Tebilang berani ngelaban munsuh

YB Snowdan Lawan (Penulung Menteri Lumba, Main enggau Nembiak) nguluka sekeda bujang berani meri basa ngagai bala sekeda ti udah tumbang maya Perang Dunya Kedua suba.

KITAI Iban enggau pupu bansa Dayak bukai endang raban ti tebilang berani, tebilang bedengah, mutus ati belaban enggau munsuh.

Bala aki kitai kelia sigi ditemu mensia sedunya kempang ngayau nyerang munsuh ba rumah munsuh empu lalu mumpung pala munsuh laban dibai pulai nyadika tanda sida berani. Kebuah begunaka pala munsuh nya mayuh, lalu enda dikenang aku ditu. Mina siti aja disebut ditu, iya nya sebedau lelaki kelia deka ngulihka ati indu tauka mai indu jadi, sida enda tau enda bulih dengah dulu. Pala munsuh nya meh nyadika batang derian sida lebuh jadi enggau indu buah ati sida ka tambah derian bukai.

TANYA LEMAMBANG TIMANG JALUNG

Tang sebedau aku meri puji ngagai bujang berani kitai bansa Iban sereta enggau bala sida bukai, dulu aku ngelansa mimit pasal kelulu, kenang enggau tanya lemambang timang jalung lebuh sida nuntungka jalung ngagai bala sida ke belancham nyemilu tisi, nyaing muting geraji ti diambi ngirup jalung maya Gawai Antu.

“Lama kitai ke besaruk duduk bebanding. Ku lama udah ninga gela nuan unggal dedarah sawa indu tedung, ba arung jalai pemuntang. Oh sapa perinyai ambai sulu sangkung lebuh jawang agi gegayang gamal gegandung, alai tangan tunjuk ujung nuan tau diinjau orang nyuluk ka upung nyiur nyintung tak lepung-lepung mesai tempulung lang tansang, oh ku aku tansang lang.” “Oh…lama lemai kitai ke besaruk duduk berintai, lama udah aku ninga gela nuan ke bedarah sama tedung tendai, entang ke tu lebuh kitai ke bejaku kelulu nyampau dirintai, kali jenti nuan udah bebini, tang lebih ka gayang gamal lelempai, sapa ambai tulang peransang…iya ku aku peransang tulang..oooh”

Kitai mega dulu ngading orang Panggau Libau ke Lendat Dibiau Takang Isang, Ngading orang Merawa Lama Munyi Ke Berimba Mungga Nebang, Ngading bala orang Meriu Batu Saum ulu enggau Sikup Bengkang. Ngading orang di kaki Tanah Ruji Menawa Laja Nyerenang Lumpang. Ngading sida Tuchung Engkeranji Padi sereta Puting Titi Enda salah Baka Api Ke Nyadi Mauu Ngerendang.

Ngading sida Keling Gerasi Nading Bujang Berani Kempang, Jelingau Ke Betugau Mayuh Rambang, Keling Aji Rangka Bini Seribu Tunang, Datu Au Pemadu Nama Orang. Raja Siku Penyangga Punggu Berangan Ninggang, Bujang Pengibun Tegar Hari Bilun Ensuruk Remang.

Ngading sida Laja Jelinga Tinggi Merabung Kajang, Patah Dabung Penyukung Rang, ngading sida Sempurai Munti Gerai Simbang Ka Jerungkang, Sepatu Manuk Antu Sabung Mali Lenggang, ngading sida Sepungga Aka Sebila Daun Sabang. Anang meh kitai enda ngenang bala indu orang Panggau baka Endu Sempupu Aur Gangging Kerimpak Batu Cheling Bunsu Keling Gerasi Nading Mandi di Lembing Mata Pedang, sida Endu Sempupu Limau Bebunga Kerimpak Mata Sangga Bunsu Laja Jelinga Tinggi Merabung Kajang.

Kitai enda tau enda ngading sida Gelung Batu Nakung Nyingit Nyinggung Nyandar Nerabang, menua sida Indai Mendung Kupak Kundung Punggang Temawang. Nya ga rumah panjai dipegai Ngelai Raja Besai Nadai Besinggang, Pauu Tunggul Enjun Beribu Nadai Beguyang.

Ngading bala lelaki bukai ke enda ulih sebut enggau mulut nyambut entupang, tetelah enggau dilah entara rang, bala raban mayuh sida ke ngara diri nunda leka pelaga gitang.

