Sama mantai tali akal, tekang tipu

ORANG bempu panjuk benung ngabas siti panjuk.

BELABAN NIPU PANGAN DIRI

Nadai lebih ari jelu Pelanduk seduai Tekura datai ba maya nipu taka ngayah pangan diri tauka jelu bukai.

Nyadi bala kitai rebak dulu ari tu endang udah suah macha tauka ninga jelu  dua iku nya endang semampai dikelandik dalam ensera pandai mudi tauka ngakal pangan diri taja pan seduai endang dua sebuat ti ngena perembian Sambi.

Seduai ukai mina keran mudi serimbai ngakal pangan diri sereta besemekih pengelandik enggau pemintar entara diri seduai iya empu, tang suah mega seduai besaup sereta begempung musin lalu mantaika pengelandik, negika tali akal lalu nipu bala sekeda jelu bukai.

Bisi maya Pelanduk matak jalai seduai ti nipu, bisi ga maya Tekura mantai pengelandik iya musin bala jelu bukai ngena saup ari Sambi iya Pelanduk.  Seduai amat bebakih bendar enggau pangan lalu suah bendar udah dicherita orang nipu bala jelu ti jauh besai ari seduai nyengkaum Badak, Babi, Gajah, Kera, Kambin, Nyumbuh, Baya, Rusa, Jugam (tauka Makup) sereta sekeda jelu bukai ti suah bepansa tauka begulai pendiau sereta sama ngereja sebengkah-sebengkah pengawa enggau seduai.

Nyadi pemintar Pelanduk seduai Tekura tu sereta enggau kuing jalai ensera seduai ti nundi, nipu tauka ngemediska jelu bukai endang manah bendar ambika pelajar kitai mensia idup nguan dunya injau tu.

Semua kuing enggau tuju ensera tu ditempa orang ti landik ngarang tauka ngaga enggau nusui iya kena ngajar bala kitai mensia ke idup tu. Karang ensera Pelanduk seduai Tekura tu endang kena ngiri ajar sereta lalau penemu enggau tenggau pengidup ngagai raban nembiak ngichaka sida nguingka pejalai pengidup ngagai tunga ti meruan sereta manah. Nya endang nyadi ka lalau enggau tesau awakka sida enda tepejuh nengah jalai repa sereta mayuh duri peringat ti tau ngenataika pemedis ngagai tubuh sereta pengerai enggau pengidup sida.

ENSERA DIKENA NGAJAR NEMBIAK

Ensera Sambi sebuat dua iku tu endang dikarang sereta ditempa orang tuai dulu kelia kena ngajar bala kitai ke nembiak awakka mereti ba jalai enggau kuing pengidup sida. Tempa ensera nya endang awakka iya nyadi lalau enggau tenggau pengidup semua anak mensia awakka mereti, bebasaka pangan diri lalu enda berumban ngaga pemutus runding ba siti-siti penggal pengidup.

Dalam mayuh cherita pasal seduai Sambi tu, seduai tebal agi nipu jelu bukai munyi udah disebut ba pun tadi, tang sekali tu kitai nguji meda ulah seduai deka mantaika pemandai  seduai deka nipu sereta mudi diri sama diri. Seduai besemekihka pengelandik nipu pangan.

Nyadi hari siti empa pengelama seduai ti udah begulai sejalai ngiga pemakai, ti alai seduai sama kulu sama kili enda jauh ari pangan, dia deh Pelanduk turun kediri. Nyau keleju-leju tudah tuai ti bejalai ngili ka ai, dinga iya tak bedauh utai di ili ai. Pelanduk pan lalu mansang kia nyubuk begadai-gadai. Datai iya dia peda iya bisi tampun bubu baru, lalu bubu mega bisi udah ditanka orang dia.

GUNG BULAN PESAKA AKI

Dia iya lalu berunding bakani iya ulih ngayahka Tekura, awakka Tekura parai tama bubu tauka abau nya. Lemai nya Pelanduk lalu ngelaunka diri pulai ngagai endur seduai ti diau, nyau sabung petang tudah tuai datai dia.

“U, laun endar nuan pulai Sambi,” pia ku Tekura.

“Laun Sambi, nyau telenga-lenga ngabas lalu meda pesaka aki kitai dili dia,” ku Pelanduk nyaut.

