Agama Adat Iban dalam Politiesme

MIRING… Siti ari ‘spiritual practice’ bansa Iban maya rami melah pinang minta berekat ari Petara.

Tusun Ke-61

ADAT BELAKI BEBINI NITIHKA ADAT IBAN

Udah nya baru iya ka ngarika orang ke empu rumah bejaku baru, lalu disaut siku da. Udah siku, saut siku ga maya seduai ti belaban ngena jaku sempama dalam leka main. Orang mayuh semian mending aja. Enti pangan bukai bisi nemu tau mega nyaup pangan bejaku. Enti lelaki nguai lain agi jalai jaku, lalu lain mega enti iya matak indu nguai. Nya alai, nyau ke pengujung jaku seduai nya, nya baru iya ke ngarika lelaki bejaku ngading adat belaki bebini ari kalia menya ti ditampung kitai ari peturun kita Iban datai ke maya hari tu. Nujongka iya nya penau diri empu ngerintai nitihka peturun aki ini diri empu. Dalam jaku ngading adat semua tiris pantis orang ke tuai dulu kalia ti dikeingatka kitai diatu disebut magang. Nya alai tu munyi pun jaku iya ti ngading adat melaki bini bansa kitai Iban.

JAKU NGADING ADAT

Deka nyimpung semambu ngandung
Tumbuh di perabung rumah raya,
Sengkilung tedung ular naga.
Nya alai pala tak kunda-kunda
Nyuaka jangka tampuk adat.
Nya alai nampung kenang burung achang
Bungkuk belakang ngeruang dada.
Nampong jaku burung apu
Ke dulu meda menua.
Nampung telah burung idah
Siti dilah tiga lubang nyawa.
Nya alai nampung adat aki kitai
Rekaya Lengidi ke buyan
Takut mati parai betu
Berani berumah
Mangkang tisi antara menua.
Nampong adat aki kitai Kumbang Marau
Pengirau danau lepung Majang,
Penebang batang alu penguji,
Entak ke tanah dalam tujuh,
Sagu ke langit tinggi sepuluh.
Nya alai nampung adat aki kitai
Ke benama Rekaya Limping
Berumah di tuchung
Menyaing Bukit Banting.

Abis betimbal-timbal bejaku, nya baru ditampung enggau pengawa betusut. Betusut enda tau enda awakka orang mayuh sereta kaban belayan nemu penyauh enggau penyemak seduai ke jadi melaki bini nya; sekali ke bisi bebelit, salah serak tauka nadai. Enti sema bisi bebelit, salah serak sereta mali, dia orang ke tuai lalu ngaduka enggau adat kena muai pemali. Enti seduai ke jadi nya endang ditemu ukai orang bukai enggau pangan, lalu enda bebelit nadai tentu guna betusut dalam, tang semina nusut ari ni iya serara awakka orang mayuh nemu penyauh enggau penyemak seduai. Enti sema orang jadi enggau petunggal diri menyadi orang nadai nyebut betusut lana nadai pemali.

CHUNTO BATANG TUSUT IBAN

Abu datai ari munggu tinggang guntur beranakka Nising datai ari perenching pandang lambur. Nising beranakka Bedali bejulok tiang balang besegi sarat muat balang bedabong bebini ngambi Antok Nyinok Langgong Tibilong, Dayang Kumang gasing merengung beranakka Beda’am ngembuan perugan danan gelong ke bengkung bebini ngambi Jawai Mupong bepadong tujoh ringkat, mau ke tinjau bekabelap beranakka Beda’ang bejulok api mandang sundang surong, bebini ngambi Dara Saur pengukor mata isau pengundor bala nyerang beranakka Aki Lang Sengalang Burong, Aki Jugu Menaul Tuntong bebini ngambi Indai Kechendai bepantak jerak, Dara Entaba balun kupak. Tang iya tabin bebirin enda pengerai, sakit lengit enda nvamai, pedera renga nadai asai.

Dipesautka Manang Likup, dipelianka Jaban, dipetawaika Gendai, mindah nama disebut orang Endu Sudan Berinjan Bungkong, Endu Diu Tiong Menyalong beranakka Dara Tinchin Temaga, Endu Cherebok Mangkok China belaki diambi Menggin beranakka Sera Gunting bebini ngambi Seri Ngiang beranakka Sera Kempat bebini ngambi Ranjau beranakka Ridoh datai ari buluh bauh rejang belambang belaki diambi Bada beranakka Gupi anak umbung, belaki diambi Belang Pinggang Antu Gerasi, beranakka Geraman bebini ngambi Tebari lalu beranakka Chundau bebini ngambi Beragai lalu beranakka Beti ti bensumbar Berauh Ngumbang ti bebini ngambi Duri lalu beranakka Talak. Beti tujoh kali bebini, tujoh kali balu.

Beti diajar Puntang Raga enda agi ngasuh mantang orang ke beleman salah serak. Ari ajar Puntang Raga tu nya kabuah Beti enda nyadi mantang Abang ke deka jadi mali salah serak enggau Dayang Tali Bunga.

Tusut beserara laban orang kelia baka kitai ke diatu mega, mayuh diri menyadi. Nya alai orang ti nemu tusut nyamai bendar nemu kaban diri.

