Dayak, Iban Borneo

TUAI BANSA IBAN… Endang gaya tuai raban bansa ti berani ngetanka menua enggau bansa diri empu ari jeman kelia.

DIB Tusun Ke-40

Iban enggau Melayu begulai sejalai ari kelia

            Udah nya Sultan pan minta Abang Gudam ngusung iya di astana. Abang Gudam madahka diri apin ulih nemuai ngagai iya di astana laban agi mayuh pengawa dagang iya ba kapal nya. Pia mega iya madahka diri agi lama bedagang di menua nya. Nya alai, Abang Gudam pan meri Sultan kain ti diukir ngena ubung emas. Lebuh Sultan nya pulai ke astana, iya nyuaka kain nya ngagai permaisuri iya. Naka pengaga bini Sultan nya meda kain ti badas amai baka nya. Enda iya kala ngena kain ti ngemanah nya.

           Pagi seiti Sultan ngasuh bala tukang sumai astana nyayat seiku chapi, kambin enggau manuk lalu ngambi Abang Gudam ngabang ngagai iya di astana nya. Maya nya Sultan mega muka pengerami makai lemai kena iya nyambut temuai ari astana Mingkabau nya. Sebedau makai lemai nya Sultan ngasuh bala pemesai astana ngambi lalu ngiring Abang Gudam ari kapal iya ke astana ngena adat basa astana Sultan. Dinga munyi gendang sereta tabuh astana berauh begemung ke langit. Nya mih tanda madahka bisi pemesai ari menua bukai datai ke astana Sultan. Maya nya Abang Gudam ngena pekayan astana baka ti dikena iya maya bisi pengerami di astana apai iya di Minangkabau.   

Abang Gudam betemu enggau Sultan

Datai di astana Abang Gudam diasuh Sultan duduk ngimbai iya muak ke kanan semak bala pemesai-pemesai astana Sultan Berunei nya. Udah sida sama duduk sida pan berengkah berandauka mayuh macham pekara lebih agi pasal adat agama Islam. Ari gaya enggau chara iya berandau enggau Sultan sereta pemesai-pemesai astana, semua sida nya pan nemu Abang Gudam nya endang amai anak orang pemesai astana di Sumatra. Adat basa sereta ulah iya ti manah sereta alus ngasuh Sultan sereta pemesai-pemesai astana nya amai rindu sereta bebasaka iya.

Enda lama udah nya bala kuli di astana nya pan mai mayuh bansa utai diempa enggau ai irup. Lebuh udah badu makai, Sultan ngasuh Abang Gudam bemalam ba astana tang Abang Gudam enggai laban agi kisuk ngaduka dagang ba kapal din. Ninga munyi nya saut Abang Gudam, Sultan tusah mimit ati laban iya apin berundingka utai ti deka diberi iya ngagai temuai iya nya. 

Dayang Chi nyadi bini Abang Gudam 

           Maya ti makai lemai nya, Abang Gudam makin tekait ati meda pemajik Dayang Chi. Nya alai, hari seiti sebedau mupuk belayar mulaika diri, Abang Gudam ngusung astana lalu madahka diri meri selamat tinggal ngagai Sultan. Lebuh Sultan ti minta iya milihka diri pemeri ti dikedeka iya, Abang Gudam madahka diri deka minta Dayang Chi. Sultan Berunei nya nadai jaku agi lalu ngemendarka gundik iya nya dibai Abang Gudam.

        Udah Abang Gudam enggau Dayang Chi tama kapal, sida pan mupuk belayar pulai ke Saribas. Udah belayar dua tiga minggu, sida pan datai di Semaruang, Saribas. Meda anak iya datai Temenggong Kadir gaga amai ati. Malam nya Temenggong Kadir ngangauka mayuh bala Dayak Iban enggau bala Melayu Saribas ngabang ngagai pengerami ‘makan selamat’ kena nyambut penatai Dayang Chi ngagai sida sebilik. 

          Dua tiga hari udah nya, Temenggong Kadir pan ngusung  Abang Gudam ba rumah iya lalu nanya sekali ke iya bisi ati deka diau mendam di Saribas tauka pulai ke Minangkabau. Abang Gudam madahka diri enggai pulai lalu deka diau mendam di Saribas enti orang di menua nya deka nerima iya. Ninga munyi nya, Temenggong Kadir ingatka semaya iya enggau Abang Gudam pasal Dayang Chi ti diselamatka iya ari Sultan Berunei. Iya mega madahka diri setuju Abang Gudam ngambi Dayang Chi ke bini iya. Ninga munyi nya Abang Gudam berasai gaga amai ati

           Udah Abang Gudam enggau Dayang Chi jadi melaki bini, Tuai bansa Dayak Iban ti benama Manggi sereta bala nembiak iya pindah ke ulu Sungai Saribas lalu diau mendam di Supa di Sungai Layar. Sebedau Manggi mupuk iya mega meri pemendar ngagai Temenggong Kadir enggau Abang Gudam sereta bala nembiak seduai nya bumai sereta bekebun ba tanah iya sebelah Sungai Semaruang semak Nanga Saribas. 

