PETARA, ANTU! • Kuasa Mistik Antu

MIRING MINTA BANTU… Agi mayuh kitai Iban nguna kuasa mistik Antu Bunsu Petara nyumanka orang tabin.

Tusun Ke-39

BEPELASARKA  penemu  litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’  dibagi ngagai  tiga raban iya nya: i. Kuasa mistik Petara (God, Almighty, Tuhan, Allah Taala)  ii. Kuasa mistik Antu (Dewa Dewiiii. Kuasa mistik Antu [Sitan, Jin, Iblis, Sihir, enggau ti bukai].

         Ba Tusun Ke-39 tu, aku mai pemacha nampung pansik pasal Kuasa Mistik  Antu ti bisi kaul enggau dua iti agi kuasa mistik nya: Petara (Tuhan, Allah Taala) & Antu Bunsu Petara (Dewa Dewa).

KETAWA LEKIK-LEKIK

Maya kira-kira pukul 10.00 malam anak iya, Umang ti beumur  dua taun  bemain ba belakang speaker, di baruh airkon. Di belakang speaker nya bisi ruang ti umbas endur iya menselit sereta bejalai. Puas ti menselit sereta bejalai tama pansut ari ruang antara speaker enggau dinding semin nya, anak mit nya ketawa lekik-lekik baka ti begagai enggau orang bukai.

 “Nyelai amat perangai anak aku tu,” pia ku Indai Orang nya bejaku kediri dalam. “Kada enda tabin anak tu? Ni bisi orang bukai dalam bilik tu kelimpah ari kami dua apai indai iya.” Tekala nya mega, ngerenjang asai bulu pegu iya; lalu iya ngasaika bisi utai nyelai dalam  bilik nya. Enda lama udah nya majak ga anak iya nya, beulah nyelai.   

      “Bisi ini dia mummy.”

      “Sapa nya Umang?”

      “Ini bisi dia, Mummy. Nyin iya dih.”

      “Ni ini dek?” Majak ga anak mit nya bejaku sambil ketawa-ketawa.

      “Apuuu…. nama utai ku anak tu? Ngigau? Enda ga iya nya tinduk,” ku Indai Orang nya.  Makin takut asai ati iya. Maya nya madi lelaki iya tinduk. Semina Indain Orang nya enggau laki iya aja ti empai tinduk. Laki iya benung mandi maya nya.

         BEPERENING PANGAN DIRI

      Enda lama udah nya, apai anak mit nya pan pansut ari bilik mandi. Senang mimit ati Indai Orang nya. Bisi nambah agi pemerani ati, ku iya.  

        “Bisi ini dia Daddy. Anang kia dek Daddy,” ku anak mit nya bejaku baru. Bebengap ngapa apai iya sambil merening indai iya. Seduai sama beperening pangan diri.

         “Bau, ngeli iya mumy,” ku anak mit nya bejaku baru.

         “Nama utai bau?” ku indai anak mit nya nanya baru.

         “Bau ngeli ini,”

 Enda seduai kala meda anak seduai baka nya, nyelai ulah.        

         Pagi hari nya, Indai Orang nya  nelefon seiku beliau di Kanowit, lalu nusi semua utai ti utai dipeda iya lemai nya. Beliau nya endang teleba endur iya betanyaka pasal kuasa  mistik Antu. 

         “Nama utai dipeda anak aku aku nya, sekali ke iya bedango tauka amat bisi utai dipeda,” ku Indai Orang  nya.  Nitihka penemu beliau nya anak iya bemain enggau antu  ti nemu mali diri baka mensia ti dikelala iya. Iya nya ini iya empu. Mula iya meda, bajik gamal indu nya, nyau lama –kelama, bebali jai-sejai.

MATI NYELAI

Nya ngujungka anak mit nya rari, takut. Antu nya nyadi ari semengat seiku indu dara ti lama udah ninggalka dunya tu suba. Semengat iya enda likun. Engka laban iya mati nyelai sereta merinsa: sebedau rumah ti endur sida menyanak nya digaga perintah. Rumah nya bansa Flat – Kuarters Pengajar ba sekula.

         “Enti nuan deka muru antu nya, tunu kulit kayu empelanjau, bawang putih enggau bawang mirah. Antu nya enggai ensium bau utai nya,”ku ajar Beliau nya.

          Maya agi mit suba, anak mit nya suba pan kala meda utai nyelai dalam bilik sida. Iya madah bisi meda orang lalu nunjuk tunga ke dinding. Nitihka pansik beliau ti pandai pasal antu. Utai ke dipeda anak mit nya, iya sebansa antu (roh) ti baka gamal sebansa kera ti mit. Iya nemu bejelangkit sereta ngerayap ba dinding. Apai enggau indai anak mit nya enda meda.

           Baka ni sereta nama kebuah anak mit ti beumur kurang ari empat taun ulih meda, antu nya? Kati mata anak mit nya bisi nyelai lansik ari kitai ti besai tuai? Tauka antu nya empu bisi kuasa ngasuh iya ayan ba mata anak mit, tang enggai ayan ba mata orang besai tuai? Engka iya sigi sengaja deka ngachau anak mit, tang enda berani ngachau orang besai tuai?

        Tentu kitai mega sama kala ninga cherita pasa anak mit  ti beumur kurang setaun selalu nyabak maya malam hari. Suah didinga kitai, apai indai kompelin anak sida ti beumur 3 bulan – 5 bulan selalu nyabak maya jam 11.00 – 2.30 malam.   Sekeda sida nya nyabak maya nyerumba silau tauka maya malam datai. Anak mit ti nyabak baka nya. 

