Dayak, Iban Borneo

TENGAH LAMAN… Rumah panjai bansa Iban nyadi lambang daya idup segulai sejalai dalam semua pengawa.

DIB Tusun Ke-41

IBAN ENGGAU MELAYU NADAI KALA BEMUNSUH 

Sema bisi orang ti ngelanggar adat nya, sida nya deka ditinggang penusah baka diserang, dibunuh tauka diburu ari tanah nya. Ari Nanga Rembai, Abang Drahman ngelawa Batu Embawang semak Lubok Brutan lalu betemu enggau Tuai bansa Iban ti benama Rusak ba umai iya. Maya ti betemu dia, Abang Drahman madahka diri deka minta pemendar ari Rusak laban iya deka mai bala nembiak iya berumah lalu diau mendam ba Nanga Buling.

Ku iya, enti bala sida Melayu diau di menua nya, ulih ga sida nyaup bala Dayak Iban ngetanka menua nya ari munsuh, engka deka ngachau menua nya. Ninga munyi nya, Rusak minta Abang Drahman bemalam ba rumah iya malam nya laban iya deka bepikir dulu sebedau ngisi peminta iya nya. Tiga hari udah nya baru Rusak nyebut pasal peminta Abang Drahman nya.

“Tusah sereta lama aku bepikir pasal peminta nuan nya, unggal. Kebuah pia, laban aku mikirka utai dudi hari ba bala peturun ichit wit aku jemah ila. Sida nya ila mayuh begunaka tanah endur sida beridup bumai betaun, betanam betupi. Enti bala nuan nyau mayuh-semayuh diau ditu ila, kati ku anak telesak ichit wit aku ila. Tusah aku deka ngaga pemutus runding nya tang…laban aku ngenang kita Melayu enggau kami Dayak Iban di Batang Saribas manah amai begulai, baka diri menyadi, baka diri sekaban belayan, enda kala belaya enggau pangan diri. Sinu ga aku meda nuan. Nya alai aku mega arapka anak telesak uchu ambu ichit wit tua ila enda belaya mega. Taja kita Melayu beagama Islam kami Dayak Iban ukai…, arapka kitai Dayak Iban-Melayu ditu ila pan enda belaya, beserakup taja nama-nama bisi penusah datai. Nya alai, enggau sempekat nya aku ngemendarka nuan sereta bala nembiak nuan diau lalu bumai betaun di Nanga Buling,” pia ku Rusak.

SEMPEKAT ANTARA IBAN ENGGAU MELAYU

Asai ke deka nyabak ati Abang Drahman ninga jaku Rusak laban ti kelalu gaga ninga pemutus runding Rusak. Sinu ati iya ninga pemanah sereta penyiru jaku Rusak. 

“Terima kasih sereta…meri puji ke nuan, unggal. Manah amai ati nuan. Nya alai, aku pan setuju enggau penemu nuan nya. Ila mih aku madahka bala anak telesak uchu ambu ichit wit aku di Nanga Buling ditu ila; enda ngasuh sida belaya enggau kita Dayak Iban. Nama-nama penusah kita Dayak, kami Melayu sigi enggau kita; betulung-tulung mih kitai,” pia ku saut Abang Drahman.

Laban ti endang ada di Saribas lalu bebakih enggau bansa Dayak Iban Saribas, landik amai munyi Jaku Iban iya. Munyi bansa Dayak Saribas, Dayak Sebuyau, Dayak Balau nya mih iya bejaku ngena Jaku Iban.

“Manah mih penemu nuan nya, unggal. Aku arapka peturun anak telesak nuan ila, sepenemu enggau nuan tu ga. Nya alai, baka tu tanah ti tau endur bala nuan diau lalu bumai betaun, unggal: di Sungai Paku berengkah ari nanga ngagai Batu Embawang lalu terus  ke Bukit Dadak lalu rurus ke baruh ngagai Ulu Sungai Lalau enggau Lubok Nangka di Sungai Buling; ari Lubok Nangka niti garis menua tu terus ke pun kayu Mengeris Bejampang lalu ke Tapang Genong; ari nya, niti garis antara menua ari tengah Tanjong Pedada kanan ngili Batang Saribas,” ku Rusak seraya nunjuk ngagai kelai enggau antara bagi menua nya.

Seduai bejalai lubah-lubah betunda udi nengah damun, pengerang enggau kampung, niki bukit, nurun bukit.

“Ami sereta manah amai rampa menua tu, unggal. Gaga bala nembiak aku diau di menua tu ila, unggal. Arapka bala peturun anak telesak tua diau enggau lantang senang ditu ila,” ku timbal Abang Drahman.

“Nya mih, arapka peturun anak telesak ichit wit nuan jemah ila ngenang budi peturun anak telesak aku mega. Nambahka sempekat ti udah disebut aku tadi, munyi tu iya: bansa Melayu enda tau bumai ba tanah Dayak ti bisi tumbuh buluh; pia mega bansa Dayak enda tau bumai ba tanah Melayu ari Batu Embawang ke ili endur rumput melai tumbuh sebelah tebing kanan enggau kiba Sungai Paku,”pia ku penerang Rusak.

