Ngading Petara sebedau bumai

SEBUAH rumah panjai di genturung menua kami ti kala niri Gawai Batu kena ngepun taun bumai dulu suba.

Mayuh bala kitai ba nengeri nyangka lubah deka mereti jalai aki ni kitai kelia ngidupka diri, sereta mega chara sida nyembah Petara ke besai reti ba pengidup sida, lebih agi dalam pengawa ke dikemeranka sida kena idup, kena ngiga pemakai.

Kitai Iban sigi bansa asal orang ngemeranka pengawa bumai. Taja pan diatu pengawa bumai nya udah jarang dikereja ketegal anembiak kemaya haritu ke udah mayuh besekula, bala rebak baru diatu enda tau enda nemu mimit pasal asal pengawa bumai nitih ka jalai orang tuai menya. Kebuah pia, enti bala anembiak enda nemu, sida lalu enda mereti bakani ku gaya runding enggau jalai pengidup orang tuai, aki ini sida empu kelia.

Gawai Batu nya sebengkah gawai ti didirika kitai Iban lebuh baru deka belabuh bumai. Nyadi jalai tusui aku tu nitih padah sida niang ini menya lalu mega bepanggai ba padah niang Benedict Sandin dalam bup iya Raja Durong.

Nyadi semua pengeraja kitai Iban dulu menya endang ulih ari pemulih padi magang. Nya alai laban umai nya pun pengidup bansa kitai, nya mega kebuah kitai Iban jimat bendar megai adat bumai betaun. Empa penyimat sida, enti asi bisi belimbur kia-kia, asi nya enda tau enda diputik sida enggau naka penyiru, enggau naka penangi.

Ba genap rumah panjai Iban, endang sigi bisi siku orang dipaduka nyadi epala bumai betaun. Nyadi orang tu enda tau enda orang ke nemu pasal burung, ngelala pejalai bintang enggau bulan, likun pendiau, lalu ruai tikai iya enda tau sekali endur ngempuru laya enggau chakah indu anembiak laban takutka ruai iya kamah laban bekau pengamah enggau penyai. Pia mega orang kena pilih nya sigi enda tau enda orang ke pemulih padi enggau reta, reti nya, iya sigi orang ke pama agi pendiau.

Kejang deka bumai, kepala taun enda tau enda baum betanya ka utai deka dikereja sida serumah ungkupka taun nya, enti endur bumai udah ditetapka alai ba aum tuai rumah dulu ari nya.

BETANYA DULU

Dia sida lalu betanya ngagai pangan diri sekalika taun ke dulu nya chelap lalu likun ba pengidup padi. Tauka iya bisi asai sereta berupai renga. Enti sema iya renga, tuai nya lalu mai orang ngenselan menua ke dikumbai Buling ka Menua. Tang enti taun ke dulu nya manah sida nadai nyebut tu. Manah tauka jai taun ke dulu, sida endang seruran gagit deka niri Gawai Batu kena bechelap lalu ngemanahka agi umai ba taun baru.

Nyadi enti menua digenselan, babi siku mesti dibunuh tambah enggau siku tauka dua iku manuk kena miau piring. Orang ke ngereja pengawa tu enda tau kurang ari tiga ngagai lima iku. Endur sida enselan nya endur lama, enti bisi, lalu enti nadai ulih mungkal endur baru.

Ba senentang atur piring, siti piring tumbak, siti engkah atas para, siti engkah atas keresang, empat iti engkah ba sukut para enggau siti buai ke ai. Udah tembu miring nya baru ngaga serepak enggau pentik digaga ari kayu kumpang tauka menuak dua iti. Tembu nya, baru tuai orang ke ngenselan menua lalu nyampi munyi tu:

