Cherpan: Laya Enda Benyawa, Kubur Enda Betanda

Tusun Ke-3

BEBAKIH DALAM KAPAL

“Bah kati ku nuan enggau nya lagi dih?” ku Joshua.

“Udah disimpan aku lagi deka ditempalungka aku ke tengah tasik,” ku John.

“Apuu. Lapa nya baka nya? Tak nadai ngena pos la nya punggal,” ku Joshua.

“Nadai. Tu kereja orang tuyu. Ni nemu, enti diatur Petara tau tu datai ba iya. Enti enda datai ba iya, sebarang orang ke tetemuka iya mih macha,” ku John.

Jam nya lalu ganchil jari John nempalungka butul nya ke tengah tasik. Laban angin ke deras, nadai didinga chebuk butul nya labuh di ai tang nadai jalai iya enda temepak ba tasik.

“Eh, nyau majak chelap tu manah pulai ke dalam kibin tua” ku Joshua.

Seduai bela nurun ngagai kibin. Lebuh datai di endur iya, Joshua merening ngagai sukut siti ba bilik alai iya. Iya tekenyit meda apai enggau indai nembiak nya bela bekesirut nunga nembiak nya ke digalika seduai ba bed dia. Bejalai gegadai nuju sida nya, Joshua lalu nanya.

“Bah nama macham kita dih aya?” ku Joshua.

“Eh, bisi penusah kami tiga tu. Nembiak tu tak makin raya. Kada teantika datai di menua iya tu,” ku terang apai nembiak nya sengih-sengih.

Jam nya kapal udah balat bendar beguyat. Pedis bendar deka bediri tauka duduk entap; asai ke diju ke mua tauka ditarit ke belakang.

“Kati enda ngemegau orang kitai? Uji aku ngangauka sida kelasi,” ku Joshua.

“Eh, enda ibuh Igat. Lagi tusah orang,” ku apai tuai nya.

Iran ati Joshua. Lapa apai tuai nya enggai madahka orang? Ba perati iya nembiak nya tak nadai engkebut. Iya tak sangkaka anak nya endang udah raya lebuh sida menyanak iya tama ngagai kapal lemai tadi. Naka mih pengasih nembiak nya nadai diberi tulung. Joshua mulaika diri ngagai alai iya lalu nguji ngenatka diri mai ati ti enda nyamai meda nembiak nya.

“Kati enti nembiak nya tak nadai maya kapal agi di tengah tasik? Reti nya kapal nya mai bangkai,” ku Joshua bejakau dalam ati.

Iya ingatka jaku orang tuai ti madahka kapal di tasik ti bisi mai bangkai nya mali besai. Iya enggai berundingka pemali nya.

KAPAL DIPANGKA GELUMBANG

Lebh nguji gali, iya tak enggai nyadi. Kapal tak balat beguyat dipangkaka gelumbang. Joshua nyangka gelumbang endang besai, ti ngasuh kapal nya ama dipangka ke atas ama merempas baru. Dikira Joshua, lebuh pejalai udah empat jam, kapal dikira udah jauh ngeluah nanga sungai Sarawak lalu udah ngerenchah tasik luar ba urung nanga Sadong. Kapal udah besatup enggau gumbang besabung urung pulau Burong. Kira-kira tengah malam kapal udah ngelanggar tasik ba tiban nanga Batang Lupar lalu ngelimpas nanga Saribas. Pangka gelumbang udah balat bendar asai iya ngesaika kapal ti alai pangka nya merempas ba tubuh kapal. Enti nadai apa nama, kapal nya datai di Sarikei tumu-tumu pagi hari siti.

Ngasaika utai baka nya, Joshua balat irau. Pala iya berasai ngelu lalu perut iya nyagul-nyagul asai ke deka mutah. Nyamai agi iya di luar ku ati iya awakka meda nama utai ti nyadi. Ba dek ai tasik balat bendar tesimbur ke dalam. Bala penumpang ke dia balat tasah; basah lalu chelap. Ribut bepuput deras ngasuh gumbang makin gila. Kapal nya asai ke dilambung gumbang. Bala penumpang nyau bepegai rat ba sebelah utai ke bisi dijapai. Bala kelasi baka ke bisi belabuh nyendiaka pelepuk. Bala penumpang nyau rachuh.

Joshua malik ngagai jam ba dekuan iya. Dalam petang nya gamal jam urung pukul dua dini hari. Dikira Joshua kapal nya udah datai ba tiban nanga Krian nyau nuju nanga Batang Rajang. Kabut nyau merengung diseretaka enggau ujan bangat. Gumbang nyau majak mangka makin balat. Kapal singit ke kiba, malas singit ke kanan. Kanvas nyau bekekebap. Nyau kelama kanvas nyau nadai bemunyi agi. Tentu nya nya udah tekebu. Tin bekeraruh bebaring ba ruang kapal alai nyimpan barang. Bisi munyi orang besai tuai nerais. Anak mit nyabak rerengai. Bisi munyi ai tesimbah masuk ngagai ruang dek. Bisi asai kapal nya tak tetensam. Ribut majak deras. Joshua ingatka sida apai tuai nya menyanak. Iya ingatka John. Iya ingatka penumpang ke mayuh nembiak enggau kaban indu.

KAPAL MV KIDJANG TENGELAM

Di tengah-tengah munyi kabut enggau empas ai bisi didinga utai merentum; munyi kerita ti belanggar. Munyi nya datai ari tanju kapal nya. Orang nyangka nya entukar ke diundan, puas ke digura kapal, nyau putus tali penanchang sida. Nya dijangka orang ngasuh kapal singit ke sepiak. Bisi sangap nyawa jeragan ngasuh nyuaka pelampung ngagai penumpang. Joshua berunding deka nulung orang bukai kelebih agi bala anak mit ke bekechit; bekerauh, manjung enggau nerais minta tulung. Tubuh kapal udah belabuh tengelam. Mensia mayuh bekechapu ngidupka diri. Joshua nyangka orang ke dalam kibin endang enda benyawa laban tepekul.

Joshua tepedaka siti tin lelepung mansa iya. Jampat iya nyapai tin nya lalu bepegai dia awakka pala iya enda tengelam. Kasut ke dikena iya balat ngeribat, lalu diperurutka iya enggau ujung kaki iya. Nya ngasuh iya ulih ngepaika kaki ngasuh tubuh iya melepung. Tanchut panjai enggau baju chelap iya balat ngeribat iya melepungka diri empu. Baju ulih dibuka iya tang tanchut mar enggaika nya malut kaki iya. Gaya utai balat kelam-kabut. Perening enda ulih jauh. Iya nadai meda utai. Mua selalu dipangka umbak. Dua tiga kali iya disagu sereta ditengelamka umbak. Suah iya sedekan lalu batuk tesintakka ai. Iya berasai pemadu iya chelap. Nyau kelama asai iya deka alah. Kaki iya enda ulih kekepai agi nyemerai; semina iya ngenanka diri enda tengelam. Tin nya nasit enda teleka ari pegai iya. Iya nadai ninga utai bukai agi. Nadai ninga munyi mensia. Semina munyi pangka gelumbang ke bisi. Sempat Joshua nyebut nama Jesus. Ingat iya semina Jesus ulih ngeneduhka tasik begelumbang. Jam nya dunya nyau petang.

Oleh JANTAN UMBAT