Bujang Berani Iban Dua

NGETANKA MENUA… Sekeda ari bujang berani Iban ti seruran berani ngetanka menua enggau bansa.

Tusun Ke-11

MINGGAT APAI RUNAI

Minggat bebini nguaika Jara, lalu diau enda lama di Suri, Rimbas sebedau iya pindah ke Awik dalam taun 1854.

Pemulai Linggir Mali Lebu ti ngalahka Beketan, di Ulu Sugai, Julau, nembiak iya ti benama Sa ti bensumbar “Lua”  Apai Minggat pan berunding deka pindah ari Paku ke Awik, dalam Batang Krian. Iya mai isan iya Enteri, apai Jara di Suri, Rimbas ngabas menua Awik. Apin lama udah pulai ngabas menua Awik, Sa “Lua” apai Minggat pan mati di Kerangan Pinggai, Paku. Enteri apai Jara mega mati di Suri, Rimbas. Sa “Lua” anjung ngagai pendam Batu Anchau.

Udah apai sida (Sa “Lua”) diperantu, Enchana “Letan” menyadi tuai Minggat nguluka orang Paku, pindah ke Awik. Minggat nitih dudi ari menua bini iya di Suri, Rimbas, lalu mai bala iya berumah ba Nanga Setira, enda jauh ari menyadi iya Enchana di Lubuk Gamba. Ari nya Minggat pindah baru lalu berumah ba Tanjung Lubuk Kepayang. Angkat ari nya sida pindah ke ulu agi ngagai Nanga Mitas. Menyadi iya Enchana “Letan” berumah di Rantau Menukol betangkup tanju enggau rumah Kalong tauka Apai Jumput “Bedilang Besi’.

MINGGAT DICHIRI NYADI PENGHULU

Ketegal pemerani enggau pemanah ulah sereta pengelandik Minggat ngatur ruang bilik sereta ngempung nembiak iya di Awik, Minggat dichiri perintah Raja Brooke nyadi penghulu Iban keterubah megai Awik, Kerian Ili, Sebetan enggau Sebelak.

Dalam taun 1858 udah Minggat entap nyadi tuai di Awik, perintah ngasuh iya nguluka bala Iban ari Kerian enggau Awik ngalahka Panglima Mujah “Buah Raya” di Julau. Perintah deka ngukum Mujah “Buah Raya” laban iya ditemu perintah suah mantu Libau-Rentap di Bukit Sadok. Kelimpah ari nya Mujah mega suah bendar matak kayau ngalahka bansa bukai sebelah tebing Batang Rajang di menua Kanowit. Orang bukai ti dibai Raja ngayau Mujah Julau maya nya mega Iban ari Undup enggau Lingga, Iban Skrang Ili, Layar, Paku, Rimbas enggau Kerian ili. Mujah alah lalu rumah panjai sida ditunu bala Raja Brooke.

Dalam bulan Mei 1863, lebuh Tuan Raja ngayau Kayan enggau Kejaman di Belaga tegal ti ngelalaika Sawing seduai Skalai, tuai bansa Rajang ti udah munuh Tuan Steele seduai Tuan Fox di Kanowit. Minggat mega dikearapka Raja nyadi tuai kayau nguluka bala Iban ari Kalaka-Saribas. Bulih bendar sida pala, tangkap enggau perepasan maya nya.         

TUAI KAYAU PERINTAH RAJA

Udah nya perintah Raja ngasuh Minggat ngayau bedarat ngalahka bala munsuh ti rari ke ulu Kanowit, Ulu Mujok engau Ulu Katibas. Pengudah nya bisi mega sida bekupan di Ulu Kemalih, enggau Ulu Bayu ngelingi Bukit Stulak. Sekali tu Minggat enda tealahka munsuh perintah Raja nya. Ranggau seduai Janting makin ransing ati agi deka angkat ngelaban perintah. Iya lalu mai bala iya ngenan baru di Bukit Dugan. Bukit Dugan tu renjan bendar antara menua Ulu Mujok, Ulu Ensiring, Ulu Poi enggau Ulu Dugan pati Sungai Kanowit. Sida bekuta lalu ngenan dia. Dalam taun 1860, apin tembu kuta nya, perintah Raja ngasuh Minggat ngayau sida nya. Minggat ngayau sida Ranggau lalu mujur ngalahka munsuh perintah Raja nya. Udah nya semua munsuh ti udah nyerahka diri ngagai perintah Raja pulai ke Ulu Entabai. Sida ti kih lalu agi deka ngelaban nan lalu ngaga kuta ba Dugan di Ulu Ensiring.