“O hoi! O hoi! Tu aku miau ka manuk, kena miau piring, miau ading, miau perengka, miau tengkira. Ngambika nadai runggang, nadai timpang, bisi semua, bisi sereta. Kebuah alai pengawa kami bakatu, laban kami tu enselan menua, enselan tanah, enselan ai. Laban menua kami taun siti tu kemari udah diasai ka kami bisi menawa, bisi senika, alai kami nanam padi, nanam tempuli. Kami tu minta tulung Petara Aki, Petara Ini, ke menya ke kelia. Kami tu endang nampung endang nerujung, endang niti endang nali ajar Petara, ajar Sempulang Gana, kenyau ari kelia nyentukka kemayatu. Kami tu nyau deka bumai baru meh, nya alai nyau ka nuchi, ka meresi, ka ngupas ka ngendas, muai Antu Menawa Antu Senika, muai Antu Kudi, Antu Bebali.”

Udah tembu nyampi nya baru munuh manuk enggau babi. Darah timbun mimit atas mua lubang ke alai darah nya siuh. Darah ke siuh nya lalu ninggang piring enggau tanah dalam lubang. Udah tembu munuh babi, nya baru nganjung semua piring ke disebut nya tadi ngagai endur sida siti-siti.

BEGERAH NGANJUNG BATU

Datai sida di rumah, nya baru begerah ngasuh orang siku sepintu nganjung batu, duku kena mantap enggau pengait, ngagai langkau panggau ke digaga orang ke tinggal di rumah, tinggal orang ke munuh babi enselan menua dulu tadi.

Udah nya kepala taun ke nyadi tuai gawai miauka manuk baru kena beranchau tikai. Orang dulu ngembaika tikai di ruai kepala taun empu.

Udah tembu beranchau, dua iku orang belanda ngirit chapan berengkah ari ruai tuai gawai siku ke setak, siku ke setak, mupuka Antu Rua, niti tempuan. Dia orang ke indu lalu meri mayuh macham utai ke enda manah baka gari sepit, gari raga, gari senduk enggau utai bukai. Datai seduai ba pala tangga, seduai lalu ngebuka semua utai dalam chapan ke baruh rumah enggau jaku munyi tu:

“Nya nyah, tu beri kami ngagai nuan Antu Rua, Antu Rangka. Anang agi minta, anang agi nanya. Utai tu bai nuan pulai ke Brunai, ke tasik besai, bai pulai ke Sintang, ke Tawang.”

Udah tembu nya manuk dibiau baru kena ngerah ngalu batu. Orang pan lalu nurun siku sepintu, mai pua kumbu kena nyandik tauka ngema batu pulai ke rumah. Ripih sida bejalai pulai mai batu nya, siku dulu nyan setunggul burak, lalu ditangkanka orang siku minching manuk. Udah nya dientudika orang siku minching tabak piring, nya baru tuai gawai ke lalu ditangkan sida bukai bejalai betunda udi, dulu ari bala lemambang ke mengap enggau orang ke begendang. Datai di tanah sida lalu bejalai melit langkau panggau nya tiga kali besundang. Indu lalu nabur panggau batu enggau letup. Udah nya baru lelaki miau enggau manuk munyi tu:

“Sa, dua, tiga, empat, lima, enam, tujuh! Aku miau batu enggau manuk, kena aku minta taun tu enggau ti agi tu ila mansang jurus, mansang alus, enda senika, enda menawa. Aku minta bulih padi, bulih tempuli. Aku minta kami belimpah minta kami betuah bulih reta, bulih pengeraja ari taun ti udah, ngambika kami tau senang, tau lantang.

Udah langkau panggau batu dibiau enggau manuk, tuai gawai lalu ngambi batu ai iya dulu, lalu dima tauka disandik iya enggau pua. Iya lalu ditangkanka sida bukai niki ke rumah niti tempuan. Nyadi semua pintu bilik sekayu rumah nya ditelengaka orang magang lakka Petara tama nganjung tuah. Sida ke bejalai nya besundang tiga kali niti ruai enggau pantar ngenuluka bala lemambang ke mengap enggau orang ke begendang.

