Belajar pemanah ari cherita wayang

MULAIKA PENGINGAT LAMA

Ba dunya kemayatu chukup rindang bendar ati laban ulih meda mayuh bengkah cherita wayang ba YouTube. Bakanya mega bala ti rindu ninga lagu pan seneka ati milih ni bansa lagu deka didinga diri. Apin lama ti udah, penulis bisi meda ba YouTube cherita ‘Birth of The Dragon’ ti nyerita pasal pejalai pengidup Lee Jun-Fan tang lebih agi dikelala mensia mayuh sedunya tu ngena nama Bruce Lee.

Tu mulaika pengingat tudah pangan pasal pengagit diri meda cherita Bruce Lee ba panggung wayang di Sibu kelia dalam taun 1970 ngagai 1974, nyengkaum maya iya udah parai. Ngenang maya radio ti nabur berita pemati iya kena 20 Julai 1973, tudah pangan benung kiruh ngantung bunga keretas kena ngiyas ruai kami sebilik laban ti deka ngintu Gawai Antu dalam bulan Ogos taun nya. Udah bekau radio nabur berita pemati Bruce Lee di Hong Kong ti maya nya agi nyadi koloni British, penulis lalu nadai ati agi deka neruska pengawa ngiyas ruai laban ‘hero’ diri udah midang. Umur Lee maya iya parai mina 32 taun aja.

Ada kena 27 November 1940 di China Town, San Francisco, Lee ti ngembuan Masters Degree dalam Falsafah (Philosophy) ari University of Washington, di Amerika Sarikat, melakun, ngeluar sereta nyadi pengarah filem di Amerika sereta mega di Hong Kong. Lee meh ti ngangkatka pengelandik jari belaban bebukut, bekuntau sereta ngena senyata kayu ti dikumbai ‘nunchakoo’. Tang Lee madah penemu bebukut ngena jari enggau kaki iya diberi iya nama Jee Kun Doo. Lee meh ti muka mata dunya, kelebih agi dunya Barat pasal pengelandik jari tauka ‘martial art’ bansa Cina.  

Tegal Lee ti parai meh, bisi empat pintu bilik ba rumah panjai kami nginjau aku nero gambar Lee ba papan ngena chat lalu digantung sida ba dinding nyadika iyas maya gawai. Siti papan dero sida meri aku duit RM5. Bisi ga belanja dibai pulai ke Sibu ti alai aku sekula maya nya.

PEMINAT BRUCE LEE

Nyau kelama udah bekau Lee ti parai, tudah pangan mujur ga ngelumu semua VCD tauka DVD iya ti ngundan cherita wayang baka ‘The Big Boss’, ‘Fist of Fury’, ‘Way of The Dragon’, ‘Enter The Dragon’ enggau ‘Game of Death’. Ti pengabis dudi tu enda abis digaga alai iya parai lalu disambung pelakun bukai ti sebaka pemesai, mua enggau gamal. Kelimpah Lee aku mega bisi ngumpul wayang anak iya Shannon (indu) enggau Brandon. Tudah anak lelaki iya tu pan parai lebuh benung ngaga wayang. Senapang kelulu kena nimbak iya dalam wayang nya ngeluarka seterum bendar lalu munuh Brandon.

Lengka cherita sida Lee sebilik, maya penulis sekula dua taun di Sibu sereta sebedau enggau udah badu sekula, endang semampai meda wayang cherita Cina di menggeri Foochow. Deka pan meda filem Iban, nadai meh rambau nya (entara taun 1970 ngagai taun 1986).

PLAKUN WAYANG CHINA TEBILANG

Abis panggung Sibu alai meda cherita ari Taiwan enggau Hong Kong. Nya alai maya nya anak Iban jarang enda nemu nama Jimmy Wang Yu, David Chiang, Ti Lung, Yueh Hua, Lo Lieh, Chen Sing, Li Ching, Lily Ho, Lin Ching Hsia @ Bridgett Lin, Cheng Pei Pei, Chen Kuan Tai sereta mega bala pelakun bukai nyengkaum Jacky Chan ti baru berengkah pegari nama. Maya nya bisi majalah ‘The Southern Screen’ ti semampai dibacha penulis laban ngundan cherita pasal bala pelakun Shaw Brothers and Golden Harvest di Taiwan enggau Hong Kong.