TAKAR PEMERANI KEMAYA HARI TU

Dunya kemaya hari tu pemerani ukai dikelaie enggau pemayuh antu pala tauka pemayuh tampun atas bedilang baka kelia. Tang takar pemerani nya ngena bintang berani tauka midul berani ti diberi perintah kena nipak sereta meri kelala pemerani siku-siku sida ti udah berambunka nyawa ngetan menua Malaysia enggau Sarawak Tanah Kenyalang tu ari kena ambi tauka kena taluk munsuh.

Mayuh mega bala sedadu tauka pulis bansa Iban beteladanka pemerani niang Libau ‘Rentap’ tauka dalam main asal kitai iya disebut ‘Libau Panggau Dara, Rentap Tanah Kudi Menua’. Bisi mega orang nyebut ‘Rentap Apai Tambung ti lepung-lepung baka payung bulan nyintung tanggar peranama’. Iya meh ti ngetanka menua lalu ngaga kuta ba Bukit Saduk.

Kuta Rentap ba Bukit Saduk alah laban bala Rajah Charles Brooke dalam taun 1867, iya nya kayau ketiga sida kia lalu mai meriam Bujang Timpang Berang ti dikena sida ngebum kuta Rentap ngujungka bala sida Rentap rari ari nya tang enda kala nunduk ngagai perintah Brooke.

RENTAP TELADAN PERANSANG ANAK IBAN

Pemerani enggau pengeran Rentap udah nyadika chuan enggau teladan sereta peransang bala anak Iban rebak dudi ti ngujungka sida mega dikenang pemerani baka kitai ngenang Rentap. Ari pemerani Rentap meh sedadu kitai ngena jaku peransang ‘Agi Idup Agi Ngelaban’.

Terubah Iban rebak baru pegari nama berani kelia nya Tracker Awang anak Raweng, 85 taun. Awang diberi perintah British midul berani George Cross (GC), iya nya midul berani lumur dua pemadu tinggi di Britain, kena 20 November 1951. Iya meh anak Sarawak tunggal bulih midul nya. Awang ngayanka pemerani iya lebuh betempuh enggau munsuh maya iya empu sereta empat iku sedadu British kena tegah munsuh ba menua Kluang di Johor kena 27 Mei 1951. Taja bakal kena timbak ba pah kiba, Awang agi ulih ngidupka siku sedadu British lalu mujur ngetanka diri betimbak enggau komunis pengelama 40 minit ti lalu ngujungka bala munsuh rari. Mayuh ga bala munsuh tumbang parai laban iya maya nya.

Nyadi udah bekau Awang anak Raweng GC, jarang kitai Iban enggau bansa bukai di Sarawak enggau Malaysia ti enda kala ninga dama Kanang anak Langkau. Niang Temenggong PWO I Datuk Kanang anak Langkau, SP, PGB, PBS (1945 – 2013) meh keterubah bansa sedadu Malaysia nerima midul tauka bintang berani Seri Pahlawan Gagah Perkasa (SP) maya iya agi idup.

SP tu gelar lumur satu tinggi ba tusun gelar perintah Malaysia, tinggi ari gelar Tun. Tu meh siti ari kebuah Kanang kala enggai nerima gelar Datuk diberi sekeda sida Sultan ari Semenanjung. Taja pia iya nerima PGBK (Panglima Gemilang Bintang Kenyalang) ti mai gelar Datuk diberi Gabenor tauka Tuai Megai Menua Sarawak kena 24 September 2011 suba udah bekau ti nyadi Temenggong.

Semua sedadu bukai diberi SP nya maya sida udah parai. Kebuah pia, sida ngayan pemerani belaban enggau munsuh ti ngujungka sida empu pan parai mega. Siku sedadu Iban ti bulih SP nya WP 2 Lenggau anak China ti ditemu bangkai iya nyendi bangkai dua iku munsuh ti udah parai belaban enggau iya kena 20 Januari 1971. Lenggu diberi SP kena 21 Jun 1971. Siku kitai Iban ti bulih SP nya niang Inspektor Reggie Deli. Iya nerima SP maya agi idup lalu mina parai empai lama ti udah. Taja pia, iya numbas ditemu orang laban ti enda tentu pengerai.

Nyadi Kanang mega anak Malaysia tunggal ti nerima dua iti bintang berani. Sebedau ti bulih SP iya endang udah bisi bulih midul Panglima Gagah Berani (PGB), bintang berani lumur dua tinggi.

