Bejaku kena nangkan, ngelalau pengabang

MAYA bisi begawai tauka begulu bala mayuh, endang bisi orang bebiau manuk minta berekat ari Petara lalu bisi mega orang begeliga kekadang dikangau jalai moden tu ‘belicha meri jaku ajar, jaku tangkan kena ngelikunka agi pengawa gawai tauka gulu nya.

KITA bansa Iban endang amat mayuh pengelandik dibantai maya bebala mayuh lebih agi maya begawai.

Siti main asal nya geliga.Begeliga tu siti ari bansa pengawa dipejalaika maya begawai, kelebih agi baka Gawai Burung, Gawai Kenyalang,Gawai Tajau sereta gawai bukai.

Nyadi ba Gawai Antu,bisi ga begeliga, tang malam nyadi gawai nya pengawa begeliga tu diketu enti bala lemambang udah pansut nimang jalung, nitih pengingat aku empu laban ti mina bisi kurang lebih sepuluh buah rumah panjai kala enggau orang ngabang Gawai Antu ka tambah Gawai Antu ba rumah kami empu dalam taun 1973 menya, maya tudah pangan baru angkat bujang.

JAKU GELIGA

Dalam mansutka jaku geliga, dia deh siku tuai ti landik bejaku deka diasuh orang empu pengawa gawai nya ngepunka jaku geliga.

Kebendar iya geliga ku baka reti kena ngerah sereta nangkan mensia mayuh ngena jaku ajar.

Tuju iya kena nangkan sida enggaika kelalu jelarjelar enda nemu bebasaka orang empu rumah, orang empu bilik ti begawai nya.Bala pengabang mayuh dilalau awakka ngemeranka ulah ti manah sekumbang sida ti ngabang ba rumah panjai orang nya.

Sida dipinta masa orang empu bilik penaik, orang empu rumah sereta ditagang tama sebarang ngagai bilik orang ti nadai diberi kemendar orang empu bilik. Bala pengabang mega dilalau enggaika kelalu enda beradat ba mua mensia mayuh, enda diasuh kelalu jegak-jegak mantaika penemu enggau pengelandik enti ukai ari asuh enggau ari pinta orang empu bilik enggau bala orang serumah nya.

MAI ULAH BEBASA

Mensia mayuh, nyengkaum bala orang empu rumah enggau empu bilik mega dilalau awakka sama bebasa pangan diri ari ulah enggau ari jaku.

kebuah pia, enggaika bisi kelanjur jaku ti tau ngujungka ati pangan diri ensiban, lalu tu mega tau ngujungka laya ti ngachau pengelikun gawai nya.

Bala pengabang enggau orang empu rumah mega dilalau ngena jaku geliga nya enggaika besengki penemu enggau runding ti mega tau ngeregau pengelikun gawai nya.

Dalam jaku geliga iya,lemambang ti diasuh begeliga deka mega muji pemanah anti enggau tumi orang empu rumah baka pemayuh pemakai enggau utai irup baka tuak, baka arak ti dibantai kena meri pengabang makai enggau ngirup.

Taja pia, ku tukang geliga nya, pengabang dipinta nagang diri empu ari ngirup enggau makai.

Kebuah pia, sida meseti bebasaka diri empu, enda tau ngayan pengamu enggau pengerangka makai enggau ngirup.

Ka tambah mega enti kelalu kenyang sereta kelalu mayuh irup, iya tau pulai ngagai pemedis diri empu,kelebih agi enti kelalu mayuh irup tau mega ngujungka diri mabuk sereta tau mega ngujungka sida enda menyana pengawa dikereja.Tu mega tau ngujungka laya ti ngachau pengelikun ba endur nya.

MANSUT JAKU TANGKAN

Kena meri tesau ngagai mensia mayuh tukang geliga deka mansutka jaku puji, ajar enggau tangkan dalam geliga iya, orang siku deka dulu nerantang setawak enggau genteran panjai – tang ukai ngena jalai terantang begau – kena narit perati mensia mayuh ba gawai nya.

Kelia tukang geliga deka merak mimit ba jaku geliga ngichaka terang didinga,tang diatu orang begeliga nya ulih ngena rengka kena nginggarka jaku (microphone).

Orang ti nyadi tukang geliga nya tau milih bejalai niti rumah ba pala bala orang ti ngalu petara tauka bediri ba ruai orang ti pun gawai lalu nibarka jaku ari nya. Diatu nyamai bendar laban ulih ngena rengka nginggarka jaku ti ulih didinga semua orang serumah nya.

Kena iya ngepunka geliga iya ba siti pengawa gawai, dia lemambang deka mansutka jaku bakatu: “Nyadi aku tu bakanya ga, tak kesal meh di jungkal kandang dada, nyau sekut aku dikambut perut raya. Laban tak lebih-lebih, luba-luba,chuak-chuak, chua-chua,lejah-lejah nujah kelasah tikai bembai ampar sana, ensara ka mua kita kebetunga duduk semuka.

Baka ke nadai lempedu enda nemu malu di mua seribu tugung bala, baka ke beli enda nemu nabi nadai basa.

Tang kebuah pia, laban endang udah dipadahka sida ke bempu rumah, ngagapengawa pun kereja,dasuh jayah sida ke madahja jaku gerah mansutka jaku geliga, nuju kita semua, ngarika sida ke bempu pengawa ngintu Gawai Dayak.

