Dayak, Iban Borneo

DIB Tusun Ke-42

IBAN ENGGAU MELAYU NADAI KALA BEMUNSUH

Seduai bejalai nurun bukit, niki bukit, nujah emperan neresa babas, mansa kampung lalu niti ninting ulu Sungai Puan enggau ulu Paku. Enda lama udah nya hari pan nyau jauh lemai lalu petang. Seduai pan ngiga endur ngaga langkau arau endur bemalam ba Bukit Buluh. Tumu pagi nya seduai pan mupuk baru ari Bukit Buluh niti tinting antara Sungai Gerenjang enggau Sungai Krian sereta Sungai Randau nuju Bukit Tangga Sadau nyentukka ngagai Bukit Medang. Ari nya seduai bejala baru nuju Bukit Lubang Remaung ti alai seduai bemalam baru kedua malam.

Malam nya Jantan tinduk enda jauh ari lubang gua. Maya ti tinduk nya iya bisi mimpi meda seiku indu benung duduk semak iya.

 “Ari ni penatai seduai tu, unggal,” pia ku indu nya.

“Kami duai Sapitan tu datai ari Ulu Paku. Nya mih kami tu pulai ari Bukit Buluh laban ti deka meratika pengelikun menua kami tu. Engka bisi munsuh deka ngachau menua kami,” ku timbal Jantan.

“Oh pia…! Anang irau nuan, unggal. Nadai seiku munsuh ulih tama menua Ulu Paku tu ari diatu nyentuk ke ila. Aku tu mih  Antu Bunsu Remaung ti nyaga menua Ulu Paku tu ari munsuh,” pia ku timbal indu nya tadi.

Jantan pan tedani. Agi belala berandau enggau indu nya. Asai ke ukai mimpi, ku iya bejaku dalam ati.

Amai ga mimpi Jantan nya. Kenu ku orang tuai, udah Linggir “Mali Lebu” ti ngayau Baketan di Sugai, Julau bala munsuh nya deka bebalas lalu ngayau orang Paku. Ba tengan jalai ke Ulu Paku bala bujang berani munsuh nya tadi kena rampit penyakit gemulut. Mayuh sida mati lalu sida ke agi idup nikal mulaika diri. Pengamat ti kedua iya nya; lebuh perintah deka ngayau Linggir “Mali Lebu” di Ulu Paku  taun 1843 enggau taun 1849 bala Rajah semina ulih ngampil naka Nanga Anyut, iya nya di ili menua Jantan maya nya.

BAKETAN, SERU ENGGAU IBAN

Lebuh Mawar nyadi Tuai di Bangat enggau Ili Layar, Baling nya siku bujang berani ti regas amai di Ulu Skrang. Baling suah ngayau bebalas ba bala Baketan Skrang ti udu ngachau bala Iban ti ngasu beburu di kampung. Nya alai mayuh bala Baketan Skrang rari ke Kanowit lalu diau sebelah menua Sungai Ensiring, Sungai Mujok enggau Sugai di Sungai Julau. Udah Baling parai tuai, anak menyadi iya Nyaru anak Bakar nganti iya. Nyaru agi bedendam lalu ngayau bansa Baketan Paku di Nanga Deran. Kayau Nyaru tu nyadi maya jeman Uyut “Bedilang Besi” nyadi Tuai di Paku Ili enggau sungai Anyut. Maya nya Iban Ulu Paku nadai Tuai udah parai Blaki ti dibunuh bansa Seru. Maya nya anak Blaki ti benama Bayang seduai  Ugap, agi biak amai deka nyadi Tuai. Nya mih kebuah, maya Awan di Padeh deka ngambi Lada ti agi nembiak gamal, ulih diterima Bayang seduai Ugap sereta bala kaban belayan seduai, nyengkaum aya sida Uyut “Bedilang Besi”.

Ku iya, menua Ulu Paku mesti ditanka ari ti dialahka bansa Seru ari Krian ti selalu ngayau kin. Maya nya Uyut “Bedilang Besi” ninggalka bala anak menyadi iya nya laban ti nguaika bini iya Nangku anak Tuai Iban Paku Ili enggau Sungai Anyut.

Udah ti ngalahka Baketan Nanga Sungai Deran, Nyaru pindah ari Ulu Skrang ke Paku nitihka anak iya Libau. Maya nya Nyaru seduai Libau sama ukai tuai, sebedau anak Libau ti benama Kaya jadi enggau Sawai anak Lada seduai Awan. Sawai nya peturun aki iya Busu, apai Uyut “Bedilang Besi”. Menyadi Nyaru ti benama  Rabiah nya indai Mujah “Buah Raya” ti pindah ari Paku lalu nyadi Tuai bansa Iban di Kanowit ti tebilang.