Kanang bulih gelar SP maya iya bepangkat Serjin. Maya sida benung nyidi jelan bala munsuh, iya nya bala kominis ti dulu ari nya udah nimbak siku sedadu perintah ti ngujungka tudah nya parai. Nitih ku Kanang empu, iya endang bisi jai mimpi, tang enda ngasika nya laban keran deka nyidi tunga munsuh nya. Nya alai lebuh sida betimbak, iya balat bakal ba sengkilung perut tang agi ulih meri jaku peransang ‘Agi Idup Agi Ngelaban’ ngagai bala bukai ti diuluka iya. Taja balat bakal Kanang agi ngulih nyelamat siku dua bala sida sedadu lalu ngujungka seduai nya sama idup tajapan iya empu ‘mati’ lima minit tang idup baru. Iya lama berubat sereta ulih pulai gerai lalu ditiki pangkat ngagai Warrant Officer I (WO I) sereta diberi Agong Bintang SP. Penulis kala diayanka iya abi litan kena timbak ba perut, iya nya dalam taun 1984 suba lebuh kami nemuai ngagai rumah iya di Kem Oya, Sibu.

BUJANG BERANI IBAN NERIMA BINTANG PGB

Bala anak Iban ti udah nerima bintang PGB nya nyengkaum – bisi sida tu udah parai, sereta agi mayuh mega mengkang idup – ASP (B) Wilfred Gomez Malong (polis sereta penerima PGB pengabis biak), Lt Kol (B) Haji Robert Rizal Abdullah, Mejar (B) Michael Riman ak Bugat, PW II Indang Engkas, PW I Beliang Bali, Sarjan Dajai Anggi, Koperal Lan Gima, Koperal Unggek Anting, Lans Koperalm Bajau Ladi sereta enggau Lans Koperal Sigi Endawan @ Nawan. Sida tu sedadu magang. Nyadi pengabis dudi orang nerima bintang PGB nya Koperal Gani anak Binjol ti enggau masuk UNOSOM II di Mogadishu. Iya parai kena 18 Julai 1994 lebuh balat belaban betimbak enggau munsuh ti alai iya chukup ngayanka pemerani. Gani diberi bintang PGB kena 3 Jun 1995 taja pan iya empu udah parai.

Ari sida tu, Lt Kol (B) Haji Robert Rizal Abdullah meh ti bepangkat pengabis tinggi bulih PGB. Iya bulih bintang nya maya agi nyadi Kapten kena 11 Oktober 1973 lebuh iya nguluka siti raban lalu mujur munuh tujuh iku munsuh lalu ngulihka lapan iti senapang, taja pan maya betimbak nya bisi ga bala sida empu bakal enggau bebadi parai. Beduduk ari tu iya diberi bintang berani PGB kena 27 Disember 1973. Diatu Robert Rizal agi aktif nulis bup kena nambahka sekeda bup ti udah ditulis iya dalam jaku English enggau Melayu. Iya meh ti ngepunka progrem ‘Mai Pulai’ bala bujang berani Iban 21 iku ti ditumbak di serata Semenanjung Malaysia suba ti ngujungka sida nya ditumbak ba Pendam Bujang Berani (Heroes Grave) di Kuching ditu dalam taun 2011 suba;

Bala sedadu enggau polis bukai ukai tegal enda berani tang mayuh bendar ari sida tu nadai diberi PGB. Sida mina diberi bintang enggau kelala bukai ti baruh agi. Sekeda ari sida agi mengkang idup taja pan mayuh udah manggai umur lebih 60 taun. Kami serumah Setaf Sarjan (B) Jungan Buda siku ari orang ti agi regas lalu munyi ti udah nerima Pingat Jasa Malaysia (PJM) dudi tu tadi. Siku petunggal aku ti enggau orang masuk sedadu nya Setaf Sarjan (B) Spencer Birai ti mega kala nyadi chermin Gerempung Sedadu Veteran (PVTM) Sarawak. Aya iya WO 2 (B) Tom Dap mega siku ari bala kami sekaban enggau masuk First Sarawak Rangers suba.

Kitai ngarapka pemerani bala sida tu tau nyadika peransang nembiak rebak baru diatu. Ukai reti meransang sida nyadi sedadu tang ambika peransang dalam semua pengawa nyengkaum dalam pelajar sekula. Lalu pia mega ba senentang ngulihka pemujur ba semua pekara, kitai enda tau enda bechuanka kangau peransang tulang sedadu ‘Agi Idup Agi Ngelaban’.

Ditulis VALENTINE TAWIE SALOK