Dunya Pemerindang Anang ngasam pengelandik

TIAP iku kitai mensia diberi Tuhan ungkup, peluang enggau penau. Tuhan sigi badas lebih agi orang ti arapka iya. Bida siku-siku kitai mensia nya chara enggau penau kitai nguna pengelandik ti diberi Tuhan ke kitai. Taja pan peluang enggau pengelandik udah bisi enti

enda nemu nguna iya pan nadai pengujung. Orang ti beruntung nya orang ti ngembuan pengelandik lalu nemu nguna pengelandik nya ti tau mai penguntung.

ARTIS MINGGU TU

Artis kitai minggu tu siku artis ke ngembuan tiga bansa pengelandik (talent) iya nya belagu, bekuntau enggau bepantang (tattoo). Iya ti bendar tiga bansa pengelandik nya tadi udah nyadi bansa dagang (commersial). Kelimpah ari nya seni kuntau udah nyadi siti bansa lumba (sports) dunya. Bepantang mega diatu udah nyadi pengawa dagang ngagai semua ti rinduka

pengawa nya. Kitai Iban mengkang ngemeranka pantang asal Iban lalu bansa bukai mega bisi ngaga pantang tang ngemeranka “corak / motif” moden.

Edwin ak Joseph madahka penatai diri ari Ulu Sebetan Saratok. Anak ketiga ari lima iku diri menyadi, Edwin terubah aktif ba pengawa belagu dalam taun 2016. Taja pan pia iya sebedau nya semina belagu kena merindang lalu bedau kala masuk pekit belagu ke besai tauka enggau orang audisyen pekit belagu.

Pengangkat tauka penatai siku-siku artis ke dunya pemerindang sigi enda sebaka. Sekeda artis belagu terus ulih ngerikot lagu tegal sida bisi duit. Sekeda ke nyadi artis dulu enggau masuk pekit belagu tauka audisyen ke alai sida ditapis milih iya ke pemadu badas. Suah

agi ke udah kala menang enggau pekit belagu lebih tan lama ba industri pemerindang. Kebuah pia laban sida dikelala mayuh agi orang lalu sida nya nyadi peminat iya udah bisi album tauka single.

AUDISYEN EMP RISING STAR

Audisyen EMP Rising Star mai tuah ngagai Edwin. Taja enda nyadi champion ba pekit belagu nya suba tang diatu iya udah bisi siti lagu tauka single. Enti bisi jereki lagu nya ulih digaga taun tu. Edwin siku ari  lima puluh iku bala ti enggau audisyen maya nya suba. Udah dipilih nyadaka siti lagu single ari Extreme Music Production tau dikumbai benasit.

SINGLE – AKU KESULAI NUAN BUNGAI

Ngeluarka single udah nyadi siti “trend” diatu. Kebuah pia laban ungkus iya murah agi lalu jarang ngasuh rugi. Diatu ngeluarka siti album penuh abis nadai nguna belanja RM10,000. Tang enti kitai semina ngeluarka siti single nyangka tau kurang tauka semina manggai

ngagai RM1000 aja. Ba siti album penuh, nadai mayuh lagu ti ulih nyadi lagu hits; ambis mayuh dua iti. Trend ngeluarka single mega bisi pemanah laban enti orang nya terubah

iya aktif belagu tang terus ngaga album penuh, dia iya tau pulai ke pengerugi besai enti sema lagu enggau vokal iya enda diterima prminat. Ngeluarka single dulu bisi pemanah laban dikena ngabas kualiti diri nyadi artis rikot.

Lagu Aku Kesulai Nuan Bungai digaga Mike Poisner lalu dikeluarka Extreme Music Production (EMP) ke bepalan di Johor Bharu. Mike Poisner nya siku ari komposer

EMP. Iya mega aktif ngatur pengerami pemerindang nyengkaum pekit belagu. Sida bukai ba EMP nya Ricky Ajan, Randy, Lalak JB enggau sekeda ke bukai.

KUNTAU

Pengelandik kedua ti dikembuan Edwin nya kuntau. Diatu kuntau enggau seni silat ke bukai majak popular ke alai majak mayuh belajarka iya. Seni silat ambika chunto udah nyadi siti “sukan” ba pekit lumba enggau main di menua tu. Kitai arapka kuntau ulih mega nyadi siti ari bansa pekit ba Lumba Malaysia tauka ba nengeri Sarawak tu ila. Nembiak kemayahari udah mayuh nemu pemesai guna main asal kitai Iban. Nyau majak mayuh palan endur belajar kuntau tauka silat. Edwin mega siku ari orang ti udah enggau belajar kuntau lalu udah nerima

sitipikit tamat belajar.

PANTANG – EDWINTATTOO

Siti agi pengelandik ke bisi Edwin nya mantang orang. Dunya tattoo diatu majak besai lalu peminat iya majak mayuh. Bisi mega orang bulih penatai pemisi ari bisnes pantang. Ngagai kitai ti deka nguji bepantang ba Edwin kita tau ngiga iya ba nombor 013-5923230. Diatu Edwin gawa di Samalaju di Bintulu lalu ngagai kita ke diau di Bintulu lebih bepeluang betemu enggau iya.

PENGELANDIK NYADI LUBANG PENATAI PEMISI

Edwin tau ngumbai diri empu beruntung laban ngembuan pakej pengelandik ke chukup. Enti iya nemu nguna pengelandik iya mantang, kuntau enggau belagu, iya ulih ngaga nya nyadi lubang penatai pemisi diri empu. Belagu sambil bekuntau mega ulih nyadi siti “show” ke siku-siku artis.

Kitai arapka Edwin terus mujur ba dunya seni iya kelebih agi ba pengawa pemerindang. Arap mega ke iya mujur ba bisnes pantang enggau kuntau. Enti dikena enggau chara ti betul, tiga bansa pengelandik nya tau mai ngagai jalai pengidup ti manah. Anti mih single ari Edwin, Aku Kesulai Nuan Bungai ti dijangka dikeluarka ba pun taun 2020 nyin ila. Pesan ngagai semua : Anang ngasam pengelandik ti diberi Petara.

DIKARANG MR TUBAI PENGERINDU