Cherepin: Remban

TUSUN KE-4

MANANG apai Stana lalu megai kedua-dua piak lengan indai Mulok sereta ngangkatka jari nya ti baka ke penat. Apai Stana muka tiga belit; baka ke muka tanchang tali mesai batang machis. Tadi nadai dipeda tali dia. Diatu tak tebuka tanchang utai. Tak segenda tali ruran baka ti dipeda merundai ari dan kara. Tak agi basah. Eh… wai ku ati aku. Randau nya diengkah apai Stana ba talam ti dipinta iya dulu ari nya.

Manang Dagang pan baka nya. Iya musin-musinka jari iya ngelingi rekung indai Mulok. Bisi ngelima kali iya musin. Peda utai ulih iya tali ruran mesai batang ruku. Nyelai amat. Tadi nadai ga sebarang akar bisi ba rekung indai Mulok. Indai Mulok musin-musinka pegu iya. Tak bula nusui nya. Nyelai amat utai ti nyadi nya. Tak baka ke main silap manang nya. Orang mayuh pan sama tak alit ati.

Orang indu lalu datai ngagai indai Mulok lalu masukka baju ba iya sereta nyanggul buk iya. Iya pan tak nyamai agi ga pendiau. Iya lalu diberi orang ngirup. Gamal iya balat lelak. Ukai anchi tadi nyau bengkulas laban iya ke ngerijat.

“Iya nama mimpi nuan wai?” ku sida ke indu ke enda sabar nanya mimpi iya.

“Akai rai. Nadai aku nemu diri tak bemimpi. Endang tak asai ke di menua tu. Asai ke diau di tengah laman kitai dia. Mayuh kitai dia. Besai tuai bisi. Nembiak bisi. Jam kitai ke richuh peda datai utai. Terubah iya kumbai aku burung besai. Udah iya sangkai, peda nya tak bilun. Pansut orang bisi ngenam iku, udu pemesai-mesai, bebulu bauh baka mayas-mayas tang iya mensia. Mua sida tak mua rasung. Sereta sida datai, sida lalu belabuh betangkapka anak mit kitai. Mayuh ulih ditangkap sida lalu ditepu sida ke dalam bilun…”

Indai Mulok ngetu bejaku. Gamal iya takut. Dua tiga kali iya dipeda gelesi.

“Bala lelaki nadai ngenan, nadai ngelaban. Semina aku siku nguji ngenanka anak kitai diambi orang. Meda aku baka nya; meda aku merani nya, sida lalu deka nangkap aku. Aku rari enda bapai-enda bindai tang bepusin-pusin dia. Nyau kelama, sida ke berambatka aku, baru aku ulih ditangkap sida. Sida pan lalu nanchang aku. Naka ulih aku ngerijat deka muka tali tang aku mati akal, nadai daya, abis kira. Aku nadai utai ulih dikereja semina tak rung-rung nyabak. Aku minta tulung bala kitai tang siku pan orang nadai datai. Aku ngadang diri mati nyenggai hari, danjan nyenggai bulan,” ku indai Mulok becherita enggau sabak-sabak.

“Apu. Aruh nuan enda ngetu rauh-rauh ngangau. Nuan enda ngetu-ngetu ngerijat. Lama nuan enda nemu kami. Kenyau ari dini hari kemari, sehari- hari kemari datai ke lemai tu tadi. Alah nyau dipelianka dua iku manang baru nuan nemu kami. Peda nuan tali diambi manang ari rekung enggau jari nuan,” ku orang nunjuk ngagai tali ruran ti diengkah orang ba talam.

“Oh, pia nih. Eh apai iya dih. Antu orang ke ba mimpi nya,” ku indai Mulok, tubuh iya gitik-gitik gelesi.

“Kati ingat nuan ka bagi nembiak ke kena tangkap nya?” ku orang nanya.

Apin indai Mulok nyaut, aku ngasaika dada aku nyau ketap-ketap.

“Bebadi ngapa aku bisi enggau dia,” ku ati aku.

“Mayuh. Tak dipegagaika sida. Sida Engkamat, Kasin, Dum Jalang, Dunggau, Sambang enggau Degat. Sida ke indu-indu bisi mih,” ku indai Mulok.

Jangka enda jauh ari pelaba. Endang bisi aku enggau. Aku takut. Kesal. Enda aku meretika mimpi nya. Degat ke ku iya nya aku. Nya nama aku di rumah panjai. Ini aku lalu ngaul sereta merap aku. Iya pan kesal mih ati jangka aku.

Manang lalu ngelumuka bala nembiak kelebih agi iya ke kena sebut nama dalam mimpi. Bala kami ke bisi dia nyau terimbi duduk semak pagar api. Manang lalu belian baru. Ke sekali tu semina manang Dagang aja belian. Iya nadai agi ngena tiang pancha; nadai agi belian bebunuh tang belian ngelingi pagar api; semina belian mulaika semengat. Udah manang luput, iya pan lalu masukka semengat semua kami. Nyamai amat asai dipegai manang. Berasai chelap jari iya. Tak berasai semengat nya tama ngagai pala nengah bubun aji. Ati aku nyau berasai lantang agi lalu nadai agi takut. Indai Mulok ke remban naka pemalat pan udah nemu kitai. Orang mayuh pan udah gaga kelebih agi ini enggau sida indai Mulok sebilik.

Hari pan nyauka tengah malam. Bau pemakai udah ngaba. Orang lalu begerah makai salau. Bala pan semua terenah makai belaukka dagin manuk gulai upa pisang. Pengingat tu meruan ba aku datai ke maya aku nyau tuai