PETARA, ANTU! • Kuasa Mistik Antu

NGAGA KAUL… Sekeda mensia nguna mayuh macham perengka minta bantu Antu

Tusun Ke-36

BEPELASARKA  penemu litericha, agama Monoteismse, Politeisme, Panteisme, AnimismeenggauSains Spiritual (Spiritual Science), kuasadunyamistiktauka ‘alamghaib’  dibagi ngagai tiga raban iyanya: i. Kuasa mistikPetara (God, Almighty, Tuhan, Allah Taala)  ii. Kuasa mistikAntu (Dewa Dewiiii. Kuasa mistikAntu [Sitan, Jin, Iblis, Sihir, enggautibukai].

Ba Tusun Ke-20 tua kumai pemacha agi nampung pansik pasal Kuasa Mistik Antu. Ari tusun kedulu-dulu suba aku arap kapemachau dah nemu sereta mereti pasal kuasa mistik Antu: Sitan, Jin, Iblis.

Kuasa tu endang bekaul rapit enggau sida raban Beliau, Bomoh, Dukun, enggau ti bukai].

.Sekeda penemu agama madah, Antu ukai ari raban malaikat taja sida nya idup begulai enggau malaikat. Taja pia, sida mega  ngembuan kuasa mistik baka Melikat.  Nya mih kebuah, ukai semua sida tu Antu tu jai.  Antu ulih mali dirinya di Antu jai tauka Antu manah. Sida ulih mali dirinya dimensia dunya. Kekadang sida ulih mali dirinya di Antu Bunsu Petara lalu ngambu diri Orang Panggau & Gelong. Uji perati kati bak cherita ti nyelai tu, tang amai nyadi.

Kenu ku Janie, sebedau datai ba kebun getah sida di ulu Sungai Ranan iya betemu enggau orang lelaki ti beumur kira-kira empat puluh taun. Lelaki nya sigat sereta kering amai. Iya ngena ngepan lelaki bansa Iban. Maya nya mega Janie ngasaika diri rembus di menua bukai. 

BUNSU KIJANG

Ukai di ulu Sungai Ranan menua nya gaya peda iya. Maya nya Janie enggau lelaki nya bejalai begembar-gembar ngulu sebatang entigis sungai. Ai sungai nya chiru amai. Ikan gemian ti dalam sungai nya terang amai dipeda. Mayuh amai ikan. Semua bansa jelu baka kijang, pelanduk, babi, rusa enggau ti bukai nyau betegaring tinduk sebelah tanah. Sekeda benung makai daun puda, sekeda benung bejalai lubah-lubah sebelah padang rumput.

          “Apoo…manah amat menua kita ditu, wai!  Kati nama menua kita tu, dih?” pia ku Janie.

          “Tu menua menua aku wai. Enda jauh ari menua kita di Ulu Ranan din. Ditu mih menua kami Bunsu Kijang. Aku tu mih benama Keling Temuda,” pia ku saut lelaki nya.

         “Auuu…pia..! Nadai kala ninga rita pasal menua kita tu,” ku Janie seraya ke gining-gining malik kiba kanan meda pemanah rampa menua nya. Seduai bejalai belubah-lubah sambil berandu. Maya seduai ke bejalai nya Janie bisi ninga nyawa nyawa bala uchu iya nya ngangauka iya tang lebuh ti deka nyaut mulut iya enggai nyadi engkebut.

REMBUS DI MENUA ANTU

           “Kapa dek kiruhka kangau sida nya, unggal. Aram pajakka  pejalai tua,”   pia ku Keling Temuda. Ninga munyi nya Janie mega enda tentu ibuhka kangau bala uchu sereta sida serumah nya. “Anang irau dek, unggal wai. Enda aku medis dek. Aku mai dek kitu ukai sengapa pia aja. Aku berani mai dek ngusung menua kami awakka dek ulih bekala enggau raban bansa kami Bunsu Kijang.”  Ninga munyi nya Janie baru nemu diri udah rembus di menua Antu. Tekala nya mega iya bisi irau ati mimit tang nyau kelama-lama ti udah berandau enggau Keling Temuda, ati nya nyau rindu-serindu meda menua nya. Teperindang asai ati iya. Taja agi alit ati tang iya nyau enda takut laban tempara lelaki nya tadi nyau manah-semanah. Kelama agi manah agi ga menua orang nya peda Janie.

           “Apuu…, jinak amai bala jelu nya, unggal wai. Uji bunuh ambi bisi ke lauk tua lagi,” pia ku Janie.

          “Eh… kapa nuan jelu nya. Nya endang jelu ti sama pendiau enggau kami di menua tu. Mayuh lauk kitai di rumah lagi,” ku Keling Temuda. Enda lama udah nya Janie ngasaika diri udah datai ba tengah laman sebuah rumah panjai.

           “Endai, sigi diau ba rumah panjai baka kami mensia ga kita nih, unggal wai.”

