Bup meri ajar, anang muntanka diri

NEMBIAK ti agi mit manah dilatih nyura laban nya tau ngemanahka agi pengelandik sida.

MAYUH bendar bup cherita enggau ensera udah ditulis tauka ditengkebang sekeda penulis kitai Iban ungkup kena ngajar sereta ngelalau pendiau kitai mayuh, kelebih agi bala nembiak ti benung mansang.

Ditu aku deka ngenang dua bengkah bup sereta ngambi seleka dua isi cherita iya ambika buah kenang lalu dijadika lalau enggau tenggau pendiau kitai mayuh.

Keterubah iya, aku deka ngenang siti bup ti ditengkebang tulis iya ulih George Garai, siku pengajar udah pinchin ke mega kala nyadi sekretari politik kepala menteri suba.

Dalam bup Puntan, George ngenang pasal pemerinsa orang melaki bini nyengulaka anak lelaki tunggal seduai ba rumah panjai kelulu Entimun Betu. Dama sekula mega dikelulu enggaika sama enggau sekula ti bisi ba menua kitai tu lalu pia semua dama orang dalam cherita tu endang dikelulu magang.

Endang enda ngetu siang malam petang seduai melaki bini gawa ba tanah, ngerejang getah, betanam sayum enggau utai bukai ketegal bebendar nyengulaka anak seduai penama Lap. Nunda kelulu George, cherita berengkah ari Lap ti udah pass ba peresa Pom Lima lalu udah dikemendar masuk Pom Enam ba siti sekula di nengeri ti enda jauh ari rumah panjai sida. Bala ti deka ke pasar nya ngena jalai ai, iya nya ngena perau kayuh tauka injin sepit.

Lebuh udah nerima rita manah Lap tu ulih nampung pelajar ngagai Form Enam, dia apai enggau indai iya balat gaga sereta lalu ngangauka bala mensia mayuh ba rumah nya begulu makai selamat ba ruai sida. Nanya berutang ba tuke Ah Soon ngambi arak, ngambi remenit (lemonade), ngambi kupi ruti enggau utai bukai kena meri bala mensia mayuh makai selamat. Jani besai sida pan disemelih ambika lauk mensia mayuh. Ni ke salai ikan, manuk enggau engkayu baka upa enggau utai bukai, endang genap magang. Orang mayuh chukup gaga laban makai semua utai nadai bebayar.

Nitih kelulu George, lebuh udah nemu Lap ti udah pass Form Lima, apai iya bisi dua tiga kali besundang niti ruai rumah panjai sida rauh-rauh madah ngagai sida serumah pasal Lap ti udah mujur dalam peresa. Ni peninggi jaku seduai melaki bini agi madahka diri deka jauh lantang senang ari bala sida serumah enti Lap udah bulih degree jemah ila.

Malam lebuh ke makal selamat, bisi ga siku petunggal dua kali apai Lap ti endang bakih iya kenyau ari mit mesulka jaku ngagai seduai melaki bini (apai enggau indai Lap) minta Lap tu jadi enggau anak dara seduai enti iya udah abis pelajar jemah ila. Kebuah ke berani jaku nya laban apai Lap enggai petunggal iya nya endang udah bisi besemaya jaku rambau seduai baru angkat bujang suba – enti seduai bisi anak bujang enggau anak dara endang setuju diasuh jadi laban tiga kali petunggal pemanah iya disabung jadi. Tang malam nya apai Lap tu bisi tinggi mimit jaku madah Lap deka diasuh jadi enggau indu sama bisi degree, manah agi enti bisi, jadi enggau indu mem (indu ribai). Naka pemalu meh petunggal iya seduai bini udah ninga jaku apai Lap.

Nyadi lebuh Lap nurun sekula, semua duit rega getah jual apai iya di pasar endang diberi iya ngagai Lap magang, mina sepuluh ringgit kena iya makai mee ba siti kedai mee. Bisi lebih dua ratus ringgit diberi iya ngagai Lap.

Angkat deh udah bekau semak setaun udah sekula ba Form Enam, Lap tu ditangkap kepala sekula enggau sekeda pengajar bukai ditemu makai ubat batuk enggau ensium gam ensikal. Kebuah ti mudah ditemu sereta dipelaba bala pengajar bisi enggau ngereja pengawa salah nya ketegal tubuh ke berupai kurus lalu semampai dipeda ngantuk dalam kelas. Udah ke ditemu, lalu diripot ngagai indu opis pelajar ti ngujungka opis pelajar ngemendarka Lap dibuai ari sekula.

Naka pemedis ati meh apai seduai indai Lap ngagai anak tang kati ku enggau, asi udah nyadi bubur. Jaku kelanjur pan enda ulih tarit agi baka reti kitai ke ngeludah, ludah nya enda ulih tarit pulai masuk dalam mulut kitai baru. Jaku tinggi ti udah dipansut sereta didinga mensia mayuh nadai ulih dibatak pulai, nesal dudi pan nadai reti.

Nya alai puntan meh niat apai seduai indai enggau Lap empu ti deka idup nyamai dudi hari sepengudah Lap bulih degree. Tang anang ka bulih degree, abis Form Enam pan enda laban puntan baka menasan jalai jelu, rumbau baka buah sibau ulu.

Keba sida apai indai enggau aki ini menya nadai kala didinga bejaku tinggi tauka bejaku ngeninggi remang lebuh anak udah tauka uchu masuk Form Enam nyentukka abis pelajar ba universiti. Kebuah pia, laban ngasaika kelalu balat merinsa nyengulaka anak. Abis tanah, abis buah dijual. Abis baku, abis irun, abis tajau, enggaika puntan tengah jalai. Enti hari ujan, nganti hari udah tinggi, ujan udah ngetu, nya baru niang apai nurun ngerejang, mai gari pua kena malit batang getah ngenyadika rangkai ulih ditangkal.

