Agama Adat Iban dalam Politiesme • Adat belaki bebini nitihka agama Adat Iban

PEMERINDANG… Kuntau endang sebengkah ari main asal Iban ti dibantai maya rami melah pinang, tang diatu makin lenyau ditelan ‘tanda moden’ bansa bukai.

SEHARI apin nurun ngambi indu, semua kaban belayan lelaki ari rumah tauka menua bukai datai di rumah lelaki.

Lebuh sida datai, sida nyuaka tulung baka arak tauka duit ngagai apai indai lelaki, Malam ke deka nurun dia apai indai lelaki ngempuruka orang mayuh serumah nya berundingka atur pengawa nya dulu, baka ngatur sapa ke dipaduka bejaku enggau utai bukai mega.

Badu berandau lalu ditampung pengerami bukai semalam-malam nya, baka ngirup, ngajat, beramban, berenung enggau main bukai naka peneka ati.

BUNGAH ENGGAU PANGAN DIRI

Nyau dinihari dia orang ke biak indu enggau lelaki nurun ngelulun asi pulutka bekal bala enggauka dibai ngagai rumah indu mega.

Lebuh ngelulun asi dia sida ke bujang enggau sida ke dara tepantup bendar ati bungah enggau pangan diri.Sida ke indu nyimpan beras ke dalam ruas lalu sida ka lelaki menyadi ka api lalu ngelulun asi.

Udah mansau, sida pulai jampat enggai ke enda sempat endur nyikap ngepan diri alai nurun. Hari pan nyau tawas mega lebuh maya sida badu.

Udah semua orang badu makai pagi, semua orang ke enggau lalu beradu magang,sereta gendang pan ditebah kena ngelagu orang ke beradu.

Biak tuai, mit besai semua nyikap ngepan diri empu. Ngepan ke naka pemanah, duku ngepan diri empu ditangkin, lalu semua ke bisi nyan senapang diri empu.

Enti merau orang ke indu bengepan Iban dipasukka di rumah, tang enti bedarat enda dipasuk nganti datai semak rumah indu. Perau ke alai bala indu dikajang enggau pua kumbu sereta dilagu enggau menira enggau utai bukai, lalu dia mega alai sida ke begendang.

Tang ditu aku deka nusui pengerami ngambi indu bedarat kira ke pengumbas iya penyauh.

Lebuh semua orang udah sedia magang, nya baru tuai kayau begerah bebai nurun.

Tuai kayau nya, apai indai lelaki ke empu bini deka diambi.

Laban pengawa ngambi indu disema ka ngagai ngayau. Sida ke biak begendang bejalai niti rumah kena ngansak orang ke beradu lalu meransang barang sida ke lembau nurun awak deka. Udah tuai kayau begerah setak-kasetak iya lalu nurun ngenuluka bala nyan menira sereta nangkin pedang tauka malat barang ti kebisi iya.

Udah nya lalu ditangkanka orang bukai enggau sida ke begendang. Orang ke begendang endang selalu ba tengah-tengah bala. Barang sapa sida ke nebah gendang nyau lelak iya minta silih pangan bukai lalu semanjai jalai sida besilih-silih.

Kebuah begendang ke besai agi, ukai semina ke pengerami aja, tang enggai ke ninga burung jai, tambah mega, awakka antu babas antu keranggas mindah,nyeliah ninga gendang. Enti menua numbas penyauh kira pejalai clua tiga jam,datai kira tengan jalai ba endur ke bisi ai sereta manah alai ngetu, dia tuai kayau mai bala iya ngetu merarau.

Utai kena merarau asi pulut ti endang udah dilulun pagi nya enggau lauk babi,manuk tauka utai bukai.Tang chapak mangkuk endang nadai kala mai kengka ke udah dipeda aku. Nya alai daun kena nyadung pemakai. Enti menua jauh kira ka pejalai sehari suah agi ngetu lalu merarau bechuanka matahari maya tengah hari.

Tuai kayau tau enda ibuh meri bala merarau enti menua semak disebutka nadai penyauh. Udah bala badu makai lain mupuk baru bejalai sereta enggau gendang nyentukka datai.

BERADU MASUKKA NGEPAN

Lebuh bala datai semak rumah, di pengkalan tauka ba sebarang ai ke tunga ngagai jalai penatai, sida lalu ngetu mandi enggau belelak.

