Modelling enggau pemacha berita TV

SITI ari sekeda klip video Tubai Pengerindu.

MODELLING enggau TV Presenter nya dua bengkah pengawa ti nyau deka sebaka. Kebuah pia laban iya sama-sama begunaka pemanah gamal enggau pengelandik bejaku. Modelling nya pengawa mantaika mayuh macham pisin pekayan enggau (product) bukai lalu TV Presenter nya penyampai tauka pemacha berita ba TV. Sida tu orang ti dipilih; ngembuan skil ti tinggi ba pengawa ti dikereja sida.

Berita pemerindang minggu tu deka bekunsika berita enggau cherita ari siku dara bajik ke suah udah enggau orang masuk pekit pemajik gamal (beauty pageant) lalu baru ngujika diri nyadi model klip video lagu Iban. Maria Madelina Sujie madahka umur diri 24 taun, gawa nyadi penyampai berita TV (TV Presenter) ba TV Sarawak di Kuching. Ngembuan prinsip idup deka nyadi orang ti mujur dalam  pengidup,  Maria mega bepegai ba motto idup iya Agi Idup Agi Ngelaban. Taja agi biak Maria udah nemu nyaga ulah enggau perangai diri. Dipeda baka indu ke imun gaya, Maria enda sumbung lalu kemerah sereta jampat teleba enggau semua orang. Nyangka nya meh siti ari perangai ti patut dikembuan sida ke nyadi kumang enggau model.

PEKIT PEMAJIK ENGGAU MODELLING

Taja umur iya baru 24 taun, Maria udah suah enggau orang masuk pekit pemajik gamal (beauty pageant); suah menang tang kala ga alah.

“Aku udah suah enggau orang masuk pekit pemajik gamal tauka kumang / beauty pageant. Terubah iya dalam 2014 ke alai aku enggau pekit kumang Siol Kandis enggau Siburan. Aku menang ba dua bengkah pekit nya lalu dalam taun 2017 ba pekit Queen of The Queen of Sarawak aku mega menang. Nambahka nya aku mega bisi enggau masuk pekit Miss Sarawak Earth. Ba pekit nya aku semina bulih lumur dua. Aku dipilih nyadi ambassador, wakil Malaysia ba Miss Malaysia Earth 2017 nya. Peneleba aku ari suba meri peransang ngagai aku. Ba Pekit Raban Ngepan Iban Negeri Sarawak taun 2017 aku semina bulih lumur dua lalu pengudah nya aku bulih gelar Miss Photogenic Pesta Benak lalu Top 5 ba Miss Tourism Benak nya mega,” ku Maria becherita pasal pekit ti udah kala dipasuk iya.

MODEL KLIP VIDEO LAGU IBAN

Ditanya pasal pengawa nyadi model klip video lagu Iban, Maria madahka diri sebedau tu udah kala nyadi model ba album pemadu baru Maxwell Franklin Saran, Dara Manis.

“Keterubah iya aku nyadi model lagu iya nya ba album Dara Manis ari Maxwell Franklin Saran. Mayuh utai baru ti dipelajarka aku. Iya enda sebaka enggau disiplin ba pengawa bepekit kumang tauka ‘beauty pageant’ ti bukai. Taja pan pia, aku berasai temegah laban dipilih nyadi model album artis popular. Kelimpah ari nya aku mega ulih belajarka mayuh utai ti baru,” ku Maria sekali agi bekunsika peneleba iya nyadi model klip video lagu.

KLIP VIDEO TUBAI PENGERINDU

Ari perangai iya ti enda ngeninggi diri, Maria majak dikerindu ba dunya modelling. Kena 22 August 2018, Maria sekali agi dipilih ba klip video lagu Tubai Pengerindu ari Isa Lee.

“Taja pan aku nyadi model ba siti lagu Tubai Pengerindu tu aja tang aku bulih mayuh penemu baru. Jalai cherita siti lagu ke siti lagu enda sebaka. Baka nya model tauka artis ti enggau kitai dalam video nya tetap enda sebaka. Kelimpah belakun ba video aku mega berasai gaga begulai enggau bala ke sama mantu (crew) ba klip video tu.

“Taja hari panas terit di tebing tasik Pandan Lundu tang bai ati ti lantang semua penanggul enda terasai,” ku Maria ke madahka diri enda sabar nganti peluang baru nyadi model ba klip video lagu artis Iban ke bukai.

Lebuh dipinta meri komen pasal lagu Tubai Pengerindu, Maria dulu madahka diri berasai temegah ke lagu Iban maya ke diatu. Lagu enggau muzik kitai Iban diatu  nyau udah mayuh amat berubah manah agi.

“Ba aku, Tubai Pengerindu bisi bida mimit ari lagu bukai; ukai reti lagu bukai enda badas. Tubai Pengerindu ngembuan muzik enggau vokal ti nyelai ari lagu bukai. Leka lagu Tubai Pengerindu mega mai reti ti chukup dalam laban cherita dalam lagu dikenataika ngena leka jaku ti alus lalu tau ngasuh ati chelap. Aku chukup rinduka lagu tu,” ku Maria.

PESAN

Ngagai nembiak rebak baru ke bisi ati deka nyadi model, Maria madahka pengawa nya begunaka pemerani.

“Pengawa nyadi model ukai pengawa ti kelalu mudah. Pemajik aja engka bedau chukup laban kitai mega patut nemu mayuh skil enggau penau ke bukai. Sida iya mesti nyendiaka diri dulu ari segi mental enggau fizikal diri. Pekit kumang enggau pekit pemajik ke bukai begunaka IQ enggau mayuh bansa penemu tauka ‘general knowledge. Point tauka mark diberi ukai semina ba pemajik tang mayuh kriteria ke bukai. Nya alai, sebedau masuk pekit kitai mesti nyendiaka diri ari semua pekara,” ku Maria ngujungka randau kami duai.

Kitai arapka Maria terus mujur nyadi modelling enggau pemacha berita TV. Enda mayuh orang bulih pegawa ke bansa nya lalu ngena peluang tu kitai arapka iya nguna peluang nya enggau pengabis manah.  Nambahka nya, kitai mega arapka Maria bulih sukung tauka ‘support’ ari sida sebilik sereta orang ti dikesayauka iya laban nya siti ari pekara ti nentuka pemujur siku-siku orang ba dunya pemerindang ke ‘sensation’ sereta enggau gosip.

Oleh DIKARANG MR TUBAI PENGERINDU