KPT enda ngelanjaraka sesyen ngambi studen baru

MENTERI Pelajar Tinggi Datuk Dr Noraini Ahmad (tengah) nyuaka pemeri ngagai Rektor UiTM Pampang Johor Prof Dr Ismail Ahmad maya Pengerami Ngelancharaka UiTM Prihatin di Dewan Agung Tuanku Canselor, UiTM kemari. Sama bisi dipeda Penulung Sapit Chanselor UiTM Prof Emeritus Datuk Dr Mohd Azraai Kassim (kiba).

SHAH ALAM: Opis Menteri Pelajar Tinggi  (KPT) nadai perambu deka ngelanjaraka sesyen pelajar universiti perintah ba institut pelajar tinggi ba serata menua ketegal penyampau kes positif Covid-19 ba maya ke diatu dipeda betambah.

Menteri ops nya Datuk Dr Noraini Ahmad madahka, kebuah baka nya laban KPT udah nyediaka prosedur operasyen standard (SOP) enggau atur ke patut dititihka genap universiti enggau kolej perintah ba serata menua dikena nagang penyakit nya ari berampit.

“Kami udah bisi SOP enggau atur nerima studen baru sesyen taun tu lalu ngarapka semua orang patut nitihka SOP nya.

“Ba Sabah mega kami deka neruska pengawa ngambi pelajar baka ke udah ditetapka laban ukai semua endur nyadi kategori kandang merah.

Universiti Malaysia Sabah (UMS) ba Kota Kinabalu sereta ukai ba kandang merah.
“Taja pia, KPT seruran berunding enggau Ops Menteri Pengerai Malaysia (KKM) sereta nitihka semua atur baka ke udah ditetapka KKM,” ku iya madah ngagai pengarang berita pengudah ngelancharka Program ‘UiTM Prihatin’ kemari.

Iya mansutka jaku munyi nya lebuh diasuh meri komen sekalika KPT deka ngelanjaraka pengawa ngerijista studen sesyen pelajat taun tu ketegal kes Covid-19 ke nyau majak betambah lebih agi ba Sabah.

Sama bisi enggau maya pengerami nya Sapit Penulung Chanselor Universiti Teknologi Mara (UiTM) Prof Emeritus Datuk Dr Mohd Azraai Kassim.

Dulu ari nya lebuh iya bejaku maya pengerami nya iya madahka, mayuh bengkah program udah diatur perintah dikena meri peluang ke sebaka ngagai rayat dikena nyambung pelajar.

Nyadika chunto ku iya, institusyen ke ngemeranka pelajar tinggi Bumiputra nya udah mantu ngemaju sereta nulung ngemansangka sosioekonomi mensia mayauh lebih agi ngagai sida ke kurang pemisi (B40) ba serata menua.

Lebuh bejaku maya pengerami nya Mohd Azraai madahka, Program UiTM Prihatin siti ari mayuh bengkah pejalai ke diatur ba serata menua dikena mantu nambahka akses pelajar tinggi ngagai semua studen lebih agi ari ruang bilik B40.

Ku iya, program nya ke sebedau tu dikumbai ‘Ngubah Destinasyen Anaka Bansa’ ba taun 2010 udah meri penguntung ngagai urung 43,00 iku studen kurang pemisi.