Agama Adat Iban dalam Politiesme • Adat belaki bebini nitihka agama Adat Iban

INDU BAJIK… Jeman rebak baru mayuh chara ti lebih engkeman endur indu bekelala enggau lelaki pilih sida empu.

Tusun ke-57

NITIHKA agama Adat Iban, lebih-lebih agi jeman dulu kelia, chara
tauka jalai bansa Iban tau jadi melaki-bini ukai semina siti aja. Bisi
ti rami, bisi ga enda, lalu nitihka peneka ati kedua-dua piak indu
enggau lelaki. Taja pia, sekali ke rami tauka enda, enti orang jadi
deka jadi melaki – bini, seduai nya enda tau enda beterang ngagai
Tuai Rumah enggau apai indai seduai. Umur maya tau bebini,
belaki enda tentu temu nitihka peneka, nadai tentu betatak, enti
lelaki udah disebut berangkat bujang, indu berangkat dara.

JALAI MELAKI BINI

Sekeda ari chara tauka jalai orang tau jadi belaki-bebini iya nya
baka tu:

(i) Melah Pinang. Adat melah pinang enda tau enda disempulang
enggau piring ading sereta rami. Tu mih pemadu pemesai
pengawa dalam adat belaki- bebini.

(ii) Anjung lelaki. Enti lelaki dianjung ngagai rumah indu, kurang
ari pengerami melah pinang, lalu jalai iya pan lain mega.Kekadang sida datai bebala mayuh mai orang rumah bukai. Taja
pia, suah mega semina beraban empat lima iku aja orang ti
nganjung lelaki, nitihka pengelantang pemisi enggau peneka ati
diri empu.

(iii) Lelaki nama kediri ngagai bilik indu ari atur apai indai.

Chara tu nadai pengerami, tang semina beterang ngagai Tuai
Rumah aja. Enti bisi belanja tauka senang lantang, tau ga
ngempuruka orang serumah nya aja, enti nadai tentu belanja tau
enda.

(iv) Lelaki nama kediri ngagai bilik indu ari atur enggau pengeran
ati iya empu, lalu nadai penerang ari apai indai iya. Chara tu,
nadai pengerami kelimpah ari beterang ngagai Tuai Rumah enti
apai indai indu tauka lelaki sama nadai tagang. Enti apai indai
seduai bisi tagang nya tau pulai ke penanggul.

(v) Indu nama kediri ngagai bilik lelaki tubuh puang. Enti lelaki
enggau apai indai iya nerima, lalu apai indai indu mega nadai
tagang, pengawa nya semina beterang ngagai Tuai Rumah, lalu
seduai tau jadi melaki bini. Enti apai indai seduai bisi tagang,
tentu tau ke penanggul sebarang maya.

(vi) Indu nuntung ke kandung tauka ngambu. Enti kandung apin
dipansut tauka apin dibunuh genselan manuk tauka babi indu
enda tau dianjung ngagai rumah lelaki.
Enti manuk udah mati kena enselan kandung, nya baru tau
nganjung indu ngagai lelaki.

PENGAWA MELAH PINANG

Nya mih, sekeda jalai bansa Iban tau bebini belaki. Ngena
pengawa Melah Pinang nya endang pemadu manah ari semua.
Kelimpah ari nya, bisi ga orang ti kelalu keran keran deka jadi
melaki bini enggau pangan diri lalu ngujungka seduai betaban rari
tau mega ngujungka seduai begulai melaki-bini diau senang
lantang semanjai umur. Pia mega mayuh mega orang ke datai ba
pengawa Melah Pinang rami besai tau mega sarak, teberarak
rumah tangga.

