Dunya pemerindang Siti sumpah siti danji

KEY-C

INDUSTRI muzik Dayak majak mansang enggau penatai artis baru enda milih biak tauka tuai. Penatai sida nya nyadi siti kebuah industri muzik enda “boring” laban tiap iku artis bela mai chura, sera, aura enggau gaya kediri empu. Raban orang ti ngemeranka aktiviti seni (penggiat seni) di menua tu ulih mantaika penau enggau pengelandik diri enggau chara lantang sereta nadai sekat enggau adan. Kelia enti kitai deka nyadi artis rikot (recording artiste) chukup tusah laban bepanggai ba kompeni rikot tang diatu sapa ke bisi puku tau ngaga single enggau album penuh kediri empu. Trend ke bansa tu ukai semina nyadi ba kitai di Sarawak ditu tan di Semenanjung pan sebaka. Ngeluarka album penuh enda tentu ulih dikeandalka agi maya ke diatu ketegal penanggul chelak tiru (piracy) lalu nya meh kebuah tebal agi artis baru gagit agi ngeluarka single.

Minggu tu ruang pemerindang deka bekunsika berita industri begulai enggau Dominic Christy; siku penanyi ke diatu popular enggau lagu Siti Sumpah Siti Janji. Dominic madahka penatai diri ari Sri Aman, ada di Sibu lalu diatu gawa di Sri Aman. Iya anak bunsu ari tiga iku diri menyadi; semua lelaki. Iya ti bendar Dominic udah lama dikelala ba industri pemerindang kenyau ari taun 2012 nyin suba. Dalam taun nya suba iya bisi album duet begulai enggau Lincha Augustine ari baruh kompeni TBC di Sibu. Taun 2016 Dominic bisi ngerikot siti album kompilasyen MARTINA 3 Vol. 3. Lagu ti dirikot iya ba album nya suba iya nya Atas Nama Nuan enggau Pulai Meh Sulu. Album nya dirikot ba LUH Production di Sibu.

ALBUM TIMANG PEMERINDANG

Album kompilasyen Timang Pemerindang nya siti album ti udah dikeluarka ba ujung taun 2018. Ba album tu bisi empat iku penanyi iya nya Dominic Christy, Key-C, Plammer Entingar enggau Tony Mawa. Producer nyediaka album Timang Pemerindang tu nya Mr. Tony Mawa. Nitihka Dominic Christy, semua muzik enggau vokal dirikot sida ba Ranyai Sound Studio Kuching.

Semilan iti lagu ke dijangka ulih diterima peminat lagu Iban ba album Timang Pemerindang tu nya Semina Nuan (Plammer Entingar), Peransang Kumang (Key-C), Utai Gaga Petara (Dominic Christy), Ambai Buah Dabai (Tony Mawa), Pantak Ngelambai (Plammer Entingar), Siti Sumpah Siti Janji (Dominic Christy), Belah Piring Bedara (Key-C), Dara Pengibun Ati (Plammer Entingar) enggau Renjan (Key-C). Entara komposer ba album Timang Pemerindang tu iya nya Tony Mawa, Key-C, Lucy M enggau Dominic Christy empu. Penanyi popular Lucy M nyadi komposer ke lagu Siti Sumpah Siti Janji lalu diatu lagu nya entara lagu ke suah didinga ba radio. Kelimpah ari nya, Siti Sumpah Siti Janji mega udah enggau masuk Carta Sapa Juara Waifm. Naka ke diatu iya kala bulih penuduk lumur 3 tauka ‘top 3’ ba tangga carta sapa juara.

EMPAT SERABAN

Enti nitihka gaya sida sebuat ke nyadi artis ba album kompilasyen tu, album Timang Pemerindang bisi peluang nerima sambut ti badas. Kebuah pia laban sida empat ukai orang baru ba dunya pemerindang. Reti nya sida empat bela udah dikelala lalu bela bisi peminat kediri empu.

Dominic Christy ke udah mayuh peneleba belagu ba mayuh bengkah endur di menua tu, suah belagu ba mayuh palan pemerindang baka funfair, karaoke pub enggau panggau pemerindang di Sarawak enggau Semenanjung Malaysia.

“Aku pechaya album Timang Pemerindang jampat diterima peminat laban kami sebuat bela udah bisi lagu tauka single kediri empu sebedau tu. Enti digelumuka sekali, peminat kami tau nyadi mayuh. Ngena peluang tu aku berasai gaga sereta temegah ke pemadas kaul kami empat. Dalam siti raban, kaul enggau pemereti ati nya utai ke pemadu beguna. Nengah jalai meretika pengawa pangan diri lalu mereti mega ke pemesai guna kaul ti badas, semua pengawa ulih nyadi enggau mujur sereta bekualiti,” ku Dominic Christy nyaut saut keterubah ba randau kami duai.

SENI MUZIK ENGGAU LAGU

Ditanya senentang muzik enggau lagu Iban maya ke diatu, Dominic Christy madahka muzik Iban majak manah ari semua segi.

“Diatu melodi, lirik enggau muzik lagu Iban udah jauh berubah ari muzik Iban ke dulu suba. Penatai artis baru mai ubah baru. Sida tu lebih kreatif laban taja pan sida agi biak tang penemu sida ba bidang seni muzik enggau lirik chukup mayuh. Kaul ti badas entara artis lama enggau artis baru mega majak manah. Nadai sida ke lama nadai meh kitai ke baru. Basa entara pangan diri chukup beguna. Aku ulih nerima komen enggau jaku bantah tauka jaku peransang enti sema pengawa aku ba industri tu enda betul dipeda. Jaku lalau enggau penemu iring ari pangan diri nya sigi beguna. Ngena chara nya kitai ulih berubah manah sereta mansang,” ku Dominic Christy bekunsika penemu diri.

TERIMA KASIH

Dominic Christy ti bejangkaka lagu Siti Sumpah Siti Janji ulih nyadi hits, madahka diri berasai lantang laban nyau majak mayuh orang ti pandai ngaga lagu enggau muzik. Iya arapka sida nya enda semina ngasam pengelandik diri  tang bekunsika iya enggau orang bukai.

“Ngena peluang tu aku meri besai terima kasih ngagai pemuzik lagu kami Cami Ranyai, komposer lagu enggau lirik, raban media, dj radio, Utusan Sarawak enggau bala pangan facebook ke semampai nyukung pengawa kami ari ngelamatu ti udah. Arap besabar meh nganti penatai album Timang Pemerindang. Ngagai kita ti rinduka lagu Siti Sumpah Siti Janji kita tau ngundi lagu nya ba Carta Sapa Juara Waifm. Semina ari undi kita lagu nya ulih menang ba carta. Taja pan pia, peminat lagu Iban ke bukai bela tau ngundi lagu bukai ti dikerinduka sida,” ku Dominic Christy ngujungka randau kami sebuat.

DIKARANG MR TUBAI PENGERINDU