Nitih ke pengingat, ari semua panggung wayang di Sibu ti balat agi digusung mensia mayuh nyengkaum Cathay, Lido, Rex, Palace, King Hua enggau Zenith. Maya ujung minggu enggau maya bisi cherita wayang dikerindu endang semampai penuh sekeda panggung di Sibu. Ba panggung King Hua selalu bisi  ‘matinee double-feature’ tauka wayang tengah hari dua iti wayang besambung tang bayar ungkup siti tikit aja. Bala kami nembiak masuk nengah pintu 50 sen (kelas tiga) tang udah wayang belabuh, mayuh terengkah ba penuduk kelas satu (maya nya berega RM1.10 tauka RM1.40). Kebuah pia laban mayuh kerusi puang. Ka tambah mega ba kerusi 50 sen nya balat ensium bau kesing laban kelalu semak alai kemi enggau agu.

PELAKUN WAYANG CHINA BUKAI

Kelimpah ari ti udah disebut bala pelakun wayang Cina bukai ti udah ditemu mensia mayuh maya nya nyengkaum Alexander Fu Sheng, Charlie Tsin, Tang Kwang Lung, Ku Feng, Chow Yun-fat, Chang Cheh, Nora Miao enggau Betty Ting Peng. Nyadi bala sida Andy Lau, Jet Li, Zhang Ziyi, Guo Ling, Donnie Yen sereta sida bukai nya dudi agi.

Ari semua wayang kelimpah ari Bruce Lee, sekeda wayang bukai ti chukup ngerinduka ati maya nya suba nyengkaum ‘The One-Armed Swordman’ (Jimmy Wang Yu), ‘New One-Armed Swordsman’ (David Chiang), ‘Twelve Gold Medallion’ (Yueh Hua), ‘Chinese Boxer’ (Jimmy Wang Yu), ‘Have Swords Will Travel’ (David Chiang, Ti Lung), ‘Deadly Duo’ (David Chiang, Ti Lung), ‘The Wandering Swordsman’ (David Chiang), ‘Shaolin Temple’ (Alexander Fu Sheng), serintai betampung ‘The God of Gamblers’ (Chow Yun-fat) enggau mayuh utai bukai.

Musik chukup manah enti ‘hero’ baka Jimmy Wang Yu, Yueh Hua enggau sida bukai baru deka datai nyelamat orang ari munsuh, tetap ngasuh mata ngenchelak. Tang enti cherita beambai enggai Tang Kwang Lung seduai Chen-Chen balat munyi kuruh sekeda mensia, kelebih agi enti maya ngalih hari.

AJAR PEMANAH ENGGAU PENYAI

Diatu muntang amat enti deka meda cherita enda ngira iya Cina, Melayu, English tauka Hindustan enggau jaku bukai. Tu beduduk ari kitai ulih meda ngena YouTube ba talipaun binching diri empu. Penulis bekunsi tu enggau pemacha ukai ketegal kelalu gaukka cherita Cina tang tegal maya nya kelia di Sibu, wayang Cina meh lumur satu. Semua cherita bisi nyelit ajar pasal pemanah enggau pemetul ngagai orang ti meda lalu manding nya enggau penyai ti ngenataika pemerinsa, penusah, pemedis, pemenchi sereta utai bukai. Semua cherita wayang endang kena ngajar mensia mayuh awakka nyadi orang ti beguna, manah ulah, menyana pendiau, bisi ngembuan pengasih enggau pemanah ti bukai.

Nyadi bala Iban apin bisi cherita wayang maya nya. Nyau dudi tu tadi bisi ga kaban baka penanyi Wesley Belaja enggau bala bukai ngaga sekeda cherita wayang panjai enggau pandak. Dudi ila kitai meratika pejalai cherita kitai Iban. Diatu endang udah mayuh ga tukis gaga kitai Iban tang ngagai diatu penulis apin ulih bekunsi enggau pemacha mayuh. Ngarapka dudi hari kitai sampa ampit ngelulu diri nyadi orang Panggau Libau Lendat Dibiau Takang Isang, sida di Merawa Lama Munyi Berimba Bunyi Tabang, sida Puting Engkeranji Padi Nengah Titi Mansang Ngabang. Ngichaka kitai ulih ngading sida Keling Gerasi Nading Bujang Berani Kempang, Datu Au Mayuh Bini Seribu Tunang, sida bini iya baka Dayang Mesanggai Kumang, Indu Pemadu Bajik Chukup Ngelentik Manah Singkang, Mayuh Pengelandik Jari Nengkebang.

Besampika semua kitai panjai umur, gayu guru nyambut taun baru 2021. OOOhaaa!!!

Oleh TELESA EMPERAN