Minggat diasuh Raja Charles Brooke nguluka bala ngayau baru ke Ulu Ensiring. Maya tu iya mai Kandau apai Limbak seduai Sumbang apai Imas ari Paku nyadi tuai nguluka orang ari Paku. Datai sida di sungai Ensiring, sida pan  tetemuka perau orang dia. Ngena perau nya sida undur ke ili di nanga Ensiring. Datai di nanga Ensiring sida pan betemu enggau bala Minggat ti mai bala besai ari Awik, Kerian ili, Sebetan enggau Sebelak. Manuk sabung Minggat maya nya iya nya Luna ti bensumbar “Panggau”, bujang berani Batang Sebelak. Ari nya sida pan bedarat ke ulu Sungai Ensiring. Ari nya sida pan ngalahka semua rumah panjai ari Ulu Ensiring nyentuk ke nanga sungai nya. Kayau Minggat maya tu mega mujur bendar. 

Udah mujur ngalahka Ranggau seduai Janting di Ensiring, Minggat pan nemuai ngagai Raja Brooke ke Sarawak (Kuching). Din iya nusui pasal pemujur kayau iya. Iya mega madah, munsuh tetap enggai nyerahka diri lalu seruran deka ngelaban perintah Raja. Ninga ripot Minggat nya, Raja pan ngasuh Minggat minta bantu Linggir “Mali Lebu” ari Paku, Chulo “Tarang” ari Kumpai, Kerian enggau  Entering apai Nawai ari Julau.

Maya Minggat agi di Sarawak (Kuching), Ranggau seduai Janting belabuh ngupas Bukit Dugan baru lalu ngaga kuta ari batu belapis-lapis. Dinding kuta digaga ari batang-batang kayu tebelian. Bala sida ke agi nan di Bukit Dugan nya datai ari Ulu Julau, Ulu Budu, Ulu Layar, Ulu Kanowit enggau orang ti udah lama diau di genturung menua nya.

NYERANG KOTA BUKIT DUGAN

Pulai iya ari Sarawak Minggat, ngumpul bala pengayau ari Awik, Sebetan enggau Sebelak. Linggir Mali Lebu nguluka orang Paku enggau Rimbas. Chulo “Tarang” mai bala ari Ulu Kerian. Datai di Julau sida pan ngejung Entering apai Nawai, tuai Iban menua nya. Ba kayau tu, Chulo “Tarang” seduai Entering enda tentu senang ati laban nembiak seduai ti bisi enggau orang angkat ngelaban perintah Raja. Maya nya dua iku nembiak Chulo “Tarang” ari Dassey enggau munsuh perintah Raja ngenan di Bukit Dugan. Patut tauka enda kitai tu ngayau munsuh Raja, ukai munsuh kitai empu? Kada enda palui kitai tu diasuh Raja ngelaban bansa diri empu? Baka manuk mih kitai tu, disabung orang ba kelang, diasuh bansa orang munuh bansa diri empu. Manuk munuh manuk. Iban munuh Iban. Kati untak kitai tu sebaka enggau untuk manuk? Lama seduai berunding kediri.

Ba kayau tu sida nadai besatup enggau munsuh. Datai sida di Bukit Dugan bala munsuh udah ngerarika diri. Maya ti baum enda lama sebedau mulaika diri ari endur nya, Minggat nangkan bala iya.

