Dunya Pemerindang Semampai besabar ba semua jalai pengidup

UKAI senang deka senang’, ‘Orang sabar selalu untung’. Enda tentu senang diau ba dunya injau tu kelebih agi enti kitai nadai prinsip enggau lalau idup ti bebatang. Dua rambai jaku di atas nya sigi bisi pemendar lalu suah udah kala diasaika kitai. Semua

juluk ati enggau pemujur pengawa ba dunya tu enda tentu ulih diperumban kelebih agi enti utai nya bekait enggau nasit tauka jereki. Enggai tauka deka kitai enda ulih enda besabar lalu nyerahka iya ngagai Tuhan / Petara kitai.

PUN PENGAWA BELAGU

Suah udah nyadi champion lalu kala mega alah ba pekit belagu di Sibu, Kapit, Song enggau Sarikei, Diana Ant Blikau (DAB) terubah ngerikot lagu dalam taun 2011; album lagu krismas Iban begulai enggau Lezweeta, Aneth Alan enggau Anthony Akih. Raban

sida maya nya diberi nama Hossana ari kompeni Network Twenty One ba Accoustic Sound Studio.

Dalam taun 2013 DAB ngerikot album kompilasyen begulai enggau Apai Saloi, Farid Spencer enggau Suzanna. Ba album Sada Nyawa Bungas nya DAB mai dua iti lagu iya nya Jerungkang Tajam Gerenyam enggau Sayauka Nuan. Nangkanka nya DAB sekali agi ngerikot single begulai enggau OCHSP enggau lagu Telih Ati Aku. Taun 2016 nyadi taun ti chukup besai reti ba DAB laban iya nyadi artis OCHSP ti bendar.

ALBUM BUJANG RECOND

Album Bujang Recond ngundan lapan iti lagu ti digaga empat iku komposer ke nyengkaum Jesley Jabu, Matthius Mambang, Daniel Ugih enggau Oliver Christy.

Semua muzik ba album nya mega digaga Oliver Christy lalu sekeda gitar solo ari Kennedy Lichon; siku gitaris ari Saratok.

Lapan iti lagu ti dipilih nitihka sera peminat lagu Iban maya kediatu nya Bujang Recond, Bujang Narit Ati, Pengujung Pengerindu Tua, Dap Dip Dup, Pengerindu Keterubah, Makin Tuai Makin Sayau, Pengerindu Tua Nyata (padu nyawa enggau Ronney Bukong) enggau Jerungkang Tajam Gerenyam.

SAMBUT PEMINAT LAGU IBAN

Ditanya baka ni gaya sambut peminat iya ba album Bujang Recond, DAB madahka diri chukup gaga enggau sambut ari peminat iya.

“Naka ke diatu aku puas ati enggau sukung ba album tu. Diatu album tu udah dijual di serata Sarawak lalu sapa ke bedau meli tau ngiga iya ba kedai nyual CD di serata Sarawak.

“Kelimpah ari meli terus ba kedai, kita mega tau meli ari aku empu tauka ari OCHSP,” ku DAB ngepunka saut iya ba randau kami duai.

Ngenang lagu ti dijangka ulih nyadi hits, DAB madah semua lapan iti lagu ba album nya suah dipasang ba radio. Taja pia ku iya, lagu Bujang Recond enggau Jerungkang Tajam Gerenyam nyadi pilih bala peminat lagu Iban.

LAGU DITERIMA PEMINAT

Bekait enggau lagu ti dikerinduka peminat lagu Iban maya kediatu, DAB madahka sera peminat mayuh nitihka trend muzik menua bukai kelebih agi di menua Asia.

“Peminat lagu kitai Iban dipeda rinduka lagu berentak ranchak baka muzik di Indonesia tauka rentak remix. Taja pan pia lagu balada tetap enda tinggal ari ati peminat kelebih agi enti lagu nya ngenang cherita ti amat bisi nyadi ba pengidup sida iya empu,” DAB sekali agi mantaika penemu diri.

KENANG PAIT MANIS SEKUMBANG NYADI PENANYI

Ba siku-siku artis tauka pemerindang bisi pekara ti ngasuh ati sida iya lantang. Sekeda nyangka berasai lantang maya ke merindang atas panggau, sekeda nyangka pengerindu ati betemu enggau peminat lalu ke bukai nyangka puas ati lebuh nerima komen ti meransang.

“Aku chukup puas ati maya aku belagu atas panggau lalu peminat aku dipeda puas ati enggau lagu aku. Aku mega gaga ati enti sema sida rinduka aku tegal penemu enggau pengelandik ti bisi ba aku. Sekeda peminat ngaga kitai nyadi idol sida lalu nya kebuah

kitai mesti nunjuk utai di badas sereta berega agai sida,” ku DAB sambil ngarapka peminat lagu Iban semampai meri sukung ngagai semua penanyi enda ngira nya artis baru tauka lama.

Ditanya bisi ke enda iya nerima pengingat pait ti ngasuh iya enda lantang. DAB madahka pekara ke bansa tetap nyadi ba semua orang. Pekara ti tau ngasuh iya tusah ati ku iya nya sekeda jaku orang pasal iya ti ditampung enggau chara ti enda betul. Cherita ke bansa nya ku iya mesti ditapi enggau sabar. Semina enggau chara sabar aja semua pekara ulih diatur nyadi badas.

KAUL ENTARA ARTIS IBAN

Enda milih ni industri muzik ba dunya tu, kaul tauka networking enggau orang bukai nya chukup beguna. Baka ni pan peninggi populariti nuan enti enda bekaul enggau orang pan nadai nyadi kini-kini.

“Ba aku, kaul artis lagu Iban dipeda chukup badas. Kitai agi ulih begulai sejalai ngulu pengerami tauka show pangan diri. Dia kitai nunjukka sukung diri. Kitai mega ulih bekunsi siti panggau maya ke merindang. Taja pan pia kitai enda nyukung penemu ti negatif ari sekeda orang ti bisi saru penemu pasal industri. Aku arap semua kitai ba industri muzik bela mai ati ti baruh lalu madamka penemu ti kelalu ngeninggi diri,” ku DAB ke diatu gawa nyadi pengelicha.

TERIMA KASIH

“Ngena peluang tu aku meri besai terima kasih ngagai OCHSP, komposer, pemuzik, model video muzik, dj radio, raban pemberita, kaban facebook, kami sebilik enggau ke bukai ke semampai nyukung aku. Beli mih album baru aku Bujang Recond ti original,”  ku DAB ngujungka randau kami duai.

Aram kitai sama besampi awakka DAB terus mujur nyadi penanyi enggau nyadi idol peminat iya. Nambahka nya kitai mega arapka sampi iya semampai didinga Petara kelebih agi ba pekara tawing idup iya ke diatu nyangka udah bisi ba mata, agi ba rantu jalai tauka agi jauh bedau temu alai.

DIKARANG: MR TUBAI PENGERINDU