PETARA, ANTU… ANTU…!

BEDARA… Tuai Pengabang YB, Menteri mega suah diasuh nyadi Tuai Miring.

Tusun Ke-38 

KUASA MISTIK ANTU BUNSU PETARA       

Bepelasarka  penemu  litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’  dibagi ngagai  tiga raban iya nya: (1) Kuasa mistik Petara (God, Almighty, Tuhan, Allah Taala) (2) Kuasa mistik Antu (Dewa Dewi) (3) Kuasa mistik Antu [Sitan, Jin, Iblis, Sihir, etb].

Minggu tu Aku mai kita pindah baru ngagai gintir pansik pasal Kuasa Mistik Antu Bunsu Petara. Ba Tusun Ke-37 tu aku deka fokus ngagai jurai pasal kitai Iban ti agi megai  Agama Adat @ ukai Keristin. Munyi ku utai ti udah ditulis aku ngelama tu, Antu Bunsu Petara bisi dua raban: (1) Sengalang Burung enggau tujuh iku diri menyadi (2) Orang Panggau Libau enggau Gelong.

CHARA NGANGAU  ANTU BUNSU PETARA

Asal Gawai Dayak ti diintu bansa Dayak Borneo bepun ari pengerami ti nanda ujung musin ngetau lalu pun musin bumai baru. Di sekeda menua gawai tu disebut Gawai Batu laban iya bepun ari pengawa ti nimang Batu Pengansah. Semua perengka kena bumai baka batu, duku, pengait, kapak, seluk, sintung, lanji disimpan dalam pandung ti ditimang maya gawai nya. Tuju pengawa tu iya nya minta Antu Bunsu Petara ti benama Sempulang Gana merekat semua pekakas bumai nya tadi. Menyadi Sempulang Gana ti benama Inne Inda seduai Raja Menjaya mega bisi dikangau maya nya. Seduai tu Iyang Manang bansa Iban ti ulih ngelindung sereta ngubat mensia ti tabin kena kachau Antu jai. Kelimpah ari nya, Sengalang Burong sereta menyadi iya ti bukai mega bisi dikangauka Iban ngintu Gawai Dayak nya.

Maya Gawai Dayak nya mega sekeda bansa Iban bisi ngintu gawai bukai baka Gawai Sandau Hari, Gawai Tuah, Gawai Mangkung Tiang enggau ti bukai mega. Maya Antu Bunsu Petara ari Panggau Libau enggau Gelong mega bisi dikangau datai ngabang. Lebuh ti ngintu gawai ti bepelasarka Kuasa Mistik Antu Bunsu Petara, bansa Iban patut nguna Lemambang tauka Manang.  Anang sengapa intu enggai ke enda betul lalu tau kena sumpah Antu Bunsu Petara.

Semua pengawa gawai nya tadi endang dipunka enggau piring ading ti nyadi ke pemakai enggau ai irup pengabang mistik nya. Perengka piring patut bisi buah pinang, sirih, kapu, engkelait, daun ruku, semakau, asi amat, asi pulut, garam, tumpi, rendai, sungki, ketupat  enggau ai tuak. Perengka lauk nyengkaum ikan salai, ikan pansuh,  ikan kasam, telu manuk  tauka bansa lauk bukai bepanggai ba sesebengkah menua. Pia mega, tusun pinggai piring bisi atur ti menyana nitihka tikas turun piring  Tujuh, Lapan tauka Sembilan.