            “Au. Ditu mih endur kami diau mendam. Peda dek bala sida ke indu-indu nyin udah sedia nganti penatai dek. Taja pia dek anang tama bilik orang sengapa lagi. Ba ruai ti endur aku duduk lagi, nya mih bilik kami endur dek tama lagi,” pia ku timbal Keling Temuda. Janie nitih aja utai ku lelaki nya.

           Lebuh Janie udah terendah duduk di bilik sida Keling Temuda, mayuh mih utai tanya sida ke indu-indu ba Janie. Kekadang iya enda tentu nemu nyaut laban iya pan enda tentu nemu kebuah diri tau rembus ba menua ti nyelai nya. Gamal orang ti dipeda iya dalam rumah nya endang sama enggau gamal mensia di dunya tu. Sida ke indu-indu ti nunga iya nyau bebajik gamal.

MAKAI SERUMPU

Maya ti makai lemai nya sida Keling Temuda sebilik begempuru magang. Sida makai sambil berandau.

              “Makai wai, makai. Anang malu-malu. Nadai tentu engkayu kami lemai tu wai,” pia ku bala menyadi indu Keling Temuda. 

              “Pia mih wai. Nama penadai tu dih…! Di menua kami din enda kala aku meda lauk ngemayuh tu,” pia ku timbal Janie. Amai ga nyau nadai ke nadai semua bansa dagin jelu enggau ikan. Kasam. Salai. Pansuh. Lepis. Bansa sayur babas baka kemiding, daun sabung, daun mendai, upa, sepeneka nyingkau.

BAKA INDU DARA BUNGAS

           Udah makai lemai nya sida ke indu ari bilik bukai mayuh ga nunga tudah Janie. Teperindang amai asai ati iya. Sida berandau seraya ketawa sentai landai maya tekenangka cherita lama.

           Pagi siti Keling Temuda mai Janie bejalai ke kampung. Kampung di menua nya tawas amai. Datai ba pun kara sekayu Keling Temuda ngasuh Janie meratika pemanah pun kayu nya.

          “Peda nuan, unggal wai pemanah kubu nya. Enti nuan deka diambi aku ke bini alai mih nuan niki ke atas kin. Pulai ari atas nyin lagi nuan deka nikal biak baru baka indu dara bungas baka dulu suba,” pia ku Keling Temuda.

          “Endai. Nya mih kebuah nuan mai aku ke menua kita kitu pia?” ku Janie.

          “ Pia mih nya, unggal wai. Enti enda pia kapa aku kiruh muai jam, muai hari mai nuan kitu. Lama aku udah meratika dek maya deka nangkal getah kita dia, unggal. Baka ukui ke nengkadah linau belama ga aku meda dek. Asai ke meda buah sibau mansau…tang rapas penyuluk, jari aku enda datai. Nya alai diatu kira ke udah ba dan sibau mih aku tu, unggal wai.”

           “Pia iya? Apoo… nih. Ukai enggai aku wai. Ati aku asai ati nuan mih. Tang aku nyau ingatka bala anak, bala uchu aku di menua kami din ti meruan ngiga aku. Dinga deka sada nyawa sida besampi. Dek pan kala meda sida kitu bebala mayuh datai ke menua kita ditu ngiga aku. Nya alai anjung pulai mih aku wai,” pia ku saut Janie. Ninga munyi nya Keling Temuda pan nyau tebantai ati sinu lalu berunding deka nganjung Janie pulai ke menua sida empu.

           “Enti jaku nuan munyi nya, nadai ku enggau mih, unggal wai. Dek ga enggai jadi enggau aku, enda ga aku mejal dek, unggal wai. Tambah mega nyau sinu ga aku ninga leka sampi bala anak, bala uchu ambu dek nya. Nya alai diatu uji pedamka mata deka enda lama,” pia ku Keling temuda. Tekala nya Janie pan mejamka mata iya lalu asai ke tinduk bemimpi terengkah ba tebing Sungai Penyulau. Lebuh iya menchelakka mata diri baru, iya pan amai-amai bediri ba tebing Sungai Penyulau. Ukai ba kebun getah sida di ulu Sungai Ranan. Enda lama udah nya iya pan betemu enggau apai tuai China ti meri iya makai hari nya lalu nganjung iya pulai ke rumah panjai sida di Ulu Sungai Ranan.

Nya alai, arapka semua kitai mensia ulih ngelala  tiga  bengkah dunya misteri.  Tentu kitai Iban sama  kala ninga tauka meda  kitai Iban bebiau tauka besampi minta tulung Orang Panggau eggau Gelong  mayabisi penanggul kaul enggau raban Antu. Raban Antu Bunsu Petara tu mega suah charut enggau raban Antu lalu beambu munsuh. Minggu dudi nyin ila aku nguji mai kita mansik pasal kaul  Orang Panggau Libau & Gelong enggau Antu jai.

Nya alai,  sekali agi ku madah, tuju aku mai kita macha tauka mansik pasal dunya misteri tauka mensia mistik,  ukai aku deka mai kita nyembah ANTU tauka ANTU tang tetap nyembah Petara (God Almighty, Tuhan Allah Taala)  taja kitai ngena chara ti bebida.

 Oleh HARRY USUP UMBAR