Badu mandi lalu beradu masukka ngepan manah,lalu sida ke bengepan Iban lama agi nganti tembu, lebih agi lubah orang ke indu, laban mayuh agi macham ngepan.

Ukai main pengerindu enggau pengeransing ati lebuh tu laban gendang enggau pengerami orang ke di rumah nyau udah didinga lebih agi baka sida ka bujang enggau ke dara ngemata ke pangan diri beradu.

Lebuh maya ngetu enggau beradu pengari orang ke empu rumah datai ngalu pengabang ngagai endor ke beradu mai manuk, piring, menira enggau gendang.

Dia mega sida ngasuh sebarang sida ke tuai miring kena ninggalka burung enggau semua utai ke jai awakka enda datai ka rumah. Udah semua orang badu beradu, pengari ke ari rumah lalu angkat bejalai ngenulu ka bala lalu ditangkan ka tuai kayau, udah nya betangkan-tangkan tuai agi dulu agi, pupus lelaki ditangkan ka bala indu.

Orang ke begendang ba tengah-tengah bala, nadai ngetu begendang nimbal enggi orang dalam rumah. Singkang pejalai belubahlubah nitihka gendang lalu orang ke bengepan indu enggau lelaki ngelingut ka pejalai diri mandangka pemanah gamal. Semua ma enggau utai bukai diangkut orang ke empu rumah ke rumah.

NGELALUKA PENGABANG NIKI

Lebuh bala pengabang datai di tengah laman,orang ke empu rumah lalu nimbakka bedil, senapang enggau merechun. Lalu pia mega bala ke datai ngalah,semua ke mai senapang ditimbakka magang nujuka langit nimbal enggi orang ke empu rumah.

Enti bedil mayuh, munyika runtuh langit. Aku empu udah meda lebih dua puluh batang bedil besai enggau mit dipasang enggau senapang ukai ke empat lima puluh batang. Aku enda nemu kebuah bukai alai betimbakka bedil enggau senapang lebuh rami melah pinang lebih agi ari ngerinduka ati. Dipelaba aku aja nyangka laban rami melah pinang dikelulu enggau disemaka baka ngayau.

Di kaki tangga di pelintangka babi, lalu digayang kena pengabang niki enggau bedil sebatang dipelintangka di pala tangga. Lain di pala tangga mega di engkahka dulang ke bisi ai enggau batu perunsut.

Semua pengabang ke niki nyepuhka kaki sida magang ke dalam dulang nya lebuh sida nyingkang ari pala tangga. Ba penama nya, orang ke empu rumah miau pala pengabang enggau manuk kena masa sida, tang enda mega tiap iku pengabang dibiau.

Ari kaki tangga nyentukka pala tangga, ari punggang setak dikajang enggau pua kumbu lain semua pengabang ngensuruk nya semanjai ruai rumah nya.

Baka nya mega pantar diredai pua kumbu semanjai rumah enti pengabang
mayuh, lalu penyandih mega diredai pua kumbu ka alai pengabang nyandih.

Enti enda chukup pua sengapus rumah bulung ka semina pantar orang ke empu pengawa enggau sepintu dua ke ngapit ruai nya.

Pengabang diwung enggau arak enggau tuak lebuh sida dipejalaika orang empu rumah niti ruai dataika dua tiga iku indu enggau lelaki sereta nyuaka changkir arak tauka tuak ngagai siku. Lain semanjai-manjai rumah nya dua tiga ba sepintu orang ke nyua ka changkir tuak enggau arak.

Kadang-kadang mega bisi telaga di tengah rumah, reti nya pasu tauka tajau alai tuak enda tau enda di irup pengabang enggau takar mangkuk ke besai.

DIKELALU ENGGAU AJAT

Lebuh ti ngelaluka pengabang enda tentu ulih nyeliah ngirup dataika mutah,nya ngamahka dinding enggau tempuan. Tang nya endang adat dikerinduka orang empu rumah. Enti rumah orang nya panjai nyau berasai ngelu pala ngirup baru rumah apus. Ukai mudah-mudah pengerichah enggau pengerami lebuh maya pengabang baru niki, ngenjing nadai didinga utai kiba kanan laban pengerichah enggau umba munyi ngepan orang ke indu.