MAYUH BENGKAH GAWAI BESAI

Orang ti patut nyadi tuai miring  ba pengawa  gawai besai iya  nya Lemambang tauka Manang lalu dibantu orang bukai nitihka peneka orang ti empu pengawa nya. Ba pengawa mit ti disebut Bedara ngelaluka penatai temuai, suah mega Tuai Pengabang baka sida YB, Menteri nyadi tuai miring. Udah pengawa miring tembu pengawa bebiau pan berengkah. Ba gawai besai baka Gawai Burung, Gawai Antu, Sandau Hari, Gawai Tuah, Gawai Kelingkang enggau ti bukai lalu orang ke dipadu bebiau iya nya endang Lemambang tauka Manang.  Kebuah pia, laban mensia dua iku tu endang semak sereta landik pasal tusut sereta tusun sida Antu Bunsu Petara ti patut dikangau ngagai sebengkah gawai nya. Ambi ke chunto, ba Gawai Burong, Antu Bunsu Petara ti dikangau datai ngagai gawai nya, Raja Sengalang Burong tujuh iku diri menyadi. Ba Gawai Sandau Hari ti ungkup ke  orang ti deka nurun nyadi sedadu, Antu Bunsu Petara ti dikangau lalu merekat pengaruh sida iya nya Orang Panggau Libau enggau Gelong. Nya semina chunto aja lalu mayuh agi  bansa gawai ti bukai nitihka penemu Lemambang tauka Manang. Taja pia, enti nadai dua iku orang ti ngembuan kuasa mistik Antu Bunsu Petara nya, kati ku enggau: sida bukai ti udah dipaduka orang ti empu gawai nya pan tau enti iya bisi penemu ba pengawa bebiau. Kebuah pia, laban sampi dalam biau bisi nyebut nama Antu Bunsu Petara ti patut dikangau. Enti sampi dalam biau nya salah sebut tauka salah Antu Bunsu Petara  ti dikangau,  pengawa Gawai tauka Bedara nya tentu nadai nguna, nadai tuju. Ukai semina nya aja tang tau ngasuh orang ti empu pengawa nya ditinggang penusah. Ingat…sumpah Antu Bunsu Petara amai bisa sereta enda ulih tawar mensia dunya.  

BANSA MANUK DIKENA BEBIAU

Manuk ti dikena bebiau iya nya patut manuk lanjau tauka manuk lelaki. Udah dikena bebiau manuk nya patut disayat. Darah manuk nya patut dikena ngelut bulu sayap manuk nya tadi lalu nyadi genselan piring enggau orang ti empu gawai. Kekadang Lemambang tauka Manang  biau deka nguna dua iku manuk lelaki lalu seiku ari manuk nya tadi mesti disayat mega. Tentu kita kala ninga pasal manuk ti udah dikena bebiau maya Gawai Sandau Hari  tang enda terus disayat; manuk nya tadi mati kekejuk taja nadai utai dipeda negu iya. Nama penemu kita pemacha? 

Pekayan orang ti empu pengawa gawai nya patut ngena Baju Burong tauka ngepan tadisional tauka baju ti gap-gap. Anang sekali-kali ngena pekayan ti enda menuku tauka enda bebaju. Kebuah pia, lebih-lebih agi orang ti empu pengawa nya deka nyambut pengabang mistik Antu Bunsu Petara ti dikangauka sida nya.  

NGINTU GAWAI NGENA AGAMA

Bansa Iban ti agi ngemeranka pengawa bumai betaun lalu udah megai agama Keristin, ngintu Gawai Batu tu ngena chara Keristian (Katolik).  Malin  tusun pengawa sembiang tu  tau dipeda ba Bup Bacha Taun A, B, C. 

Pia mega Gawai Dayak 1 Jun  mega diintu bansa Iban Keristin ngena chara Keristian mega. Malin tusun pengawa tu mega tau dipeda bup bacha nya mega.

Nya mih, kuasa mistik Antu Bunsu Petara dalam pengawa Gawai tauka  Bedara ti bepunka Piring Ading. Nya mih, kitai Iban ti agi megai agama Adat tu patut  bejimat-jimat sereta enda sengapa  pengawa dikereja maya ngintu Gawai tauka Bedara ti bepelasarka kuasa mistik ti baka tu. Sekeda pekara ti dibantaika aku dalam artikel tu semina pelasar aja. Mayuh agi pekara ti lenak agi pasal adat Gawai / Bedara sereta Piring Ading ti patut ditemu kitai Iban ti agi megai pengawa Agama Adat tu.

Pia mega, mayuh agi kuasa mistik antu Busnu Petara tu ti agi dalam pansik aku. minggu ti deka datai nyin ila.  Enti sema kita bisi utai deka ditanya tauka bekunsi penemu pasal tiga kuasa mistik nya, tau SMS  HP: 01114019115 / 0138475146 tauka emel: harry.usup55@gmail.com. Munyi ku aku ngelama tu mega, tuju aku mansik kuasa tiga kuasa mistik tu mega ukai tuju deka 叢romote・: aku semina  bebagi penemu enggau pemacha lebih-lebih agi bansa kitai  Iban ambika kita bisi penemu dalam tiga kuasa mistik tu. Ni bagi ti dipechaya sereta diguna kita dalam jalai pengidup kita, nya pilih sereta bepanggai ba ati kita empu: nadai ulih pejal.