“Pesaka apa nya Sambi?” ku tanya Tekura.

“Gung Bulan pesaka aki kitai, mengkang ba tengah kerangan dili dia,” ku Pelanduk.

“Aku ngambi gung nya ila Sambi,” ku Tekura.

“Oh dini nya tau diambi sebarang, dini nya tau diambi pia aja, pesaka aki tuai kitai nya,” ku saut Pelanduk.

“Enda pan nuan ngasuh, ambi aku meh nya pagila,” ku Tekura.

“Oh dini nya tau bakanya, aku ti nemu, aku ti ngintu,” ku Pelanduk.  “Nuan tak lalu deka ngempu. Ti nuan keran deka ngempu iya manah tua belumba kia pagila. Nuan nengah ai, aku nengah darat, barang sapa dulu datai dia, nya meh ngempu gung nya,” pia ku Pelanduk.

“Barang iya meh Sambi, aku enda muai jaku nuan, belumba ku nuan belumba, ti deka nguji penegar pangan diri,” ku saut Tekura.

Nya alai tumu-tumu pagi bekau nya, Pelanduk seduai Tekura lalu bejalai napat alai Gung Bulan ti ditemu Pelanduk.  Nyau kelama seduai udah bejalai ngilika ai, lalu didinga seduai meh dauh ati tampun abau.

“Ha, nya Gung Bulan ti bedauh dili dia Sambi. Ari tu meh tua belabuh belumba, nuan nengah ai aku nengah darat,” pia ku Pelanduk. “Sapa dulu datai dia, nya meh ngempu Gung Bulan nya,” ku Pelanduk nandu jaku iya baru.

Tekura lalu nadai belengah, endang lalu muai diri ka ai, lalu nyemerai; ama nyemerai, ama enselur ngilika ai, enda berasai alai Tekura lalu kena sintak pusin ai lalu tama abau.

“Apuu parai aku Sambi tama bubu, ambiku Sambi, parai aku tu,” pia ku kangau tudah Tekura ti dalam bubu.

Kapa Pelanduk ibuhka kangau tudah Tekura. Ngasuh iya rising-rising ketawa. “Nya meh Gung Bulan ti ku aku, nuan meh ngambi iya Sambi,” ku Pelanduk ngelinyai Tekura.

Enda lama udah nya, dinga nyau kedih-kedih orang ti empu abau nya ngumbai ukui iya mansang ngabas abau. Pelanduk lalu ngerarika diri enggaika kena salak ukui. Tekura lalu ngematika diri; jari kaki melulur, mata pejam.

Lalu diangkatka orang nya bubu iya, lalu dituang, peda Tekura ulih bubu.

“Huu sayau endar Tekura tu udah parai,” pia ku orang nya. Lalu ambi iya bangkai Tekura, panggai atas puchuk tuga. Pulai ila mai, ku iya ati iya din. Berat ngapa raga mai bangkai Tekura nya, ku runding iya.  Orang nya lalu mansang ngabas bubu bukai iya ba sebelah genturung ai dia.

Udah orang nya mupuk ngejang ari nya, Tekura lalu ngalih-ngalihka diri atas puchuk tuga lalu labuh ke tanah. Iya endang semuti ngeluluka diri mati.

Akai, akai ku ati tudah Tekura, mimit da aku tu enda bebadi mati laban akal Sambi. Mimit nadai meh iya nyangka Pelanduk bisi ngembuan ati jai ngagai tudah tuai.

Nyau kelama iya ti udah bejalai, peda iya bisi panjuk orang berumpanka buah buan.

“Uu panjuk orang tu ditu, ila meh aku mai Sambi kitu awakka iya disintak panjuk, jera asai iya ila,” pia ku Tekura bejaku kediri.

BUAH KELILI PADI

Nyau deka sabung petang baru Tekura datai ba langkau serunggu endur seduai ti ngenduh begulai diau. Tekura lalu nyapa, “Hai nama pengawa nuan Sambi tak merampau gamal pendiau?”

“Eh nadai Sambi, nadai pengawa nganti nuan ti pulai, nasit bendar ga nuan enda parai Sambi,” ku Pelanduk nyaut.

