri-empu.

Nyau kelama-lama ke ngintu, dia Tuktarau lalu nganjung anak Kung Kapung mandi ke pendai. Pengawa ke nganjung anak mandi nya endang adat ngambika iya sebulu enggau ai enggau tanah enggau babas. Reti nya, lebuh iya anak mit nya nyau besai, enti iya turun di ai iya enda mudah lemas. Lalu pia mega, enti iya turun ke tanah tauka dalam babas, iya enda mudah dianu ular lemayar, antu jelu, mega iya enda mudah tesat lebuh turun dalam babas. Adat meri anak mit mandi tu meruan dititi ditali Iban ke masih megai pengarap lama nyentuk ke seharitu.

Datai di pendai, udah muai piring, udah besampi, udah begenselan, baru Tuktarau lalu nyunggaka anak Kung Kapung. Tak enda mukai-mukai jam tudah disungga, dia datai siku ikan juak lalu nyambar anak Kung Kapung ba kaki. Kaki iya sepiak putus, lalu ditaban ikan juak. Nya alai, kenyau ari penusah tu ke nyadi kelia nyentuk ke seharitu, dia kaki burung kung kapung bisi dipeda pandak sepiak.

TUKTARAU NYUMPAH JUAK                

Ringatka meda ulah juak ke ngasar nya enggau anak Kung Kapung, dia Tuktarau lalu nyumpah juak. “Tulah nuan ila, Juak, laban nuan tunggang ngemediska anak Kung Kapung. Ari tubuh nuan-empu enggau semua turun-menurun nuan, kita ikan adung ka nyadi ikan ke mangah ke enda tau begulai enggau ikan bukai. Pengidup kita ka merinsa, laban kita terus enda tulihka pemakai kediri empu semadi mih kita nyepar sereta makai ikan bukai ke mit-mit ke alah pengering laban kita. Enti tetangkapka ikan bukai, kita ila makai anak diri-empu! Mensia enda tentu deka ngulih kita ke pemakai laban isi kita nadai asai sereta mayuh tualng!’.”

Bekau ke kena sumpah Tuktarau nyentuk ke seharitu, dia ikan juak lalu nyadi sebansa ikan ke enda besai ke tak mangah sereta tuyu besepar sereta betangkapka ikan ke mit-mit sebelah rantau enggau tisi tebing. Ari nya, ikan ke mit-mit lalu enggai besaruk pendiau enggau iya. Isi ikan juak amat kurang penyamai diempa. Ikan juak mega sebansa ikan ke mayuh amat tulang. Tegal nya, lebuh juak bisi tama bubu, pemansai tauka pukat, kesuah agi lalu dilepaska orang ke bulih baru ke ai’, enda dibai pulai ke lauk baka ikan bukai.

PINSIL SARATOK