“Perintah Raja semina ngasuh kitai ngayau munsuh iya ti apin nyerah ba Bukit Dugan aja. Munsuh ke rari ke Ulu Katibas enda tau dikachau,” ku Minggat.

“Balang mih kayau kita tu Watt … Ngelama tu tak enggai lebu mih aku Watt enti enda muai darah gatal,” pia ku Linggir.

“Nya mih jaku perintah Raja. Nadai ku enggau ga. Raja ga udah nangkan kitai enda tau ngayau ke Ulu Katibas,” pia ku saut Minggat.

Sekumbang Minggat nyadi tuai kayau, baru sekali tu mih seduai iya Linggir begulai matak serang. Maya seduai agi di Paku suba Minggat seduai Tarang agi nyadi manuk sabung Linggir seduai Dana “Bayang”. Udah ti alah ngelaban Raja Brooke di Beting Maru, Linggir seduai Minggat enda kala matak serang agi enti enda nitihka asuh perintah Raja. 

Taun 1882, Minggat sekali agi diasuh Raja nyadi tuai kayu nguluka bala perintah Raja ngayau munsuh iya ba Bukit Batu di Ulu Mujong, Kapit. Sebedau belabuh nyerang Minggat seduai Tarang diasuh Raja Brooke berunding enggau Janting “Lang Labang” ari Kanowit ti udah enggau orang nan di Bukit Batu. Raja ngasuh iya nunduk lalu badu agi ngelaban perintah agi.

Minggat seduai Tarang pan mai bala anak enggau menantu seduai betemu enggau bala Janting. Janting enggai berunding tang majak deka ngelaban sebarang sapa ti nanahka perintah Raja Brooke. Sida endang udah besedia deka betempuh enggau bala Raja. Sida pan bamuk ngena duku nyabur, sangkuh enggau senyata bukai mega. Lebuh ti betempuh nya, bala Minggat mayuh amat bakal, tang nadai mati. Bala Janting mati seiku aja.

Ba taun 1886, Minggat sekali agi nguluka bala perintah ngalahka Ngumbang “Berauh Langit” ari Mepi enggau Bantin Ijau Layang ari Ulu Ai ti angkat baru ngelaban perintah ba Tinting Kedang. Udah ti alah di Bukit Kedang nya baru Bantin seduai Ngumbang besetuju bebaik enggau Iban menua ili di Lubuk Antu enggau di Kapit dalam taun 1888.

NGINGA TAJAU KE SABAH

Lebih kurang dalam taun 1886, Penghulu Minggat Apai Runai nurun belayar ke Sabah deka ngiga tajau. Sida ke enggau iya nya Sauh, Dampa, Gundi ari Ulu Kerian enggau Manang Nyara, apai Manang Gara ari Nanga Telik, dalam Kerian enggau Nyanggau anak Mail anak menyadi Minggat empu. Datai di Putatan, Sabah, Minggat nyual seigi guchi ti dibeli iya ari Melayu Melawi ngagai Menteri Babu tuai bansa Dusun di Putatan. Bepukuka rega guchi nya Minggat meli enam igi tajau. Sauh meli empat igi tajau. Sida ti bukai mega meli tajau ti ulih tangkup diri. Meda Minggat bulih amat tajau di Sabah, nya ti ngasuh bala nembiak iya ransing agi deka bejalai pegi ke Sabah deka ngiga reta tengkira.

Lebuh maya Garan “Lembang Batu” begawai antu dalam taun 1880, berantu entua iya Linggir “Mali Lebu”. Maya nya Minggat diasuh Garan ngirup ai jalung kena masa Linggir “Mali Lebu”, laban seduai sama bela bujang berani.

BELAYAR KE SUMATERA

Dalam taun 1890, Minggat nurun nguluka nembiak iya belayar ke Sumatera. Iya mai sida ari Awik, Kerian, Melupa enggau Sebelak. Iya mai duit kira-kira seribu ringgit. Kenu ku jaku ke puku bejalai mih nya. Mata duit seribu ringgit maya nya, besai. Kanda enda  RM100,000 diatu?