“Heh, ni utai bakanya tau ngasuh parai Sambi, ngasuh nyamai keba, asai mandi di sungai sida niang indai menya,” ku timbal Tekura.

“Meda nuan laun endar pulai deh Sambi?” ku tanya Pelanduk.

“Nya meh telenga-lenga bejalai ba tembawai sida niang aki, lalu nemu buah Kelili Padi ba tengah tembawai lebat endar bebuah, benung mansau, iya ga baruh, datai jengkau ari tanah. Keba aku tak naka iya pengenyang kediri makai buah iya tadi,” ku Tekura lalu ngeluluka diri teraie.

“Ila aku niki ngambi iya Sambi,” ku Pelanduk.

“Oh dini iya tau diambi  kediri, mesti tiki sama, ambi sama,” pia ku Tekura sereta nampung jaku madah pagila baru seduai iya sama kin.

Endang agi tumu seduai udah nurun pagi nya. Nyau kelama seduai pan datai ba Tanjung ti alai buah Kelili Padi munyi ku Tekura.

“Dini alai buah nya Sambi?” ku tanya Pelanduk.

“Nya iya dili dia. Nuan dulu kia, enda jauh pun buah nya ari tu, aku limpang ke ai dulu, ka bira,” pia ku Tekura.

Pelanduk lalu beguai mupuk dulu laban enda tetatka diri agi laban keran deka makai buah nya.  Mata iya pan lalu gilau-gilau nengkadah tunga ngagai puchuk kayu, beratika buah Kelili Padi munyi ti dipadah Tekura.

Enda lama udah nya, dinga tak nyerauh Pelanduk madah diri parai. “Parai aku Sambi, sintak panjuk; ambi aku Sambi, parai aku tu ila,” pia ku munyi kangau tudah Pelanduk. Iya endang sigi udah kekitang sintak panjuk.

“Haa, nya lah buah Kelili Padi ti ku aku. Nuan sintak panjuk, nuan meh niki iya,” ku Tekura.

“Ambi aku tu Sambi, parai aku tu ila,” pia ku kangau tudah Pelanduk.

“Endai, aku kemari nadai meh orang ngambi,” ku Tekura nyaut, sambil ketawa rakah-rakah meda tudah Pelanduk udah kekitang sintak panjuk.

Enda lama udah nya, dinga datai orang ti ngempu panjuk, mansang ngabas panjuk. Ninga orang nya udah semak, Pelanduk lalu ngeluluka diri mati, jari kaki kejur, mata melut, ngeli ngerising, tubuh tekering. Datai orang ti empu panjuk dia, iya pan tepeda ka panjuk bisi nyintak Pelanduk. 

“Ho, bulih Pelanduk panjuk aku, engka sintak lemai kemari, laban nyau udah tekering tubuh jelu tu. Eh tinggal ditu dulu bangkai Pelanduk tu, pulai ila nyung iya ditu,” ku apai tuai orang nya bejaku dalam ati iya din. ‘Bangkai’ Pelanduk nya lalu diselitka ba selepak anak kayu. Iya lalu mupuk ngabas panjuk iya ti bukai.

Iya meh orang nya udah ngelebus, Pelanduk lalu begaut ngelepaska diri ari selepak anak kayu, lalu labuh ke tanah. “Ti bakatu idup meh nyawa, agi panjai meh umur,” pia ku ati Pelanduk din. Iya pan lalu bejalai ngiga pemakai.

Nyau lemai hari baru iya mulaika diri ngagai endur Tekura seduai ti begulai diau.

“Uii, Sambi nama gaga deka nuan duduk changuk-changuk?” ku Pelanduk nanya Tekura.

“Eh baru badu mela diri aku tu Sambi,” ku saut Tekura ti balat endar tekenyit kena sapa Pelanduk, laban iya mimit pan nadai ngadang Pelanduk nya agi idup meda udah kitang-kitang sintak panjuk.

“Apuu enda parai ga nuan Sambi.”

“Eh nama utai ti bakanya tau ngasuh parai, ngasuh nyamai keba, asai ti diayun sida niang indai menya, maya agi mit kelia,” ku saut Pelanduk.

Seduai lalu sama rakah-rakah ketawa, ngenang diri sama udah ngakal, ngayahka pangan.