Udah menuku, ulih mansang jauh agi

BALA penanyi Iban maya Anugerah Musik Dayak taun 2016 suba.

MUSIK kitai Iban sepengudah 57 taun dalam Malaysia, udah ga mansang sereta dikira menuku. Taja pia asai sepi aku agi mengkang kekalat ngiga tunga kuing ti betul sereta identiti ti meruan awakka terus mansang jauh agi.

Amat udah bisi beratus iku ngela diri artis rekoding, mayuh sida tu agi tesat ba tunga enggau kuing musik sida. Endang amat jauh udah mayuh mansang senentang penyampau, tang mayuh bala ke ngumbai diri artis rekoding nya semadi enggai enda enggau orang ngeruh ai. Reti nya tau dikumbai kitai agi mayuh penimpang enggau pengurang meh industri musik kitai Iban.

Bisi sekeda sida nya nadai kualiti sekali ari sera enggau chura nyawa, ari leka lagu ka tambah mega musik ke semadi enggai enda.

Taja pia, penulis ukai enda meransang pengagit bala penanyi sereta studio rekoding. Ka tambah mega, mayuh pangan penulis empu ti sama kenanas enggau begaga lagu, numbuh studio, bemain musik sereta rekoding lagu. Penulis empu lalu apin ampit enggau rekoding laban telajak tegal ngambi degree ngagai menua tasik kelia.

Pemansang ti tetap bisi mai pengaga ati ngagai kitai semua nya baka sekeda kitai Iban empu ke udah nguji numbuhka kompeni rekoding diri empu baka ANP tauka Andrewson Ngalai Production di Miri, AMP (Apai Music Production) enggi bala sida Steven Bana di Sibu lalu pia mega SMP (Swaylin Music Production) di Sibu enggi penyanyi ‘Tusah Belaki Nguai’ Swaylin. Sama bisi rekoding ngena label SMP nya penanyi tebilang Winnie Albert. Lalu pia mega kompeni enggi kaban kitai Wesley Belaja (Wesley Production Studio) sereta mega enggi pengajar Embat Lala tauka Lembat Imban ti udah numbuhka Panggau Buluh Pengerindu (PBP) Recording Studio. Kelimpah ari Embat empu, sama bisi ngaga rikot ba PBP nya baka penanyi Melissa Francis, Gabriel Fairoz Louis, Jesley Jabu enggau Hailey kelimpah ari bala sida bukai.

Ka tambah bala sida nya tadi, iya nya bala di Miri enggau Sibu, di Kuching pan bisi mega kompeni baka Era Music Production enggi Lemambang Lemai ke bisi ngerikot sekeda penyanyi indu baka Cynthia Beatrice enggau Dara Cherira sereta mega penyanyi lelaki baka Lemambang Lemai empu enggau orang bukai mega. Lalu pia mega penanyi Lelaki-Lelaki Jenny Tan mega bisi kompeni iya empu Goldern Pearl Recording Studio (GPRS) ke suah udah ngemansutka album enggi iya empu sereta mega enggi apai tuai iya Jenarino Jeraki sereta bala penanyi bukai baka Maxwell Franklin Saran, Timothy enggau Betty Bawing. Pemenang perais DAMA taun 2008 Ernesto Kalum (Seribu Satu) bisi mega numbuhka siti rekoding studio Borneo Headhunters Music House. Kelimpah ari iya empu, sama ngerikot ngena label tu mega penebah sapek tebilang sedunya tu Jerry Kamit. Lagu tebilang Jerry iya nya Flora. Taja semua sida tu udah lama ngerikot lagu, mayuh lagu nya agi mengkang ditabur tauka dipasang ba radio laban tetap merindang bala peninga.

Penulis gaga bendar ati laban pangan lama baka pengajar Isa Lee ti bisi degree dalam musik udah mujur ngerikot sekeda lagu apin lama. Bakanya mega penanyi Elvis Sarawak Wilfred Vincent Ragam pan bisi ga ngaga lagu Iban baru apin lama. Meri puji ngagai Isa seduai Wilfred.

Penanyi veteran bukai baka Melissa Francis, Jennifer Jack, Ricky L, Andrewson Ngalai, Winnie Albert, Lucy M, Leezwita Ripin, Karen Libau sereta sida bukai mega terus merindang laban semampai diambi orang merindang ba panggau tauka pengerami di menggeri tauka ba menua pesisir. Penulis nemu laban kala begulai merindang enggau bala sida tu di mayuh endur di serata menua Sarawak tu.

Lalu pia mega di Kuching bala sida Brada Beti, sida Gibson Rentap (OCH Sound Production) enggau bala sida bukai mega udah puh numbuhka studio rekoding diri empu. Sekeda ari bala penanyi ti bisi ngerikot lagu ngena OCHSP tu baka Leez Zwita, Ranee Pat, Fidarus Udin enggau Jessica Remaya. Ngarapka sida tu mengkang chakah diatu.

Raban (band) pemusik Iban pan mega udah mansang mayuh lalu udah balat besemekih enggau pangan diri. Sida tu nyengkaum Masterpiece, Ethnic Transmission (ET), Hevance, Taju Remaung, Sullivan, Aorora, Loudness Empire, ZK Band, Tok Ya Band, Apin & Project 2, Kimara Band sereta sekeda raban bukai mega.