Udah apus ruai, nya baru badu nguwung pengabang, tang agi pengabang dipejalaika niti panggau rumah abis kurang tiga kali besundang, dikenuluka enggau gendang sereta bisi orang ngajat tauka mencha kena ngelagu pejalai sida.

Kebuah alai ngasuh pengabang bejalai besundang niti rumah kena masa sida, agi mega enggai ka sida lebu ngena ngepan ngena utai manah awakka semua orang meda pemanah sida ngena ngepan. Udah chukup sundang niti rumah nya baru orang ke empu rumah lalu nudukka semua pengabang berengkah ari pantar orang ke empu pengawa ngagai enggi orang bukai datai ba penyukup iya alai semua pengabang.

Orang ke tuai enggau orang ke belambar agi duduk ba pantar orang ke pun kereja lalu biak agi ngejang agi ga ari ruai nya, endang nitih ka ripih adat basa. Lalu bala pengabang indu semua tama bilik indu ke diambi mega. Di bilik din pan baka gaya di ruai diredaika pua kumbu enggau mayuh macham utai bukai kena ngelagu bilik baka bungai keretas.

Lelaki ngaduka lelaki di ruai lalu indu empu rumah nya ngaduka semua pengabang indu di bilik.

Tang semina indu ke diambi nadai di bilik nya laban endang adat iya belalai sebelah bilik orang bukai ti ngejang ari nya lebuh maya pengabang ke ngambi iya baru datai.

PENGAWA BEDARA

Udah semua pengabang terenah duduk nya baru orang ke empu rumah ngasuh sida pengabang ke tuai agi bedara. Lepas nya baru rneri ai basu kaki tauka ai aus, ukai ai amat tang tuak tauka arak.

Udah pupus semua pengabang diberi ngirup ai aus,nya baru orang empu rumah betanggungka utai ari bilik, semua macham utai di empa maya begawai mega,baka penganan, penyaran pulut letup enggau lauk
babi, manuk, chapi tauka kerebau nitih ka pemisi utai.

Semua utai nya disedia dalam chapak dalam mangkuk atas tabak, atas talam.

Naka ulih orang ke empu rumah ngaduka semua utai nya di mua pengabang, bisi nanggung ari bilik, lain bisi mega ngatur di ruai. Dia pengabang endang udah sedia duduk berintai nganti orang ke empu rumah
tembu ngaduka pemakai di tengah ruai.

Benda rumbang tuak endang udah sedia ditanchang ngelingi tiang ruai dikelingi mangkuk tauka jalung takar, bisi besai, bisi mit. Lalu dia bisi jalung siti ke besai bendar kira umbas nangkup pala pemesai mua iya, lalu nya dikumbai indu jalung.

Bisi mega empat lima iti jalung ke mit agi ngelingi iya, lalu nya dikumbai anak jalung, Orang ke tuai enggau orang ke tebilang agi enda tau enda ngirup indu sereta enggau anak jalung nya nitihka pematut ungkup iya. Orang ke diasuh megai takar endang orang ke teleba sereta berekat laban tuak lubah abis dipegai iya,kenu ku orang. Udah nya baru orang ke empu rumah nyambut pengabang nanyaka burung sida ngena jaku karung panjai tauka jaku pandak.

Bansa Iban ti udah megai agama Kristian, bisi chara sida empu ngatur adat jadi melaki bini nitihkka ajar gerija sida empu. Ngena undang-undang Perintah Menua Sarawak / Malaysia nya sebengkah ari jalai ke baru maya hari diatu. Enti orang ke salah nadai utai kena betimbang, sida tau kena tinggang ukum jil nitihka undang-undang sivil.

Nya mih, naka ulih mih kita Iban ngetanka lalu nagang adat pemali beleman /jadi melaki bini ti salah serak/ peturun, laban pemali tu ukai semina ditagang ba agama Adat Iban aja tang endang ditagang semua pengarap / agama di dunya tu. Reti nya beleman tauka jadi mali melaki bini mega endang ditagang Petara /Bunsu Petara ba mensia dunya.

(Betampung ba Tusun Ke-59) Nya mih atur / adat jadi mali nitihka pengarap / agama Adat Iban. Terima kasih ke gambar ti dikirumka kita ngagai aku ke guna dalam Sada Sarawak tu. Engka nyema bala pemacha bisi utai tanya, tujuka ngagai whatsApp tu: 0138325146.

Oleh HARRY USUP UMBAR