KENA KACHAU ANTU

Raban anak mit ti apin nemu bejaku, enda nemu madahka pemedis diri suah nyabak laban sida tabin tauka kena kachau Antu ‘makhluk halus’. Enti amat sida nya tabin pedis perut: hernia ‘kembong perut’. Tanda penyakit perut tu ba anak mit iya nya: perut tengkering, pusat kembai bedungkung, mata iya ngelanit ke atas. Penyakit ti baka tu tentu mudah aja diaduka sida doktor ba klinik tauka hospital. 

Enti anak mit nya amai kena kachau Antu baka ni, dih? Tanda penyakit laban Antu; sitan, iblis, jin, enggau ti bukai iya nya, bisi urat darah bechura gadung tauka ijau redam ba senentang kening semak mata. Nama chara mensia ngubat anak mit nya, dih?    

SEKEDA ARI SADANG MENSIA MAYUH

  1. Sekeda ari chara Iban, asuh anak mit nya duduk ba kali ti baru udah kena nyumai sereta agi ba tungku. 
  2.  Ambi kayu garu ke original lalu tunu sampai angus. Abus garu nya kendas ba kening anak mit nya. Maya ngendas ba tengah kening anak mit  nya, nuan enda tau enseput. 
  3.  Kunyah bawang mirah lalu champur garam mimit  lalu sembur ba tisi anak mit  ti nyabak nya. Kulit bawang tau mega ditunu 
  4.  Anang arapka Dukun. Besampi aja ngagai Tuhan. Minta tulung Iya, enti kitai nya orang Kristian.  Di Penampang, Sabah bisi orang diberi Santa Maria kuasa nyumanka orang tabin. Iya nemu meda nam utai ngachau anak mit nya.
  5.  Bisi orang nguna kayu ujan panas.
  6.  Kadang-kadang empelawa ngachau anak mit nya. Anjung ngagai Tua Pek Kong, China. Nemu sida ngadu sama enggau anak aku agi mit suba.
  7.  Tau ga bai ngagai Manang laban kelia pengakit diayahka utai sigi ulih aduka Manang.

8.  Ku orang tuai bisi chara ngasuh anak mit nya badu nyabak. Ambi bulu landak diikat enggau kain chelum lalu simpan ba panggal ti kena anak mit nya tinduk. 

9. Anak mit aku suba maya beumur 7 – 9 bulan enda nemu badu-badu nyabak baka nya. Maya pukul 6.00 lemai setat mih iya nyabak. Mayuh orang endur berubat. Nyau kepuas-puas lalu dianjung ku ke Balleh lalu Beliau dia madah anak mit nya kena kachau Antu Buyu. Diperubat Beliau dia anak aku nya lalu gerai baka selama.

10. Anak mit nya kena kachau Antu Buyu tauka kekadang  utai tauka pengaruh ti dikembuan kitai empu kekadang deka ngachau. Ulih diambi lalu tangkap lalu masuk dalam butul kacha balut. 

11. Taun 1999 seiku anak mit selau nyabak maya lemai hari. Udah nya, dianjung berubat ba Manang. Kenu ku Manang anak kt nya kena kachau empelawa lalu gerai baka selama.

12.  Sebengkah daun tau kena ngubat anak mit  ti udu nyabak nyelai baka nya. Jempi. Udah iya rangkai lalu ditancang ba jari enggau kaki anaki mit nya. Penawar tu kena ngemaduka  anak nyabak. Enti ulih genap lemai nuan nunu selukai mega.

         Bepelasarka cherita enggau penemu mensia mayuh di atas nya tadi, aku arapka pemacha sama bela mereti sereta nerima ‘kewujudan makhluk halus’. Reti nya kuasa mistik Antu amai bisi di dunya tu. Pia mega kuasa nya sigi udah bisi sebedau kitai mensia (Adam & Eve). Nya alai, kitai mensia sigi enda ulih ngelaban kuasa Antu. Maya mensia dunya kena kachau kuasa Antu, mensia enda ulih enda pinta bantu ari tiga raban raban kuasa: Petara (God Almighty, Tuhan, Allah Taala), Antu Bunsu Petara (Dewa Dewi) tauka Antu: Sitan, jin, iblis, enggau ti bukai. Ni bagi tiga kuasa mistik nya dipilih mensia?  Saut tanya tu bepanggai ba pengarap tauka agama seiku-seiku mensia.

Mensia orang Kristian endang nguna kuasa mistik Petara (Tuhan, Allah Taala) ti bepelasarka penemu dalam Bup Kudus ‘Bible’.  Kitai Iban ti ukai Kristian sigi nguna kuasa mistik Antu Bunsu Petara (Dewa Dewi – Sengalang Burong – Manang, Orang Panggau & Gelong) ti bepelasarka penemu agama adat Iban. Nya mih kebuah kitai Iban ti agi megai agama adat tu nguna Manang, Lemambang, Gawai, Pelian. Sekeda kitai Iban nguna kuasa mistik Antu ti bepelasarka penemu mistik Beliau, Dukun tauka Bomoh. Ni chara ti patut diguna kitai Iban maya ti tabin kena kachau kuasa mistik Antu?

Utai tu nyelai tang amai nyadi ba pengidup mensia. Pechaya tauka enda kita pemacha nya bepanggai ba pikir diri empu. Orang Kristian enda diasuh gerija sida empu nguna kuasa mistik Antu Bunsu Petara tauka kuasa mistik Antu.