Aku nantaika jari kanan nabi sereta meri puji ngagai sida tu.

Nyadi pengerembai sereta pemansang industri musik Iban ukai mina dipeda tauka dikira ari penambah tauka pemayuh penanyi enggau band ke majak betambah tang mega ari pemayuh bala kitai Iban ke ngemeranka dagang besangkut paut enggau musik, iya nya bala kitai ke bisi muka dagang kedai rekoding sereta kedai bejual rikot, kereban tauka rengka tebah musik.

Munyi ke udah disebut tadi agi ulih itung ngena jari bala kitai ke ditemu udah enggau ngeruh ai ba utai dua bengkah ke disebut aku tadi, iya nya muka kedai nyual VCD tauka kedai nyual rengka enggau kereban musik.

Amat meh pengawa dagang bansa kitai ba utai dua bengkah nya agi kurang, nadai nya ngawa, laban diatu penyampau penanyi kitai enggau pemayuh lagu baru majak betambah.

Tu siti pemansang ti positif taja pan utai ti agi ngasuh ati irau nya senentang kualiti tebah musik, tiun enggau leka lagu, sereta mega kualiti nyawa enggau patah nyawa sekeda penanyi baru diatu ti agi minta garam tauka gula tauka biching. Ka ngumbai nya tabar ukai ga, masin ukai ga, manis pan ukai. Nyau enda temu pun enggau ujung, enda temu ulu enggau ili enggi bala sekeda.

Sekeda dinga aku, manah enda ibuh enggau rekoding, nadai bendar nyawa dianjung enggau rekoding. Semadi lagu sepunsa meh baka sida DJ radio Cats deka masang lagu sida nya.

Enda ulih sebut nama semua bala penyanyi Iban ke nadai alai mantah nyawa. Taja pia, lebuh kitai mulaika pengingat ari pun, kitai enda tau enda ngingatka bala orang ke ngepunka industri musik kitai ari mula iya kelia.

Taja pan mayuh penanyi baru, pending aku sigi tekait ninga lagu sida ke udah pegari nama ari pun iya kelia nyengkaum Eddy Jemat, Dato Johnny Mustapha (Tanah Ai Menua Aku), Robert Lingga (Ngenang Iya), Brangka Bayang (Balang Semaya), Edward Jelani Salok (Anang Ninggal Ka Aku), Clement Ingun (Aku Nemu Ari Suba), Antonio Jawi ke tebilang enggau lagu Ingat Ka Aku, Samuel Lawen (Anang Ngumbai Ku Berubah), Michael Jemat, Jimmy Jalil, Christopher Kelly (Bungai Layu),Christopher Kerry Landung (Maria Ambai Aku) Wilfred Vincent Ragam (Penyayau Pengerindu Ka Nuan), Reynolds Gregory (Pengerindu Ku Enda Berubah), Gabriel Tamby, Zameri Amera, Johnny Aman, James Samy, Jonathan Jubin, Andrew Bonny James (ABJ) enggau mayuh mega penyanyi indu baka Esther Bayang, Pauline Linang, Roselyn Abunawas, Datin Senorita Linang, Gloria Anding, Penny Lily, Nancy Kadir, Angela Martin enggau sida bukai.

Bala sida tu meh ke udah pegari nama ketegal ke ngerembang, ngerandang, nebas enggau ngupas jalai awakka nyamai ditengah bala penanyi ke dudi ari sida, iya nya baka penanyi kitai ke benung regas diatu.

Sampai ka kemaya haritu bala sida ke disebut nya tadi endang agi meruan dikenang mensia mayuh. Sekeda ari sida tu endang agi puh merindang mensia mayuh lebuh maya bisi pengerami tauka pengawa merindang ba panggau.

Tebal agi lagu ti dibai sida nya endang ditengkebang sida empu. Bisi ga sida ngambi tiun ari lagu bansa bukai baka orang putih (English), Melayu, Hindi, Mandarin enggau bansa bukai.

Ba sida ke indu mayuh mega leka lagu nya ngerinduka ati lalu mega ditambah enggau video clip ti manah baka lagu Bujang Lelinggai (Margaret M. Jalang) enggau Tusah Belaki Nguai (Swaylin). Bisi mega sekeda udah nguji ngaga video clip ba menua tasik.

Lebuh ke bekenangka bala penyanyi indu baru diatu, kelimpah ari Jennifer Jack seduai Betty Bawing agi mayuh penanyi ke lama enggau baru bekualiti tinggi baka Linda, Stella Philip, Angela Lata Jua, Margaret M Jalang, Felicia Gek (champian Bintang RTM 2005), penanyi bansa Bidayuh Fiona John, Winnie Albert, Rozlina sereta Maryline enggau enda ditinggal mega penanyi Lauk Kitai Urai, ka tambah agi mayuh orang bukai mega.

Munyi ti udah disebut ari sebedau tu, ba rebak ke dudi agi bisi mega penanyi industri musik kitai sigi amat tau dikumbai mansang maju, taja pan agi bisi pengurang ke berupai baka ba senentang kualiti lagu, nyawa, tebah musik, sereta penguntung belanja.

Kitai bela bepinta sereta ngajihka industri musik majak ngerembai sereta maju ukai semuti di menua Malaysia enggau Asia Tenggara baka ke diatu tang ngagai serata dunya.

Oleh TELESA EMPERAN