Tukar nama ngempu senapang maya agi idup

NGALUKA PENATAI … Penatai Datuk John Sikie disambut mensia mayuh sebedau bejadi Program Begulai Enggau KMKK Pelilih Tatau ba Sungai Ayam, Ulu Anap, Tatau kena Hari Tiga ke udah.

BINTULU: Orang ke ngempu senapang patah diasuh nukar nama ngempu ngagai anak diri empu maya agi idu dikena nyeliahka sebarang penanggul jemah ila.

Nya munyi jaku lalau ari Penulung Menteri ba Opis Kepala Menteri (Undang Undang enggau Adat Bumiputera) Sarawak, Datuk John Sikie lebuh iya bejaku maya Pengerami  Relak Begulai Enggau Tuai Mensia Mayauh-Tuai Raban Bansa (KMKK) Pelilih Tatau ba  Sungai Ayam, Ulu Anap, Tatau kena Hari Tiga ke udah.

Ku iya, nukar nama ngempu senapang patah ngagai bala anak patut digaga lebih agi ngagai diri melaki bini ke udah tuai.

“Nya ngemudahka pengawa nukar nama ngempu senanapang lebuh orang ke ngempu nya agi idup,” ku iya.

Kelimpah ari nya, iya mega muji pengawa digaga pengari Bagi Menua Bintulu iya nya Opis Pelilih Tatau, Sebauh enggau Bintulu ke ulih meri idea ‘Aplikasi Pintar Sistem Pengesanan Elektronik Senapang Patah’ tauka e-FATS ke dikena Raban Kreatif enggau Innovatif (KIK) Servis Sivil Nengeri Sarawak  bepekit  ba bulan Oktober ke udah.

“Sistem ke baka nya ulih ngemudah sereta mutarka penanggul bekaul enggau pengawa nukar nama ngempu sereta ngidupka lesen senapang patah,” ku iya.

Iya mega madahka, program ke diatur chara relak baka nya meri penguntung ngagai bala tuai mensia mayuh enggau bala tuai raban bansa.

“Mayuh bengkah pekara diterangka pemesai pelilih menua, polis, bomba enggau  residen maya program nya lebih agi pekara bekaul enggau ngempu senapang.

“Penerang ke baka nya beguna amat ngagai bala tuai rumah sereta sida iya patut bekunsika nya ngagai semua orang ke diau ba rumah panjai diri empu,” ku iya.

Maya program nya diatur urung 100 iku bala tuai mensia mayuh enggau bala tuai raban bansa ari Pelilih Tatau bisi datai.

Sama bisi enggau nyereta program nya Residen Bagi Menua Bintulu Jack Aman Luat, Pemesai Pelilih Tatau Barayan Lenya, Kepala Polis Pelilih Tatau DSP Dennis Bunyam enggau Tuai Balai Bomba enggau Penyelamat Pelilih Tatau PBK Jankey Jikat.