Bujang Berani Iban Dua

JEMAN KELIA… Sekeda ari pisin bansa bukai jeman OKP Dana Bayang.

Tusun Ke-4

ORANG KAYA PEMANCHA DANA “BAYANG”

Orang Kaya Pemancha (OKP) Dana “Bayang” ari Padeh tu anak bunsu Orang Kaya Beti ke bensumbar “Tajai Ngindang” seduai bini iya Endau. OK Beti “Tajai Ngindang” tu mati maya berebutka menua enggau bansa bukai dulu kelia, iya dikuburka ba Pendam Burui di Jelupa.

Dana tu pugu tuai Iban ke suah matak kayau ngalahka bansa bukai di Kalimantan, Indonesia. Tegal pemerani enggau pengelandik iya megai nembiak redak, Dana “Bayang” lalu dichiri nyadi Penghulu lalu diberi perintah Sultan Brunei pangkat Orang Kaya Pemancha. Iya megai bansa Iban enggau Melayu sekayu sungai Batang Lupar maya nya kelia, kenyau ari kandang taun 1880 nyentuk ke iya mati dalam taun 1854. Nama iya ke bendar nya Dana. Bayang nya ensumbar iya.

Dana dipaduka nyadi tuai matak serang bepun ari mimpi iya. Malam nya lebuh umur iya kira-kira manggai tiga belas taun iya bemimpi asai ti bejalai niti jalai alun ke besai. Maya nya iya betemu enggau mayuh bengkah raban orang ke benung berikan, benung nyarin rusa sereta nyarin babi.

BEMIMPIN BETEMU ENGGAU KUMANG

“Apuu…, nuan nya nih Dana. Ngetu mih, unggal. Aram sama mukat ikan ditu kitai,” ku orang ti benung berikan ba tebing tasik.

“Enggai aku, unggal. Berumban amai pejalai aku tu, enggaika enda datai di Gelong lagi,” pia ku saut Dana. 

Semua orang ke bepansa enggau iya maya nya mai iya sama berikan, ngasu sereta nyarin jelu, tang iya tetap nyaut enggai. Enda lama udah nya, iya pan niki rumah Raja Simpulang Gana.

“Apuu, bisi temuai kitai tu. Lalu mih Dana, tama ke bilik kami,”pia ku bini Simpulang Gana madahka laki iya.

“Enda aku, indai. Berumban deka ke Gelong aku tu,” pia ku saut Dana. Iya nurun ari rumah Simpulang Gana lalu majakka pejalai diri. 

Datai di Gelong iya pan betemu enggau Kumang.

“Apuu…, lalu duduk ke tikai kitu mih, Dana,” ku Kumang.

“Enda ibuh mih laban aku tu berumban deka betemu enggau Keling. Dini endur laki emperuji ati nuan nya, dih?” pia ku Dana madahka pejalai diri.

“Pia… Duduk dulu mih. Lagi mih nuan betemu enggau iya,” pia ku saut Kumang.

Maya Dana baru deka nudukka diri iya pan tepedaka pangan iya Orang Kaya Panglima Randi ti endang udah dedunga duduk.

“Apu nih…! Bisi nuan ga ditu, unggal. Kemaya nuan datai ditu?” ku Dana.

“Baru datai amai-amai ga aku tu. Apin bulih sebatang ruku,” pia ku saut Randi ti bensumbar “Rantai”. 

“Oh manah amat tua ulih betemu ditu,” pia ku Dana bejaku baru.

NGITUNG KERAK DULANG KUMANG

Dana pan duduk betungga enggau Kumang seduai Randi. Nyau kepuaska berandau dia Kumang lalu ngasuh Randi ngitung berapa penyampau kerak dulang ba tusu iya. Randi lalu ngitung, tang lebuh iya ngitung ngalihka tusu sepiak, Randi enda ingat agi  berapa penyampau ti udah diitung iya. Randi nguji tiga kali tang enda tetemuka penyampau panau ba tusu Kumang nya.

Udah nya Kumang pan ngasuh Dana ngitung kerak dulang ba tusu iya, tang iya mega sama baka Randi enda teitungka penyampau kerak dulang ba tusu Kumang nya. Udah nya Kumang pan ngaga dua iti ilum pinang, ti diengkahka iya atas pah iya. Iya ngasuh Randi ngambi dulu, Randi lalu nyeput ilum pinang ba pah kiba Kumang. Udah nya iya pan ngasuh Dana ngambi. Dana pan nyeput ilum pinang nya, tang sambil nya jari iya lalu ngelam pah Kumang.

“Hmm…!Seduai sama bela deka nyadi tuai kayau. Taja pia, laban Randi ngambi ilum pinang ba pah kiba aku, nya alai kayau iya enda rat baka enggi nuan,” pia ku Kumang madahka Dana.