NANYA INDU

Pengawa nanya indu, bepun ari mayuh macham penumbuh.
Nitihka adat Iban sekeda ari penumbuh nanya indu bepun ari indu
ti sigi rinduka lelaki nya. Pengerindu seduai bebungai

sepengudah seduai ti betemu lalu berandau maya indu digayap
lelaki nya. Maya lelaki ti ngayap indu nya, lelaki ukai semina
berandau enggau indu ti dikerinduka iya nya, tang lelaki nya
mega bepeluang berandau enggau apai indai indu nya. Nitihka
adat selama, apai indai indu minta lelaki nya mai apai indai iya
datai nanya anak iya, enti iya amat-amat deka jadi enggau anak
indu iya nya.

SABUNG SERETA RANDAU

Siti agi penumbuh pengawa nanya indu iya nya bepun ari sabung
sereta randau apai indai ari kedua-dua piak lelaki enggau indu.
Kekadang pengawa ti baka tu mega bepun ari sabung tauka tku
kaban belayan sida ti bukai, ukai semina apai indai aja. Udah ti
mansau randau ari kedua-dua piak lelaki enggau indu, sida pan
nganjung pesan madahka maya hari deka datai nanya indu.

Sebengkah agi penumbuh nanya indu iya nya bepun ari
jaku ti disebut ngerambang sengapa. Reti nya indu enggau apai
indai iya bedau temu setuju tauka enda, laban nadai kala
besabung jaku dulu. Lelaki pan nadai ga kala ngayap indu ke
deka ditanya nya. Apin nurun nanya indu, apai indai lelaki
ngempuruka kaban belayan sereta sida serumah, madahka
pengawa diri empu ti deka nanya indu. Enti kaban belayan nadai
penanggul nya baru iya nimpuh hari nurun. Sebedau nurun,
pesan mega deka dianjung ngagai apai indai indu ti deka ditanya
sida nya, awakka sida sedia sereta ngadang ke penatai sida.

Penyampau tubuh orang nanya indu tentu nadai betatak, tang
jarang-jarang ga kurang ari lima sepuluh iku, lalu jarang mega
lebih ari lima puluh dua puluh iku.

Dulu kelia nadai tentu beleman nanya bini, tang maya hari
diatu nyau nitihka pemisi utai. bebaika ai bisa: arak, tuak, bir,
kopi, kueh enggau ti bukai. Enti tanya nya ukai ngerambang

semua utai ke dibai sida ke nanya dibai tama ngagai bilik indu
lebuh sida datai. Tang bisi ga dipeda orang ke nanya
ngerambang; semua utai ke dibai sida dilalaika sebelah tanah
tauka engkah sebelah bilik orang bukai dulu.

PULAI MALAM

Enti enda mujur, jaku enda diterima, utai ke dibai sida enda
dibantaika dia, tang bai pulai. Bisi mega orang ke enda bulih
nanya bini pulai malam nya, enti rumah sida enda tentu bangat
jauh. Sida tentu enda nyamai asai, laban maluka diri enda bulih.
Lebuh bala sida ke nanya bini tu tadi datai ba ruai indu ti deka
ditanya, sida dilaluka baka ke enggau temuai mega, Udah badu
makai lemai, dia apai indai indu lalu ngangauka orang sida
serumah nya. Sida ke indu pan dipinta pansut ari bilik ke ruai,
ningaka randau sida ke tuai-tuai.

Udah semua orang sampal duduk, nya baru apai indai indu
bejaku nanyaka pejalai sida ke datai. Enti apai indai indu nya
enda tentu nemu bejaku, iya tau ngasuh orang ke landik bejaku
ngarika iya. Enti bisi nemu, maya nya mih selalu bisi jaku besilup
dalam leka main kena orang betundi-bebuti maya nanya indu.
Enti apai indai indu nerima jaku tanya sereta setuju semua utai ti
disebut sida ke nanya indu nya, nya baru seduai ngasuh dua tiga
iku indu ari sepiak lelaki nanya indu empu ba bilik iya empu.