Udah Kaya parai, anak iya ti benama Jantan nyadi Tuai Ulu Paku. Udah iya nyau tuai bendar, Jantan ngasuh semua anak iya ninggalka bilik iya magang awakka tau nyadi Tuai ba rumah panjai ti bukai nebing sungai Ulu Paku baka tu: Libau “Buban” bedau nguan sebilik enggau Jantan di Nanga Samu. Saing nirika rumah panjai di Jukun. Laus seduai laki iya ti benama Lanchang patut diau di Nanga Buong, lalu Kadir seduai Langan patut diau di Danau.

Udah Jantan parai tuai, anak iya Libau “Buban” nyadi Tuai di Ulu Paku. Libau ukai bujang berani baka apai iya, tang iya rurus ati sereta landik megai nembiak iya. Lebuh Libau nyau tuai bendar, Kadir, Danau enggau Langan beserara ari pangan diri. Kadir enggau bala nembiak iya diau di Penom. Danau diibun anak iya ti benama Unchi. Langan nirika rumah panjai di Meroh, semak Ulu Paku. Kira-kira maya nya mih anak Libau ti benama Kaya II enggau Ugat bebini. Kaya II agi sebilik enggau apai iya lalu Ugat nguaika bini iya lalu sebilik enggau entua iya Langan di Meroh. Menyadi indu sida ti benama Jata belaki jadi enggau Kadir anak Orang Kaya Linggang di Rimbas. Udah iya belaki, Jantan ninggalka bilik apai iya lalu diau kediri ba rumah panjai nya mega laban aya iya Saing pindah ari Jukun ke  Batu Genting.

KEBUAH DAYAK IBAN CHARUT

Nya mih, maya Dayak Iban datai di Sarawak, menua tu agi dipegai Sultan Berunei enggau Sultan Johor. Maya nya sekeda pemesai-pemesai Sultan  enda rurus ati sereta ngambi peluang ngindik sereta munuh bala Iban ti dikumbai sida enggai mayar pupu. Indu bansa Dayak, Iban ti bajik-bajik diambi sida ke gundik  indu simpan. Nya ti ngasuh bala tuai-tuai kayau Iban baka Unggang “Lebur Menua”, Orang Kaya Pemancha Dana “Bayang” ringat lalu malas dendam ngayau sebelah menua nebing tasik nyentuk ke Sambas di Kalimantan, Indonesia. Bala Iban ti ngayau tu pan ukai ari penemu diri empu aja, tang ari asuh lalu ditulung Orang Panggau –Gelong lebih agi Sempurai “Bungai Nuing”, Kumang enggau Kelinah “Indai Abang”. Nama kebuah baka nya? Engka sida Antu Bunsu Petara tu agi ingatka diri ti datai ari peturun Bejie seduai Sengalang Burong, kini?

Jeman Perintah Raja Brooke bansa Dayak Iban charut  enggau diri sebansa Dayak Iban. Sekeda tuai kayau Dayak Iban nyau bemunsuh enggau pangan diri baka: Bantin “Ijau Lelayang” enggau Ngumbang “Berauh Langit”;  Libau “Rentap” enggau OKP Nanang enggau ti bukai. Taja pia, sida enda bedendam laban sida nemu sida semina bemunsuh enggau Perintah Raja Brooke, ukai bemunsuh enggau bansa diri Dayak Iban. Nya alai, penyarut nya enda ulih nyekat bansa Dayak Iban ti betuaika Mujah “Buah Raya” berimba bumai betaun lalu diau mendam di serata menua sungai Batang Rajang. Jeman Raja Charles Brooke bansa Dayak Iban majak  begigaka menua baru lalu bempu menua sebelah Mukah, Balingian, Bintulu, Miri, Lawas, Limbang nyentuk ke Berunei enggau Sabah. (Sources of Iban Tradisional History, Benedict Sandin, 1994)

(Betampung ba Tusun Ke-43 minggu nyin ila)

Nya mih asal penatai sekeda ari bansa Dayak “Ibanic Group” ti bukai ke menua Sarawak, ti bekaul jaul segulai sejalai enggau bansa Melayu Sarawak ari jeman kelia. Kenyau ari kelia dalam sejarah Sarawak, bansa Dayak (Iban) enda kala bemunsuh enggau Melayu Sarawak. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ ke dulu  mungkal  nanjar bansa Iban maya sida bepindah ngiga menua baru endur bumai betaun.

Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146  

Ditulis Harry Usup Umbar (B.Sc Hons. Human Development,UPM)