“Enggi nuan Dana, laban nuan ngambi ilum pinang ba pah kanan aku, nya alai kayau nuan rat amai, tang laban maya nuan ngambi ilum pinang lalu bisi ati dekaka utai orang, kayau nuan keterubah lemi, lalu mayuh manuk sabung nuan deka bebadi. Enda lama da agi seiku mensia ke nyelai deka datai ngagai menua kitai tu. Iya nya bala Raja Ribai ari menua tasik besai nyin. Buk orang nya kelabu, idung iya tinggi. Mata iya biru. Nuan enda tealahka iya dalam perang laban nuan enda teitungka penyampau kerak dulang ba tusu aku. Enti nuan ulih ngitung iya, nya baru nadai bansa bukai ulih ngalahka nuan enggau nembiak nuan. Ke bendar kemaya mih aku tu bisi kerak dulang ba tusu! Nya semina kena aku nguji seduai Rani. Aku mega meri jaku tangkan ngagai seduai Dana enggau Randi. Nadai seiku orang ari peturun seduai ulih ngelaban Raja Ribai tauka bala peturun iya,” ku Kumang mafahka Dana enggau Randi.

 Dana enggau Randi sama beperening pangan diri enda tepansutka jaku. Enda lama udah nya Kumang pan bejaku baru.

“Uji seduai malik ngagai kaki langit nyin,” ku Kumang.

Dana seduai Randi pan malik ke kaki langit lalu tepedaka langit petang laban asap enggau abu.

“Nama kebuah langit nyin petang baka nya?” pia ku Dana.

“Baka nya mih asap rumah munsuh ke alah kayau laban seduai jemah ila,” saut Kumang.

“Ni asap enggi aku?”ku tanya Dana.

Kumang lalu nunjukka gumpal asap ke balat bendar nyau ngelindung matahari.

“Nya mih asap enggi nuan,”pia ku saut Kumang.

“Ni asap enggi aku dih?”ku tanya Randi. Udah nya Kumang nunjukka asap muak ke kiba sida tiga.

        “

“Nyin. Asap enggi nuan enda ngemalat enggi Dana,” ku Kumang.

Udah nya Dana pan lalu tedani, maya nya jam kira-kira pukul sepuluh pagi.

DANA BEBINI NGAMBI MENGAN

Orang Kaya Pemancha Dana “Bayang” bebini ngambi Mengan lalu seduai beranak sembilan iku. Enam iku lelaki lalu tiga iku indu. Anak lelaki iya benama Nanang, Luyoh, Aji, Unting, Buda enggau Umpu. Anak indu iya benama Tiong, Landan enggau Badong.

Amai ga jaku Kumang dalam mimpi iya. Orang Kaya Pemancha Dana tu tuai Iban ke pemadu bekuasa di menua bagi kedua (Batang Lupar) maya nya kelia. Kayau iya beberita amat. Kelimpah ari iya empu ti kering sereta berani, iya mega bisi manuk sabung ti kering, berantu sereta berani dikearapka iya ngelaban munsuh. Sekeda ari manuk sabung iya ti tebilang nya Libau “Rentap”, Sabok Apai Mang, Uyu Apai Ikum, Unal “Bulan Genaya”, Igoh Apai Lamban, Orang Kaya Akun “Bedindang” lalu enggau dua iku menyadi iya Isek seduai Senang.

BEMIMPI BARU BETEMU NGGAU KUMANG

Kelimpah ari mimpi maya iya ke baru ngangkatka diri bujang, sebedau iya nyadi tuai kayau, Dana “Bayang” mega bisi mimpi betemu enggau Kumang ba tuchung Bukit Santubung. Dalam mimpi iya, Kumang madahka Dana enda tau ngayau munsuh tunga ke timur laut Sungai Saribas, enggau antara Saribas enggau tebing tasik Santubung. Munsuh mudah deka alah enti Dana ngayau menua antara Santubung enggau Sungai Kayong tunga ke tenggara nengeri Pontianak. Ari mimpi iya, nya mih kebuah Orang Kaya Pemancha Dana “Bayang” enda kala ngayau ngalahka bansa bukai ke diau di sebelah Nanga Rajang. Ketegal mimpi nya mega, tetiap kali iya mansa Bukit Santubung, dalam pejalai iya nurun ngayau, iya selalu ngetu ba tebing tasik Santubung lalu niki ke tuchung bukit nya deka madahka Kumang pasal kayau iya ke deka datai.

Kira-kira dalam bulan Julai 1800, Dana nyerang Sungai Raya di Kalimantan. Bala ke enggau iya nya Iban ari Saribas enggau Skrang ke bebala kira 120 buah perau. Sida ngalahka mayuh genturung pendiau orang, lalu bala pengayau iya munuh lebih seratus iku munsuh ke diau ba endur nya. Kelimpah ari nya sida mega bulih munsuh ke ditangkap lalu dibai pulai nyadi ulun di menua sida.

Udah bulih pemujur nyerang Sungai Raya, Orang Kaya Pemancha Dana dibantu tuai-tuai bansa Melayu Saribas enggau tuai bansa Iban ke bukai ari Saribas enggau Skrang ngayau ke  Sambas kira-kira dalam taun 1804. Sida balat bendar betachah enggau munsuh lalu bulih mayuh dengah. Munsuh ke agi idup nyerahka diri, ditangkap lalu dibai sida nyadi ulun.

(Betampung ba Tusun Ke-5  minggu nyin ila)

Nya mih asal penatai bujang berani Iban nyentuk ke jeman Raja Brooke. Bansa Melayu   Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal  nanjar bansa Iban maya sida bepindah ngiga menua baru endur bumai betaun.  Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatapps tu: 013 8325146  

DITULIS HARRY USUP UMBAR (B. Sc (Hons) Human Development, UPM)