PETARA, ANTU! • Kuasa Mistik Petara (God Almighty)

KUASA MISTIK PETARA… Tanah berenyang tau nyadi ba sebarang endur.

Tusun Ke-43

BEPELASARKA

penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: i. Kuasa mistik Petara (God, Almighty, Tuhan, Allah Taala) ii. Kuasa mistik Antu Bunsu Petara (Dewa Dewi) iii. Kuasa mistik Antu [Sitan, Jin, Iblis]. Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu.

Sebedau aku mai pemacha nampung pansik pasal kuasa mistik Petara (God Almighty) tu aram kitai meratika sekeda penemu mensia mayuh bida Petara (Tuhan), Dewa (Antu Bunsu Petara) enggau Antu. Semua dunya kuasa mistik tiga iti tu endang bisi sangkut paut: sida tu sama diau ba dunya mistik “alam ghaib”; dunya ti enda ulih digusung mensia dunya, enti enda ari kuasa mistik sida empu. Dalam penemu Sains raban sida tu disebut ‘supernatural being.’

NAMA PETARA BEBIDA

Dalam simpul penemu ti pandak Petara (God Almighty) tu sama diau ba dunya mistik ‘alam ghaib’ lalu semampai bekaul enggau Antu Bunsu Petara (Dewa Dewi), Antu. Nama Petara bebida nitihka agama tauka pengarap sesebengkah raban bansa di dunya tu baka: God Almighty, El Shaddai, “God, the All-powerful One” or “The Mighty One of Jacob”, Eternal King, King of Heaven, God of all mankind, Jehovah. Bala Saintis bisi ga nyebut ‘Super Being,” mayuh ti bukai kena nyebut nama Petara enda alah sebut.  
Dalam agama bukai bisi nyebut ayat ti munyi tu,” Orang ti nyembah Antu Bunsu Petara (Dewa Dewi, Diety) deka idup antara semua Antu Bunsu Petara, orang ti nyembah semengat aki ini “leluhur” deka begulai enggau semengat aki ini sida nya, orang ti nyembah Antu tauka utai idup alus ‘makhluk halus” deka idup di tengah-tengah utai idup alus nya mega lalu orang ti nyembah Aku deka idup enggau Aku.” Sapa “Aku” dalam ayat di atas nya?

Bisi ga ayat dalam agama bukai nyebut munyi tu: “Orang ti ngembuan ulah sereta perangai ti manah nyembah sida Antu Bunsu Petara (Dewa Dewi). Orang ti ngembuan ulah sereta perangai inginka ulah kamah nyembah antu raya tauka orang jai; lalu orang ti ngembuan ulah sereta perangai palui nyembah bala Antu sereta utai idup alus “makhluk halus”. Ari ayat-ayat di atas nya tadi kitai mensia patut nemu ni bagi tiga raban ‘supernatural being” ti diau dalam dunya misteri nya patut disembah. Nya bepanggai ba pilih kitai mensia diri empu: enti kitai mensia deka diau manah-manah di dunya tu, kitai patut nyembah Petara (God Almighty) tauka Antu Bunsu Petara (Dewa Dewi) lalu enti kitai mensia deka ke utai ti jai, sembah mih Antu.

ANTU UTAI IDUP MISTIK

Nitihka penemu sekeda agama, Antu nya endang utai idup mistik ti diau ba dunya ti baruh “alam rendah” ti selalu merinsa mensena. Sida tu nyadi Antu tegal ulah jai sida. Antu Bunsu Petara (Dewa Dewi) nya utai idup misteri ti diau enggau ati ti gaga sereta senang lantang.

Pengachau sereta penusah ti datai ari utai idup alus “makhluk halus” tauka Antu nya endang enda ulih diseliah sereta selama aja. Kitai mensia patut ulih milih endur sereta pengidup ti manah di dunya tu. Kebuah pia, laban Antu enggau Antu Bunsu Petara (Dewa Dewi) endang seruran diau ngelingi dunya mensia. Enti kitai mensia ulih milih endur sereta idup enggau manah, utai idup “makhluk halus” nya pan ulih ngelingung lalu mantu mensia mutarka penanggul enggau penusah mensia. Taja pia, sigi amat bisi mega utai idup alus “makhluk halus” (Dewa, Antu) ti udu deka ngachau mensia. Nya alai, kitai mensia patut ngelatih diri empu idup bemoral lalu jaga mih ulah diri empu: reti nya anang ngaga ulah ti jai awakka kitai mensia ulih idup diau begulai enggau sida “supernatural being” tu enggau likun. Reti nya, kitai mensia patut bejimat-jimat sereta ngibun ulah diri empu manah-manah. Munyi ti selalu disebut aku dalam artikel tu dulu agi ari tu: Antu amai udu deka ngachau kitai mensia tang Antu enggai dikachau kitai mensia. Reti nya enti kitai mensia ngachau sida dulu, sida tentu deka ngachau kitai mensia.

SESINDAU DI DUNYA MENSIA

Tu sekeda ari tanya bala kitai Iban dalam SMS: “Baka ni enti bisi orang parai, udah nya bisi ngerau, ngachau, kati nya Antu tauka utai bukai? Ba senentang kitai Iban nganjung bangkai ke pendam lalu disebut antu. Uji sebut niang manah agi, anang nyebut antu. Saut tanya keterubah nya, orang ti parai nya bisi ngerau tauka ngachau nya, endang iya Antu: dalam penemu Sains Spiritual disebut sida ‘energi eletriomagnetis’. Dalam penemu agama Keristin nya disebut semengat sida ti udah parai “roh” ti apin diterima masuk serega sereta agi sesindau di dunya mensia lalu minta diri disembiangka kitai mensia ti agi idup minta Petara (God Almighty, Tuhan) nerima sida tama menua serega. Nya mih kebuah sida nya kekadang ayan, kekadang bisi didinga bemunyi bejaku, belagu, betabuh enggau mayuh macham ulah. Nya ti dikumbai kitai ngerau, ngachau. Dalam daya idup Iban sida tu disebut Antu Sebayan.

Antu Sebayan tauka ‘roh’ @ semengat mensia ti udah parai nya, kekadang amat bisi ngerau tauka ngachau tang sida tu enda ngemedis kitai mensia dunya ti agi idup, enti kitai mensia enda ngachau sida dulu. Sida tu ukai Antu jai: Sitan, Jin, Iblis, Sihir. Nya alai, kitai mensia anang takut enti maya meda senaya tauka ninga bunyi sida tu. Besembiang, besampi minta tulung Petara (God Almighty) nitihka agama tauka pengarap diri empu. Pia mega, kitai mensia mega tau besampi ngena chara diri empu bejaku enggau Antu nya, minta sida anang ngachau tauka ngerau kitai mensia.

Pasal penemu kitai Iban ti nyebut bangkai orang ti parai nya, antu laban dalam daya idup kitai Iban ari kelia menya endang pechaya; maya mensia parai, iya endang nyadi Antu. Betul mih nya, dalam penemu agama tauka Sains Spiritual, maya mensia parai ‘roh’ @ energi eletromagnetis nya pansut ari tubuh mensia.

Nya mih, nitihka penemu agama enggau pengarap mensia di dunya tu, nya mih bida tiga bengkah kuasa mistik nya. Pia mega, tuju aku mansik kuasa tiga kuasa mistik tu mega ukai tuju deka ngelakuka: aku semina bebagi penemu enggau pemacha lebih-lebih agi bansa kitai Iban ambika kitai enda tesat penemu bekaul enggau pekara tu.