Agama Adat Iban dalam Politiesme • Adat belaki bebini nitihka Adat Iban

RAMI BETABUH…Perengka tabuh jeman kelia enggau diatu ti dikena Iban beperindang maya rami melah pinang.

Tusun Ke-60

UDAH tembu genselan, chapuh, munyi burung ke makai buah kara bala pengabang belabuh makai utai ti nyamai-nyamai ke lama udah ayan di mua sida. Nyau ujung makai utai, nya baru orang berengkah ngirup takar ai bisa. Orang ke empu rumah matak pengabang, udah siku-siku ga nitihka penuai umur ngagai endur ke ngirup ai tuak, arak. Sida ke indu ngirup ngena jalung tauka mangkuk besai. 

Naka-naka pengerami lebuhmaya ngirup ai takar ti kena niki, tikai dikelanitka awakka bisi alai orang mutah, enti udah kelalu mayuh irup. Orang ke tuai ditulung bala anak, bala menantu iya ti bediri ari belakang iya, sedia deka nyaup iya ngirup. Enti orang mayuh menantu enggau anak suah tak baru ditumpilka mulut iya ngagai mangkuk takar lalu dipesambutka kaban sida menantu anak iya ke bediri ari belakang. Balat pengerami lebuh ngirup ai takar kena niki. Nya alai, semaka kitai enti utai inggar ragak, munyi ke betakar.

MAYUH NGELU PALA

Ngenjing beterauh munyi utai setak-setak din ditu laban bunyi orang rami ngirup. Mayuh ke mabuk tauka ngelu pala. Bisk ke engkasak lalu maut pemanggai, ngusuk tikai.  Sekeda ke nakal enda mabuk, masung orang ke mengkasak lalu ngintu sida enggaika pedis, enggaika utai orang ba rumah nya ambis rusak.

Mayuh agi mabuk rindu agi ati orang ka empu rumah. Pemakai enda nemu enda abis laban apin abis apin badu makai. Orang ke meri ngirup endang enda betagang. Orang ke ngirup ngujika pengetan diri empu enda mabuk. Orang ke tegar ngirup selalu muji diri, lalu orang bukai mega muji iya. Orang ke nyambut pengabang nadai betagang meri orang utai diempa enggau utai diempa datai ke pengabis utai, lebih agi tuak enggau arak. Sida malu enti ruai diri enda basah enda rami. Nya alai jaku ke didinga kejang pengabang pulai munyi tu, ngabiska ai.

           Nya mih adat Iban enda ulih disebakaka enggau enggi orang bansa bukai dalam dunya tu ba gayamakai enggau ngirup lebuhmaya gawai. Utai ke naka pemanah ku kitai, jai ku bansa bukai. Udah badu makai utai enggau ngirup ai takar ke kena niki, semua teda utai enggau chapak mangkuk ditanggung pulai ke bilik lalu dikemas orang ke indu din magang. Bakanya mega bala pengabang indu di bilik pan udah tembu ditikika enggau naka pengerami sida sebuat.

JAKU TUNDI

         Udah nya, sida kebiak agi di ruai, barang ke manchal agi, sereta ngelu pala numbuhka jaku tundi madahka jari diri lekat lalu minta basu orang ke indu, orang ke dara. Sereta ninga nya, orang ke empu ruai lalu ngiga sida ke indu-indu dara tauka bini orang lalu mai sida pansut minching kendi tuak tauka butul arak. Datai sida di ruai, bala sida ke lekat jari lalu manjung semua gaga ati. Sida ke lelaki ke empu rumah mai sida ke indu-indu, mai tuak, arak lalu ngisi ke ngagai gelas tauka changkir ti ba jari indu, lalu nyua ngagai sida ke ngumbai jari diri empu lekat, kamah tadi. Enti sida lembau nyambut enggau jari, sida lalu dipantil. Maya nya mayuh macham mih jako bungah enggau jaku tundi ngalahka pangan awakka ngirup. Suah mega bepun ari jaku bungah nya, penumbuh main bukai baka bepantun tauka besanggai. Di ruai bukai sekeda bala pengabang pan bejalai ke setak-setak rami bukai, bungah begagai nganti mayake makai asi.

BELABUH MAKAI

Enda bangat lama udah nya, orang ke empu rumah pan betanggung asi ke ruai meri pengabang makai. Tang makai deka beguai mimit laban enggai ke suntuk ngatur pengerami bukai. Sekeda pengabang mayuh enda makai laban nyau ngelu pala, agi mega bedau kenyang laban baru ngirup ai bisa. Badu makai, semua utai ditanggung pulai ka bilik baru. Pengabang indu mega makai di bilik sereta lelaki ke makai di ruai dibela bala indu ke empu rumah.

              Udah tembu makai, hari pan nyau udah lama lemai, lalu orang ke empu rumah begerah ngasuh orang mayuh betugung ngagai ruai orang ke empu pengawa awakka samameda sereta ninga pengerami enggau jako orang ke melah pinang. Nya endang pun pengawa sehari-hari nya. Orang ke bungah ngirup enti enggai badu diasuh ngetu dulu. Pia mega, sida ke agi rindang bepencha, betanda  tauka ngajat sereta betabuh diasuh ngetu dulu mega. Udah semua orang sampal duduk magang enggau sida ke indu-indu pan udah pansut duduk sama di ruai. Ai irup tauka utai diempa baka penganan, penyaram, tuak enggau utai bukai ditanggung enggau talam enggau tabak pansut ke ruai dipangkang orang ke duduk. Orang ti dipaduka bejaku ngarika sepiak lelaki duduk ari atas lalu iya ke dipaduka ngarika sepiak indu duduk nunga iya ari baruh mangkang tuak tauka arak.