JAKU GELIGA

“Nya alai enti tikai bisi tekusai rubik tisi, anang lalu ngelegensai ngedarka jari nanya ka peneka. Enti gelegar bisi tesiar kena ansar tapa kaki, anang lalu entuar bejaku nyida.

Enti manuk bisi bepantuk ngelaban serati, genggamka umpan taburka ampa. Enti bimbi bisi bepangki nglaban babi, lumpungka mulung pepatka empasa.

En t i bujang duduk betentang enggau orang ke bisi laki, tauka indu dara bisi besapa enggau sida ke bisi bini, anang lalu ngelingkang nekanka pangan butang besangka ngapa,gasan kita nyimpan nyadi dendam pulai ka laya.

Kebuah pia, laban s e h a r itu endang hari besai maya gawai, maya kitai begulai duduk berimbai,maya kitai betunga maya betanya, maya richah maya bungah,maya bebuti maya betundi.

“Kitai ke ngabang, kitai ke ninang tu, baka nya ga, enda datai lamus enda datai empurus, enda datai tubuh sebatang, enda bejalai puang tang datai ngena perengka, ngena tengkira, chukup ngepan bemacham pekayan.

Tanchut mayuh sebaka, baju sama kemija, kain sebaka puncha.
Ngena tumpa, ngena bala, ngena marik, ngena gelik, ngena kerusang ngena gelang, ngena sagin ngena antin, ngena rawai,ngena rinyai.

E n t i kita t e t e muka kelambi di jalai pendai,utai berayan di tengah laman, anang ngambi lalu deka menggi, anang naban lalu deka nyimpan.

Anang manjung ngumbai diri untung,anang gaga madahka diri bisi laba.

“Enti kita nemu utai tekusai sebelah ruai anang ngelalai, utai engketik sebelah bilik anang mutik,enti tetemuka jam ka peduman, tetemuka duit tetemuka ringgit, tetemuka sagin tetemuka antin,anang sekali-kali napuk utai nya, tang anjung ngagai komiti gawai,awakka sida ngiga orang bempu utai nya.

“Nyadi orang ke lelaki,enda sekali-kali tau tama ka bilik enti nadai kemendar ari orang ti bempu bilik.

Orang ke ngachau indu berapi di dapur, tauka nundi indu di bilik deka kena ukum 50 ringgit.

Orang ke dulu datai jari datai kaki, dulu nanjak dulu mungkal, deka kena ukum komiti gawai seratus ringgit. Enti sida mabuk ngerusak utai, tauka mechahka mangkuk, sida deka dipinta semua ungkus utai ke rusak. Nya alai enti kita meda diri sebala bisi engkasak lebuh mabuk, pasung enggau iya, enggaika ngerusak utai orang lalu ngujungka gawai tepagang, gawai melintang.

Sehari tu enggau malam tu lagi atur komiti gawai enda tau enda dititihka kitai enggau terit, laban enti pengabang nyau pulai, sida nadai agi kuasa agi atas pengabang mayuh.

“Enti kita bisi ngembuan sunti, anang kita mai niki ngagai penyerang rumah lelenggai kami ditu,tang dulu anjung ngagai menyauh Tuchung Bukit Sepali, ngambika engkuli rebah jelepi mai teduduk,tikam ke ai ka tau meh sunti nya ngambika munuh reni baya nyubuk.

Enti kita bisi ngembuan penungkam gayung dalam,anang kita nandangka ngabang ngagai penyerang rumah nyeruran kami ditu,tang tempalung ka ngagai bukit guram, ngambika jugam lesi bebadi laya danjan, nadai agi nyengkuran ngerumbak sampuk.

“Peregam bisu anang kita mai ngabang ngagai penyarang rumah merundu kami ditu, tang tandangka ngagai gelenggang Batang Kantu, ngambika kayu di gelenggang Batang Kantu abis punggu pumpung puchuk.

GELIGA MINTA PEMUJUR

A m b a l m a t i b a k a -nya mega, enti kita bisi ngembuan, anang mai iya ngabang ngagai peretang rumah lelanji kami ditu, enggaika kitai parai pengandai tangka beridi,mati babi punas uduk lus manuk.

Pemerani anang nusi, dengah anang madah,pemandai enda ibuh dibantai,pengeraja anang nyerita, enggaika pulaika laya, ke salah dalam geliga gawai tu.

Geliga tu minta gawai alus, gawai lurus, nadai melintang nadai tepagang, awakka pengabang bejaku siru beati rindu, duduk bebandung sama segempung, sama makai sama segulai, sama ngirup sama berakup, awakka lepas gawai tu ila,semua kitai ke ninga jaku geliga tu enggauaku empu,sama betuah sama belimpah, sama gerai sama nyamai, sama gayu sama guru lalu diau lantang senang, sama mansang nguan menua.

“Nya alai baka nya meh munyi jaku geliga orang ke empu gawai tu asuh ditampung aku ngena awak tu,” pia ku lemambang ngujungka geliga iya ba gawai nya.

Udah tembu begeliga, pengawa bukai bagawai nya lalu ditampung magang nitihka ripih ti patut.

Oleh TELESA EMPERAN