Kebuah pia, laban apai indai lelaki deka ninga ari mulut, indu ke
ditanya sida nya empu. Enti indu nyaut setuju, pejalai sida ke
nanya indu nya dikira mujur. Nya baru pengawa sida dipenyadi
lemai nya. Leboh maya nya mega, sida mega mutuska sapa
seduai ke jadi melaki bini nya ti nguaika pangan. Udah putus jaku,
apai indai lelaki ke nanya lalu ninggalka tanda baka: tinchin, duit
tauka reta tengkira ti bukai ke tanda pengamat semua jaku seduai
ke jadi melaki bini nya. Berengkah ari maya nya mega, indu ke
udah ditanya nya enda tau digayap orang bukai agi. Iya dikira

udah belaki tauka bisi tunang. Udah nya, baru mutuska timpuh
hari alai melah pinang. Enti sama lantang utai pan bela bisi sedia
magang, timpuh digaga tumu agi agi, kira chukup hari maya tuak
udah mansau, kira-kira dua tiga minggu udah nya. Taja pia, orang
ti jadi bebini suah agi maya nulan mansang. Jarang mega orang
milih maya bulan kelelang; iya nya Bula Empat tauka Bulan Lima,
kenu ku orang tuai kelia.

Udah tawas hari, badu makai pagi, bala sida ke nanya indu
pan pulai magang enggau ati gaga laban sida mujur sereta bulih
indu ke bini anak sida. Lebuh datai di rumah diri empu, orang
mayuh pan ngulu sida nanya ke penunga pejalai sida. Sida ke
empu anak ti ditanyaka sida indu enggau ati gaga nusi semua rita
sida lalu mega madahka timpuh ngagai orang mayuh maya ti
nurun ngambi indu awakka semua ngadang ngeringka pengerami
nya. Kaban belayan sida ari rumah panjai bukai ti jauh agi pan
semua dipadah tauka kirumka temuku tali tauka pesan. Semua
rumah panjai ti kena padah endang udah dikeaumka orang lebuh
malam ke nanya indu nya.

BEGAGA PENGANAN

Rumah ke semak rumah indu dipadahka sida apai indai indu, lalu
sama enggau nganti pengabang. Semua rumah panjai ke
dipadahka lelaki sama enggau bala pengabang kena ambahka
orang empu rumah ke pun pengawa nya. Empat lima hari apin ke
nurun orang ke indu betutukka tepung lalu begaga penganan,
sarang semut ke dibai sida ngambi indu ila. Rumah indu nya
anang disebut agi laban endang pun, ukai semina sida ke empu
kereja aja, tang semua sida serumah patut beri bantu, lebih agi
enti pengawa besai lalu orang mayuh dipadahka ngulu pengerami
nya. (Alli Majang 1972)

Bansa Iban ti udah megai agama Kristian, bisi chara sida empu
ngatur adat jadi melai bini nitihkka ajar gerija sida empu. Nena
undang-undang Perintah Menua Sarawak / Malaysia nya
sebengkah ari jalai ke baru maya hari diatu. Enti orang ke salah
nadai utai kena betimbang, sida tau kena tinggang ukum jil nitihka
undang-undang sivil. Nya mih, naka ulih mih kita Iban ngetanka
lalu nagang adat pemali beleman / jadi melaki- bini ti salah serak
/ peturun, laban pemali tu ukai semina ditagang ba agama Adat
Iban aja tang endang ditagang semua pengarap / agama di dunya
tu. Reti nya beleman tauka jadi mali melaki- -bini mega endang
ditagang Petara / Bunsu Petara ba mensia dunya.

(Betampung ba Tusun Ke-58)

Nya mih atur / adat jadi mali nitihka pengarap / agama Adat Iban.
Terima kasih ke gambar ti dikirumka kita ngagai aku ke guna
dalam Sada Sarawak tu. Engka nyema bala pemacha bisi utai
tanya, tujuka ngagai whatsApp tu: 013 8325146.

Oleh Henry Usup Umbar