Sekumbang bejalai sida dilanggar sida sarumah nya enggau tuak ke benama ngelanggar batu tiki. Udah tembu bejalai, nya baru sida lalu duduk ba ruai tuai gawai tauka ba bilik iya nitihka atur dulu. Sereta duduk orang lalu ngasuh bini tuai gawai nyendiaka ai kena masu batu.

Nyadi utai endur masu batu nya, enti agi kelia ngena bisin temaga, tang kamayatu bisin ari tin tauka plastic pan tau ga dikena. Utai direndam dia nya baka rangki, pelaga, gerunung, tinchin mas enggau ringgit. Nyadi utai kena ngirah ngambika manah bau nya buah kepayang kirai, kerupak buah langgir, tepus bau, bunga tual, bunga buot rangkai begulai enggau darah manuk enggau darah babi ti dibai pulai ari tanah kena ngenselan menua pagi nya.

Tiap iku orang ke empu batu lalu ngambi ai magang kena masu batu. Udah bekau nya, orang ke bisi pengaruh lalu, masu pengaruh sida ba ai ke diambi diri iya empu tadi. Udah nya baru tuai gawai ngemansutka upah orang ke masu batu. Upah iya duku sebilah ambika kering semengat, tepayan sigi ka kurung semengat enggau belachu sedepa ka tudung iya.

Kejang orang deka berengkah masu batu, gendang rayah lalu dipangkung tiga renggat. Sereta gendang bemunyi, siku orang lalu masu batu ngena ai ke diambi orang tadi enggau siku lalu ngeminyak iya. Udah batu diminyak, iya lalu ngengkahka batu nya atas dulang tapang, laban batu nya enda tau sabarang alai engkah.

BERUMPU MAKAI

Tembu nya, sida lalu berumpu makai enggau ngirup ngagai ruai tuai gawai sereta berami nitihka peneka sida empu. Bisi sekeda mai tuak enggau arak, kupi enggau ruti, salai, kasam enggau pemakai bukai ambika semua pengabang enggau mensia mayuh sama bela ampit ensepi iya.

Udah bekau begulu tu bala lemambang lalu nampung pengap sida baru, mulaika semengat padi, semengat batu enggau semengat sida empu enggaika udah terunda-runda tepejuh jauh lebuh maya gawai.

Abis pengawa lemambang ke mengap, nya sida lalu digempuru ba ruai tuai gawai lalu diberi upah mega mata duit, belachu enggau kebuk sereta enggau besi baka duku ambika kering semengat.

Kadang-kadang, kena orang serumah nya berami baru, bala lemambang bisi mega diasuh orang nenjang bala orang ke minta denjang. Denjang tu reti iya pengap puji ngagai orang siku-siku. Udah tembu nenjang siku, lalu nenjang siku mega. Orang ke minta denjang nya sigi udah nyendiaka pemeri ngagai sapa lemambang ke dipinta sida nenjang.

Niang Lemambang Salok Anak Jembu ke tebilang manah nyawa sereta landik ngena leka jaku ba kandang menua batang Krian, Paku enggau Rimbas dipadah orang selalu mai pulai mayuh bengkah pemeri ari orang ke minta denjang. Entara utai ke kala diberi orang nya baka mata duit, tinchin mas, gelik mas, jam jari, tajung baru, pua kumbu sereta enggau utai bukai baka beras, kebuk enggau manuk sabung.

Nyadi batu ke udah diminyak nya tejuka ba panggau dia dulu. Nyau pagi siti baru sida ke empu batu nya mai batu ngagai umai sida laban maya tu sigi udah manggul. Batu nya alai sida beransah kena ngepunka tebas sida, lalu jadika indu batu. Kebuah pia, laban ukai semina siti batu pengansah aja ke bisi dibai ngagai pelasar endur sida ngetu tauka palan alai ngetu belelak lebuh nebas.

Gawai Batu tu lama udah nadai kala didirika ba menua kami laban udah lama masuk pengarap baru. Ka tambah mega udah kurang lemambang.

DITULIS TELESA EMPERAN