“Apu suntuk bendar nuan sanu, nyau bepalitka batang getah awakka ulih tangkal,” ku siku petunggal niang apai kaban penulis.

Tang apai kaban nya enda nyaut iya laban nadai nemu bakani nyaut. Maya anak udah bulih degree sereta megai pengawa besai engka bisi ga apai kaban nya nyaut petunggal iya nya tadi . Nadai ga kebuah iya malu nyaut, laban bala anak petunggal iya nya, siku pan nadai meh ngembuan degree taja pan bisi ngenujuh iku bala sida nya.

Dalam bup Sekeda Cherita Pandak (Borneo Literature Bureau), niang Edward Kechendai @ Enday ke ninggalka dunya injau kitai tu dalam bulan Dua taun 1989 suba mantaika sekeda cherita kelulu ti empu tuju kena ngajar sereta ngiri pemereti ati ngagai kitai bala pemacha kelebih agi bala raban nembiak ti benung mansang.

Siku orang ke dikelala mensia mayuh laban ngempu nyawa ti manah didinga bala peninga ba radio kelia ka tambah ti mayuh penemu asal bansa diri, Enday lama udah ditemu mensia mayuh taja pan enda kala dipeda sida.

Lengka ka nya, nyadi siti cherita kelulu Enday ba bup nya tadi ngenang pasal siku mayau rangka sereta amu. Cherita manah kena manding ulah kitai mensia empu. Tu ngenang pasal pengasa ati kitai mensia ke endang tau ngasuh pala kitai enda tentu bebatang runding, ka tambah mega ngasuh kitai tau mantul dalam pendiau.

Pun cherita tu pasal siku indai tuai bansa Iban kelia menya ke ngerami ikan ngena garam ba langkau umai.

Benung iya kiruh ngerami ikan nya, siku mayau kuring jai gamal ari langkau orang bukai lalu datai ngagai langkau iya. Tang laban indai tuai nya ngeringak nunga ngagai dapur melakang mua pintu, ka tambah pending ke enda tentu lansik, nya alai iya enda meda mayau kuring nya niki tangga langkau iya. Lebuh indai tuai nya benung kiruh diri, mayau nya lalu merejuk ngerampas sereta manggum siku ikan ke besai agi, ari dulang tapang ke alai indai tuai nya ngerami ikan ka salai tauka deka digagaka kasam.

Udah iya mujur bulih ikan besai nya, mayau kuring jai gamal sereta kurus nya lalu rari terejun ari tanju langkau naban ka ikan nya.

Nyadi mayau nya enda lalu terus nabanka ikan ulih iya ngagai langkau orang bempu iya, laban iya nangi sereta takutka ikan panggum iya nya dirampas tauka diperebutka mayau bukai ba langkau nya.

Nya alai mayau kuring nya lalu manggum ikan nya meraka sungai ke enda besai. Ba sungai nya bisi siti batang nyengkar ai, lalu nyamai bendar dititi iya nyemerai ke tebing seberai. Lebuh mayau kuring nya bejalai gadai-gadai niti batang nya, dia iya lalu tepedaka siku mayau chelum ari baruh iya, manggum ikan besai agi ari ikan ti dipanggum iya empu. Gamal mayau chelum nya pan besai ari gamal iya empu. Sereta mayau kuring nya tepedaka mayau chelum nya, mayau kuring lalu berunding deka ngerampas ikan ke dipanggum mayau chelum, laban ikan nya besai agi.

Lebuh mayau kuring nya ngetu merening mayau chelum ke ari baruh nya, mayau chelum nya mega ngetu. Benung mayau chelum nya jenuh, mayau kuring nya lalu terejun nerekam mayau chelum ke ari baruh iya, laban iya deka ngerampas ikan panggum mayau chelum nya.

Mayau kuring ke terejun nya lalu labuh ninggang lubuk ari baruh batang ke dititi iya. Lebuh iya terengkah ba lubuk nya, ikan ke dipanggum iya lalu tebelengka ari nyawa iya laban iya empu nyau ka lemas. Ikan ke tebelengka ari panggum iya nya tadi lalu rarat ditaban ka ai kili, nyangka lalu tengelam nadai temu tunga.

Laban mayau ke enda kala nyelam tauka enda kala mandi ba ai – anang ka mandi, nyema bisi timbur mimit enggau ai pan engkechit rari – nya alai iya nadai akal ngambi ikan ke udah tebelengka ari nyawa iya, taja iya rangka bendar deka makai ikan.

Nyadi cherita tu ngemun kitai Iban bisi jaku sema madah bakatu: ‘mayau nemu makai ikan tang enda nemu nyelam’.

Udah mayau kuring nya nyemerai datai ba tebing, iya nadai tepeda ka mayau chelum ti deka direkak iya tadi. Ni agi bisi, ga mayau chelum ti dipeda iya tadi nya ayuk iya empu ba lubuk baruh batang ke dititi iya. Tang laban iya empu kelalu amu, kelalu angam sereta rangka, dia iya semina asa nilat bulu diri empu ke basah, enggau nilat mulut diri empu ke udah manggum ikan.

Perut tudah tuai nyau engkerau lapar, tegal enda sempat makai ikan ke ulih iya ngerampas ari indai tuai orang nya tadi. Keba keruan enda mayau. Lalu enda nemu ayuk diri empu. Munyi sempama, manuk lepas, jari bau tai.

Oleh Telesa Emperan