Cherpan: Basah Jari

ILAN engkasak tang semina tubuh iya ngeliat tang jari enggau kaki iya enda ulih meleka ari batang kayu nya.

 “Nama pengawa kita ngaga aku baka tu/? Buka tu, buka tu!” ku tudah. Dia mih iya ngelingkang-ngelingkang. Deka diangkat kaki enggai ga jadi. Deka kedarka jari enda ga terangkat. Majak mih iya rauh-rauh, kaung-kaung lalu seruran nyumpah.  Sida sebuat  ninggalka iya dia. Sebedau ninggalka iya kediri, Kantan lalu ngimbai pala Ilan lalu ngisik iya.

“Anang engkasak nuan, enda nuan pedis. Kami deka mai nuan berubat. Anang agi ngerijat,” ku Kantan.

Ilan enda nyaut. Ninga iya jangka Kantan tang iya enggai nyaut. Semina mata iya kesap-kesap; ama enchelak ama tutup. Bisi lilih ai mata iya beserigi nitik nelusur kuyu iya lalu labuh ngagai tengah tikai. Nya ditatka iya laban nadai jari dikena iya ngendas. Naka pengasih meda iya baka nya tang nya manah ke iya. Nama dalam runding iya, Petara aja nemu. Enti iya suman tentu iya enda baka nya. Runding iya beserabut. Pikir iya kusut. Iya enda nemu pengawa diri. Enda nemu ulah diri. Nadai nemu utai manah enggau utai jai. Keba jaku kasar nyebut orang baka nya, iya enda manah pala agi. Jaku ke balat agi bisa enggau enda bebasa, iya nya gila.

        MUNYI PUTAP LESAP

Malam mansang jauh-sejauh; dalam sedalam. Hari di luar din beribut taja pan menua berasai angat. Balat lisak. Enda lama udah nya hari munyi ke diruruk. Ujan naka iya pemangat. Leka ujan semerap-semerap ngembat atap. Guchur ai ba kaki atap di pugu tanju nyau mesai betis. Menua nyau begu laban dauh ujan. Nyau kelama angin bisi berasai chelap. Munyi nyawa mensia udah senyap. Munyi putap tudah Ilan pan nyau lesap.

Lebuh dani pagi orang begau meda ai bah. Bisi sekeda perau ke enda ditimba demalam tungkup karam. Bala bisi berasai gaga laban ai nya deka nulung orang ke merau;  nulung orang ke ngena injin sepit. Kira urung pukul sepuluh pagi nya dinga rengung-rengung munyi injin orang merau. Orang nyangkanya endang orang polis bisi mudik. Seninjik amat hari baka ke diajih tak ujan malam nya ti ngujungka ai bah. Nya tetap nyamai alai merau.

Ninga munyi injin, Kantan enggau sida sebilik bekemas. Sida nyendiaka gari enggau perengka ke dibai Kantan undur nyempulang Ilan. Tiga iku orang polis datai mai stretcher  baka ti dikena ngerinan orang ke bisi pedis maya main bul. Udah bekau dipadahka bala nembiak ke begau di pendai, bala polis ti di ulu sereta diambi Igat seduai Wat kemari lalu nuju ruai sida Ilan. Lebuh datai dia, sida tekenyit meda tudah Ilan dikangkam baka nya.

“Apu, nama kebuah kita ngangkam iya dih?” ku tuai sida nanya.

“Kati ku enda dih tuan. Iya ngamuk. Kami nadai akal bukai,” ku Kantan.

“Iya garangka? Deka nganu orang ka?” ku polis siku.

“Au tuan Kemari iya betebaska madang pisang ngeransi ku gamal iya,” ku Kantan madah.

“Uji buka kangkam nya,” ku Tuai Polis.

“Anang, anang. Lagi iya ngamuk,” ku dua tiga iku orang nagang.

“Anang irau,” ku Tuan Polis ke lalu mansutka gelang jari baka ti dikena orang ngelang orang ke ditangkap. Iya lalu ngelang jari Ilan tang enda ngelang kaki iya.

Ilan baka ke takutka polis. Iya nadai ngelaban. Iya nitihka jaku polis.

“Sapa kita enggau undur nitihka iya?” ku Tuai Polis.

“Aku,” ku Kantan.

“Sapa nuan dih?”

“Aku meyadi tuai iya”.

Jam nya Tuai polis ngambi bungkus mit ari kuchik iya lalu nechal nya ba idung enggau nyawa Ilan. Peda Ilan tak merurut baka ke lembut tulang udah bekau mabuk. Iya lalu digalika orang ba  katil tanggung digaga ari kain kanvas ti alai iya baka orang ke tinduk. Tentu utai ba bungkus kain nya tadi bius ku ati bala. Patut Tuan nya nadai takut ku ati bala ke meda dia.

Oleh JANTAN Umbat