Maya pan nyau chukup alai berengkah ngepunka jaku melah pinang, semua orang mayuh ngetu randau bukai. Iya ke ngarika indu enggau orang ti. empu rumah dulu bejaku nanyaka pejalai sida ke datai mai bala besai bakanya. Tang sebedau nya, sikuorang ti udah dipadu  lalungansah iya enggau tuak tauka arak.

             AI ANSAH

Iya ngirikatuak tauka arak ke dalam changkir kena ngansah awakka iya ke bejaku madahka pejalai enda kakang mansutka jaku lalu enda mega malu.

Nya alai tu aya – unggal
Ai telesai tu datai ari sungai
Pandi indai Raja Petara.
Ai sempuli tanah nyadi
Diberi Sempeti Api
Dikumbai kitai Allah Taala.
Nya alai lalu dipie dara tinggi
Dalam pendi periuk temaga,
Lalu disarap dara nelap
Enggau lipat kain kesumba.
Udah nya lain dituang
Sida Endun Kumang
Dalam balang jebul segala,
Lain perenchitka aku mimit
Dalam chubit chawan bebunga.
Nya alai, dipeda tak lejah-lejah
Nengah kelasah anchau sana,
Ngensaraka mua kita
Ngensaraka tugung bala.
Nya alai tu ku aku
Ai bungai mentapu bunga,
Ai keduka ayam Raja,
Endang lumur satu pemadu bisa,
Teleba ngerebahka gajah jelu singa,
Munyi ke ngekah leka buah bindang.
Nya alai tu ga endang teleba kena aku
Ngansah terinting puting dabung seleka
Enggi Keling seduai Laja.
Tang ke lemai tu kena aku
Ngansah terinting puting dabong seleka,
Enggi nuan aya – unggal,
Ambika nuan bejaku iInggar didinga nusui rita,
Awakka munyi geruda
Injin Selalang.
Irup mih tu, aya – unggal.

Orang ti deka bejaku nya pan ngirupai ansah nya. Orang mayuh lalu nempapka jari gaga ati lalu meransang iya.

Nya alai nyerumba buli
Ke cheli-cheli tumbuh lemai,
Kami bisi datai ditu
Nganjung telinsu langgu buah binjai.
Nya alai diengkah kami di kelasah
Anchau tikai enda sengapa alai.
Lalu disuaka kami ngagai kita
Kemumuk duduk berintai tengah ruai,
Lalu disambut kita enggau kukut,
Terima enggau tapa jari megai.
Nya alai lalu ditaruh kita teguh-teguh
Enda sengapa alai.
Nya mih kesengkeram jaku kitai
Ngasuh kami datai
Mai bala nitihka semaya.

Nya alai nyerumba buli ke cheli-cheli,
Tumbuoh engkeleman,
Bisi kami datai ditu suba
Nganjung telinsu langgu buah kemantan.
Dibai kami ari Batang Igan
Datai kami ditu lalu disua ngagai kita
Ke kemumuk duduk betipan
Penuh ruai datai di tempuan.
Udah nya, lalu disambut kita
Enggau kukut jari kanan.
Taruh teguh-teguh simpan dalam tepayan.
Nya alai nya mih ke sengkeram jaku kitai
Alai kami ke datai sehari-hari tu,
Mai bala sampal enggau anak
Nebah setawak nerantangka gendang.

Deka besuluka resu garu melitan,
Deka begulaika peratai bungai tanam,
Nyemakaka lunda jayau Kedayan.
Nya alai pagila deka dibai kami pulai
Dipegai kami ngena genggam jari kanan.
Datai din ila dibiau kami
Enggau selanjau manuk jelayan,
Digayangka kami belang babi dupan.

(Alli Majang 1972)

Bansa Iban ti udah megai agama Kristian, bisi chara sida empu ngatur adat jadi melai bini nitihkka ajar gerija sida empu. Ngena undang-undang Perintah Menua Sarawak / Malaysia nya sebengkah ari jalai ke baru maya hari diatu.  Enti orang ke salah nadai utai kena betimbang, sida tau kena tinggang ukum jil nitihka undang-undang sivil. Nya mih, naka ulih mih kita Iban ngetanka lalu nagang adat pemali beleman / jadi melaki bini ti  salah serak / peturun, laban pemali tu ukai semina ditagang ba agama Adat Iban aja tang endang ditagang semua pengarap / agama di dunya tu. Reti nya beleman tauka jadi mali melaki bini mega endang ditagang Petara / Bunsu Petara ba mensia dunya. 

(Betampung ba Tusun Ke-61)

Nya mih atur / adat jadi mali nitihka pengarap / agama Adat Iban. Terima kasih ke gambar ti dikirumka kita ngagai aku ke guna dalam Sada Sarawak tu. Engka nyema bala pemacha bisi utai tanya, tujuka ngagai  whatsApp tu: 0138325146.             

Oleh HARRY USUP UMBAR