          Udah ti pindah ari Nanga Saribas Manggi enggau bala iya pan belabuh nirika rumah panjai baru di Supa. Benung rumah panjai sida nya baru deka tembu, Manggi ninga rita bisi seraban bansa bukai udah diau mendam di ulu Rimbas. Enda tentu senang ati Manggi ninga rita orang nya; lalu deka ngabas sapa orang nya. Nya alai iya pan mai dua tiga iku nembiak iya bejalai kaki nengah kampung ari Supa ke Ulu Bakir lalu ke Suri di Rimbas lalu datai di Debak. Datai dia iya pan betemu enggau Tuai raban bansa nya ti ngumbai diri bansa Seru. Sida madahka Manggi, sida lama udah diau di Rimbas kenyau ari aki ini sida ti pindah ari Nanga Rajang. Ku sida, orang ti agi nguan menua ili Sungai Rejang maya nya, bansa Rajang, Segalang enggau Beliun. Bansa Seru nya mega madahka Manggi, bisi mega seraban bansa Dayak Iban diau ari ili sida nya ti betuaika Garai anak Gunggu. Sida tu datai ari Sebaru di Kalimantan maya sida agi betuaika Jenua seduai Padang.

Tembawai Buruk Rumah

           Udah ti betemu enggau bansa Seru nya, Manggi kena rampit pedis perut chirit lalu parai. Iya dianjung ngagai pendam bansa Seru ti dikumbai orang dia Pendam Batu, semak pasar Debak ke diatu. Kenu ku cherita asal menua nya, Gunggu apai Garai mega ditumbakka ba pendam nya. Udah numbakka Manggi bala nembiak iya pulai enggau ati ti tusah ke Supa. Datai dia, sida enda nembuka rumah panjai sida nya lalu pindah ke menua bukai. Nya mih kebuah endur nya disebut orang dia Tembawai Buruk Rumah.

          Udah parai Manggi, Temenggong Kadir sereta sida sebilik pindah ke ulu Semaruang lalu diau ba Kampung Saribas kira-kira setengah batu ari pasar Pusa ke diatu. Maya nya mayuh amai orang dagang ari menua bukai datai dia bejual bebeli. Sida sangkai ba Kampung Saribas belama lalu nya alai endur nya nyau nyadi palan dagang ti tebilang. Kenu ku orang tuai, nama sungai Batang Layar nyau disebut orang Batang Saribas. ‘Saribas’ nya nama sebatang sungai ti mit di Kampung Saribas. Maya Temenggong Kadir diau di Kampung Saribas, mayuh bansa Seru, Baketan enggau Beliun masuk agama Islam enggau iya lalu sida nya ngumbai diri bansa Melayu.  

         Ari Kampung Saribas, Temenggong Kadir pindah baru lalu diau mendam di Pusa ba nanga Sungai Rimbas ti bepati ba Sungai Saribas. Abang Gudam seduai Dayang Chi, maya nya sigi udah beranakka Abang Drahman lalu pindah ari Semaruang nitihka Temenggong Kadir enggau bala nembiak iya ke Pusa. Enda lama udah nya Temenggong Kadir pan parai tuai lalu ditumbakka ba pendam Sapinang di menua antara Beladin enggau Samarang, semak Nanga Saribas ke diatu.

Udah betaun-taun diau mendam di Pusa, Abang Gudam parai tuai lalu ditumbak ba pendam Sapinang mega. Diatu pendam Temenggong Kadir enggau Abang Gudam nya dikumbai sekeda orang Melayu berantu sereta nyelai. Sekeda sida ti peturun seduai nya agi ngundang pendam nya laban deka minta berekat, minta tuah, minta limpah.

            Udah Abang Gudam parai, anak iya Abang Drahman ninga rita Sungai Paku, pati Sungai Saribas udah diuan raban bansa Dayak Iban. Iya keran amai deka betemu enggau orang nya lalu ngusung sida nya hari siti. Iya diiring bala ulun iya. Lebuh sida datai di Nanga Paku, sida mudik datai ba Nanga Lalau. Udah nya iya mudik ke ulu agi lalu datai di nanga Sungai Bangkit. Dia iya tepedaka daun isang baka ti dulu tadi mega. Iya pan majak mudik ke ulu agi. Lebuh iya datai ba Nanga Rembai tauka Luban, iya meda utai ti sama baka dulu tadi digantung ba tiang. Daun isang nya dikena orang kelia nagang orang datai ti enda dikelala diau tauka bumai di menua nya.

  (Sources of Iban Tradisional History, Benedict Sandin, 1994)

           (Betampung ba Tusun Ke-41 minggu nyin ila)

Nya mih asal penatai sekeda ari bansa Dayak “Ibanic Group” ti bukai ke menua Sarawak, ti bekaul jaul segulai sejalai enggau bansa Melayu Sarawak ari jeman kelia. Kenyau ari kelia dalam sejarah Sarawak, bansa Dayak (Iban) enda kala bemunsuh enggau Melayau Sarawak. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal  nanjar bansa Iban maya sida bepindah ngiga menua baru endur bumai betaun.  Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146   

DITULIS HARRY USUP UMBAR (B.Sc Hons. Human Development, UPM)