Udah seduai setuju enggau sempekat sereta penemu pangan diri, Abang Drahman pan mulaika diri ngagai Semaruang lalu nguluka bala nembiak iya pindah ke Nanga Buling. Sida bukai ti enda pindah ke Nanga Buling, pindah ke ulu Rimbas; sekeda pindah ke Sungai Layar lalu diau mendam di Nanga Undai enggau Tanjong Belong.

Udah Tindin seduai Rusak parai, anak telesak peturun seduai nya idup senang lantang dalam pemaik di Batang Paku nyentuk ke jeman Saang seduai Busu; kenyau Entingi sereta bala nembiak  Baketan iya pindah ke Julau enggau Kanowit.

SEMPEKAT ANTARA UYUT ENGGAU AWAN

Maya Uyut ti bensumbar ‘Bedilang Besi’ seduai Awan nyadi tuai di Paku Ulu enggau Paku Ili, seduai ngaga sempekat enggau adat nirika rumah panjai: (1) Semua rumah panjai mesti digaga nebing sungai, ambika mensia  mayuh nyamai mandi, nyauk ai lalu bejalai kin kitu ngena perau. (2) Orang ti empu tanah ti endur berumah nya enda tau nagang bala kaban belayan ba rumah nya nirika nampung rumah panjai nya. (3) Semua sida ti ba rumah panjai nya enda tau nanam kayu buah lebih ari lima depa ari  bilik rumah sida nya. (4) Enti rumah panjai nya nyau nyadi tembawai lalu ditinggalka sida pindah, semua pun buah ti ditanam ba senentang bilik sida nya deka diempu bala anak telesak orang ti nanam pun buah nya.

Uyut ‘Bedilang Besi’ nya tuai kayau ti pama, kering sereta tebilang jeman nya. Kebuah pia, laban iya mayuh bala anak, anak menyadi sereta menantu ti endang bujang berani ti kempang ati. Kena iya nyambut pemenang maya ti ngayau ngelama tu, Uyut nirika Gawai Burung di Lubok Jalu di ulu Nanga Sungai Lingit di Ulu Sungai Anyut. Ba gawai tu iya ngaga replika Burung Kenyalang. (Replika Burung Kenyalang nya ditabanka rumah Senunok ti angus taun 1944)

ASAL TIMANG JALUNG

Uyut ‘Bedilang Besi’ mih tuai bansa Iban ti keterubah nukar chara asal maya ti ngirup tuak bujang berani maya Gawai Antu. Uyut enggau anak iya sereta menantu iya enggai ngirup ai tuak nya, enti enda disua ngena adat Timang Jalung. Nya alai, ari peminta Uyut tu mih Timang Jalung agi dikena orang ngintu Gawai Antu ke sida bujang berani ti udah danjan telempai ba pintu Sebayan.

BRMUNSUH DISABUNG JAMES BROOKE

Berengkah ari Uyut ‘Bedilang Besi’ nyentuk ngagai ichit wit iya ti ngangkatka nama iya Uyut II (Apai Linggir ‘Mali Lebu’), Iban Paku agi bemunsuh enggau Iban Sebuyau enggau Dayak Iban Balau. Sida ti bemunsuh tu ukai ari dendam peturun aki ini ti dibai sida ari Batang Kapuas dulu kelia tang mih laban ari sabung perintah Raja James Brooke kenyau ari taun 1841. Pekara ti bendar iya nya bansa Iban Sebuyau enggau Iban Balau endang nanahka perintah Rajah Brooke tang Iban Paku ngelaban tegal ti enggai dipegai perintah Raja Brooke. Kelimpah ari nya, Dayak Iban Paku mega tampak bemunsuh enggau raban bansa Seru, Beliun, Baketan laban sida tu ti dulu ngachau lalu munuh Dayak bansa Iban sebelah kampung enggau langkau umai.           

Lebuh Jantan, uchu Awan, nyadi Tuai Iban Paku Ulu, iya endang ukai tuai bujang berani. Nya alai iya irau amai ati laban ti dikelingi basa Seru, Beliun enggau Baketan ti selalu tasah di Julau enggau Kanowit lalu pindah ke Paku. Nya alai, hari siti iya mai nembiak iya ti benama Sapitan nurun lalu meratika munsuh, engka bisi deka ngayau menua sida di Paku Ulu. (Sources of Iban Tradisional History, Benedict Sandin, 1994)

Nya mih asal penatai sekeda ari bansa Dayak ‘Ibanic Group’ ti bukai ngaga menua Sarawak, ti bekaul jaul segulai sejalai enggau bansa Melayu Sarawak ari jeman kelia. Kenyau ari kelia dalam sejarah Sarawak, bansa Dayak (Iban) enda kala bemunsuh enggau Melayau Sarawak. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal  nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146  

DITULIS Harry Usup Umbar (B.Sc Hons. Human Development, UPM)