Nya alai, patut samua kitai ngajar anak uchu ambu kitai betusut, enda iboh tusut dalam, amat ga nemu nusun aki ini diri empu ngagai empat lima serak. Enti orang ke biak enda diajar nama aki enggau ini ti ngadaka apai enggau indai pan enda ga sida nemu. Lebih agi anak kitai ti diau di nengeri lalu begulai enggau bansa bukai. Indah jaku diri empu pan enda tentu terus agi disebut sekeda ti udah dipeda aku empu. Umbas aku ngenang pemanah betusut, nya alai diatu kitai pulai baru ngagai pengerami Melah Pinang.

ADAT MELAH PINANG

Udah orang tembu betusut, enti bisi salah, bisi bebelit lalu diadu enggau adat ti engkeman awakka nadai agi pemali. Enti bisi salah serak mimit, semina tanah tampil, lalu nadai kaul darah getah diri sebilik, nya disebut orang ke tuai semina Bekalih. Nya alai, sida ke tuai pan ngatur adat Bekalih nya ngena duit dua tiga ringgit ti diengkah ba sesingkap pinggai. Udah nya pinggai ti ngundan duit ringgit nya ditungkup, udah nya lalu di kalihka baru telentang. “Nya alai baka nya mih seduai melaki bini tu, semina Bekalih serak aja. Nya alai diatu kami bebala mayuh ngalihka serak seduai tu, awakka nadai pemali mih seduai ke jadi melaki bini tu ba mua Petara sereta kitai bala mayuh.”

Enti sema ukum penyalah bisi pulai ngagai ukum duit ringgit, duit nya lalu dipedua semua orang ke tuai dia ti ngatur adat nya. Enti mimit aja bebelit semina lungga bebelit aja dipinta ngagai iya ti melit. Udah nya baru apai indai indu tauka orang ti dikearapka iya bejaku madahka adat diri empu baka Derian enggau Bungai Pinang. Enti apai indai lelaki nerima adat nya nitihka pinta apai indai indu, sida lalu nyuaka semua utai nya tekala nya.

Udah nya baru ari sida ke lelaki malas madahka pemesai adat aki ini diri, baka penuduk penyandih enggau utai bukai, enti bisi. Apai indai indu mega nyuaka semua adat ti dipinta enti sida nerima. Enti adat indu enggau lelaki enda dipadahka dulu, melah pinang apin tau dipenyadi. Iya tau numbuhka pengachau enggau laya.

Udah nya, baru ngatur adat melah pinang. Terubah, milih indu siku enggau lelaki siku ti endang pemulih utai, chukup penuai, mayuh anak sereta ripih seduai pan ngena, reti nya pangkat unggal. Udah mutuska berapa sirap pinang enggi lelaki enggau enggi indu, nya baru seduai tama ke bilik lalu miring.

Piring nya tadi disimpan begulai dalam selok bebuah dibelit enggau lampit enggau sengkiling laban endang asal bansa Iban keran ke anak tuai nya indu. Nya kebuah ngelagu seluk nya nitihka pekayan indu. Udah chukup adu baka pendiau anak mit dipeda, lalu disandik indu ti dipilih tadi enggau pua kumbu tauka belantan lalu begadai pansut ke ruai. Lelaki tangkup iya tadi udah nganti duduk ba tengah bala di ruai sedia deka nyambut anak nya. Lebuh nya indu pansut nyandik seluk ke ruai dia iya ngeluluka diri nyabak munyi anak mit ti baru ada, lalu ditimang iya mega. Indu bukai mega bisi nulung iya ngaga diri nyabak munyi anak mit. Lalu semua orang mayuh begau ketawa geli ati ke iya dipeda tak bendar gaya. Datai di ruai anak nya lalu disambut apai iya lelaki ti udah dipaduka tadi. Apai iya lalu naka penau ngeluluka diri lalu betimang awakka orang rami ketawa. Udah nya anak nya tadi lalu dikujuk enggau pua kumbu di tengah ruai.

Ripih pengawa udah nya, orang ke empu pengawa pan ngiga orang ke landik nimang diasuh ninduk enggau ngerak anak nya tadi. Udah bulih orang ti diasuh nimang, semua pengabang mayuh jenuh, enda inggar mendingka pemanah nyawa enggau leka timang. lya ke nimang nya duduk nunga kujuk anak nya. (Alli Majang 1972)

JADI MELAKI BINI CHARA BUKAI

Bansa Iban ti udah megai agama Kristin, bisi chara sida empu ngatur adat jadi melaki bini nitihkka ajar gerija sida empu. Ngena undang-undang Perintah Menua Sarawak / Malaysia nya sebengkah ari jalai ke baru maya hari diatu. Enti orang ke salah nadai utai kena betimbang, sida tau kena tinggang ukum jil nitihka undang-undang sivil. Nya mih, naka ulih mih kita Iban ngetanka lalu nagang adat pemali beleman / jadi melaki bini ti salah serak / peturun, laban pemali tu ukai semina ditagang ba agama Adat Iban aja tang endang ditagang semua pengarap / agama di dunya tu. Reti nya beleman tauka jadi mali melaki bini mega endang ditagang Petara / Bunsu Petara ba mensia dunya.

Nya mih atur / adat jadi mali nitihka pengarap / agama Adat Iban. Terima kasih ke gambar ti dikirumka kita ngagai aku ke guna dalam Sada Sarawak tu. Engka nyema bala pemacha bisi utai tanya, tujuka ngagai whatSAp tu: 013 8325146.