Sebedau nurun Minggat, madah dulu tunga pejalai iya ngagai Raja Brooke di Sarawak (Kuching). Raja enda tentu ngasuh Minggat pegi jauh agi laban meda iya udah tuai. Taja pia, Minggat madahka diri mesti bejalai pegi laban iya deka ngiga guchi ti mesai buah terung Iban. Ninga munyi nya Raja enda ga nagang iya agi. Minggat disempulang anak lelaki iya ti benama Munan enggau anak menyadi iya Nyanggau anak Mail. Sida belayar ngena kapal ari Sarawak (Kuching) ke Singapura ngena kapal S.S. Normandy dalam taun 1890. Ari Singapura sida pan bekejang ke Sumatera lalu sangkai di Panai. Datai di Panai Minggat pan nyuaka surat ti diberi Raja Sarawak nya ngagai Raja di menua nya. Maya ti mansang ngagai istana Raja di menua nya, Minggat endang ngena  ngepan ti diberi Raja Charles Brooke. Iya mega diiring nembiak iya ngena payung sutera kuning. Nya mih ngayanka iya endang peturun Raja ngagai tuai ti megai  menua nya.

MINGGAT PEDIS PERUT LALU MATI

Udah ti madahka pejalai diri ngagai Raja di menua nya, Minggat enggau bala pan bejalai di sebelah-belah pasar di menua nya sambil bebelika reta tengkira ti dideka ati diri empu. Mayuh amat tajau ti manah-manah dibeli sida, nyengkaum dua tiga igi tajau bangka. Lebuh sida benung bedagang, enda mukai-mukai Minggat pedis perut lalu ngujungka iya mati. Pemati Minggat tu meruan dikeingatka orang ke tuai-tuai dalam leka main Iban. Minggat apai Runai parai di Panai, Seberai tiban Nanga Saan.

Udah Minggat mati di Panai, Munan mai bala iya  bekereja enda lama semak nengeri Jambi tang petunggal iya Nyanggau enggai lama di Sumatera. Iya keran mai sida nikal baru ke Singapura lalu ngerumban kapal ti deka belayar ke Sabah. Munan ngasika jaku Nyanggau. Udah dua tiga hari sida di Singapura, Munan pan mai bala iya pulai ke  Sarawak. Semua sida ti bejalai pegi nya bulih magang reta tengkira. Datai di menua diri Munan pan mai sida semenua ngarapuh apai iya Minggat ti mati di Punai, Sumatera nitihka adat Iban.

Minggat apai Runai seiku ari tuai Iban ti besai ati, sereta jauh peragam runding. Iya ukai semina ngembuan pemerani tang iya mega bisi amai pengelandik ngatur sereta gempung nembiak iya. Iya mega orang ti kering ati deka ngiga reta pengaya ambika bisi ditinggalka iya ba anak uchu, ichit wit iya. Sekeda peturun Minggat diatu agi bisi diau di Kemidan ari ulu Nanga Mitas di Awik, Kerian di menua Saratok.

MUNAN ANAK MINGGAT NYADI ADUN

Endang amai ga mimpi iya. Bala tiris pantis peturun Minggat endang orang ti tampak rita, jelai nama, endang ditemu orang ti bisi pengelurus enggau pengelandik ngatur pengawa. Anak tuai iya Munan keterubah Iban ti diberi pangkat “Penghulu Dalam” di Sibu. Munan mega dipilih perintah Raja Brooke nyadi Kaban Kunsil Nengeri (ADUN) ngarika bansa Iban nyentuk ke iya mati dalam taun 1914. Menyadi Munan ti benama Antau mega dichirika perintah nyadi penghulu di Sebelak. Rantai nyadi penghulu di Pulau Kertau, di menua Sibu.

                (Betampung ba Tusun Ke-12  minggu nyin ila)

Nya mih asal penatai bujang berani Iban nyentuk ke jeman Raja Brooke. Bansa Melayu   Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal  nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146 

Oleh  Harry Usup Umbar