PETARA, BUNSU PETARA, ANTU!

BEPERINDANG MUJI SITAN… Sekeda ari chara mensia nyembah Antu: Sitan..enda ibuh dipejai tang jaga diri empu ari kuasa mistik Antu: Sitan…tu.

Tusun Ke-50  

KUASA MISTIK ANTU: SITAN, JIN, IBLIS    

BEPELASARKA  penemu  litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’  dibagi ngagai  tiga raban iya nya: (1) Kuasa mistik Petara (God, Almighty, Tuhan) (2) Kuasa mistik Bunsu Petara (Dewa, Diety)  (3)  Kuasa mistik Antu (Sitan,  Jin, Iblis). Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih  bekaul tauka datai ba dunya sida tu.

PENGARAP GERIJA SITAN

Sekali tu aku mai pemacha ngenang pasal kuasa misti Antu: Sitan…, ti agi dikemeranka mensia di dunya tu. Engka jarang kitai Iban ninga pasal gerija ti bepelasarka ajar Sitan.
 

Tuju artikel tu iya nya awakka pemacha lebih-lebih agi kitai Iban nemu sereta mereti pasal kuasa mistik Antu tu ukai semina dipegai mensia di menua kitai aja tang di serata dunya. Gerija Sitan tu mih chunto kuasa Antu Sitan endang agi dipegai sekeda mensia di dunya. Nya mih lebuh kitai tedinga tauka tepedaka penyelai agama tauka pengarap genap iku mensia di menua kitai, anang tekenyit, anang irau tauka anang takut enti kitai ngasaika diri bisi agama tauka pengarap ti bepelasarka ajar manah kena kitai idup enggau likun di dunya. Kelimpah ari nya, kitai mega enda tau bejai tauka mantah agama / pengarap orang bukai. Enda ibuh mega kitai bekelikuh pasal agama / pengarap ti dipegai sekeda mensia; nya bepanggai antara mensia nya empu enggau Petara (God Almighty).

SITAN ‘LAVEYAN SATANISM’

Gerija Sitan (The Church of Satan) endang sebengkah ari gerempung antarabansa ti bepelasarka agama Antu:Sitan “LaVeyan Satanism” ti disebut dalam The Satanic Bible. Gerija Antu: Sitan nya ditumbuhka Anton Szandor LaVey ba Black House di nengeri    San Francisco, California kena 30 April 1966. Iya mih Kepala Paderi ‘High Priest’ gerija nya nyentuk ke iya mati taun 1997. Taun 2001, Peter H. Gilmore nganti tempat iya  lalu mindahka opis besai gerija nya ngagai Hell’s Kitchen, Manhattan, New York City. Sekeda ari kaban gerija tu ti tebilang iya nya  Anton LaVey ,  Blanche Barton,  Peter H. Gilmore enggau Peggy Nadramia.

Kenu ku Gilmore, gerija nya ukai ga nyembah Antu Sitan (devil) tang kenu ku iya, bala kaban gerija nya digelar iya ngena nama ‘skeptical atheists’ ti mai reti mensia ti enda arapka bisi Petara (God Almighty) tauka Bunsu Petara (Diety). Sida pechaya Antu: Sitan lambang ati temegah ‘pride’, ngatika diri ‘individualism’ sereta pemandang ‘enlightenment’ ti ngelaban ajar Nabi Abraham dalam Bup Kudus. Ku pengarap gerija tu, ajar  Albraham tekelalu nagang peneka asal ati mensia.

Kaban gerija sida tu bisi dua iti tikas: kaban ti diregister enggau ti enda diregister tang semina aktif aja. Sida ti diregister patut selalu datai maya bisi pengawa besai ti bekaul enggau gerija nya lalu bisi meri duit kena nyukung gerempung sida nya. Sida ti semina aktif bejalaika aktivti gerija aja. Gerija nya bisi nyediaka servis jadi melaki bini, nganjung bangkai ke pendam enggau basu pala ke sida ti baru masuk pengarap nya. (Referen  The Church of Satan: A History of the World’s Most Notorious Religion)

TUHAN AJA ULIH NGALAHKA KUASA MISTIK

Nya mih, enda aku mai pemacha ngerintaika lebih lenak agi pasal pengarap tauka ajar gerija nya, enggaika kumbai orang deka ngerembaika ajar gerija tu. Sekeda gerija tauka mensia dunya nagang nembiak sida macha tauka nemu pasal ajar agama bukai laban takutka nembiak sida nya kena rampit idea tauka pikir ajar nya. Engka semina mensia ti alah kena akal Antu: Sitan, Jin…ulih kena rampit idea jai nya. Mensia tu ngembuan tikas pikir ti tinggi ‘great mind, minda tetap teguh lalu enda alah akal sebarang idea Antu ti jai. Taja pia, anang mega kitai ngelaban ‘mencabar’ kuasa mistik Antu: Sitan nya ngena chara diri empu laban semina kuasa mistik Petara (God Almighty – Tuhan) aja ulih ngelaban kuasa mistik bukai di dunya tu. Ngena simpul penemu ti pandak; anang sumbung tauka changka jaku maya ti bebalut enggau Antu: Sitan, Jin, Iblis… Anang mega mudah kena akal  lalu  tepejuh bebalut enggau kuasa mistik Antu:Sitan… tu.

Nya mih, sebengkah ari pengarap mensia di dunya tu. Nitihka peturun aki ini bansa Dayak, Iban ari Bunsu Petara, Iban tauka Dayak endang ari kelia pukas ari agama tauka pengarap ti bepelasarka Antu: Sitan ti baka nya. Taja pia, endang bisi ga sekeda  bansa Dayak, bansa Iban di sekeda  menua ngembuan penemu ‘black magic’ ti sama enggau penemu Gerija Sitan nya tang semua nya dipelajarka sida ari bansa sereta menua bukai. Ambika chunto, penemu Beliau dipelajarka sida ari penemu Dukun tauka Bomoh enggau ti bukai. Nya alai, pesan ari penulis iya nya: bejimat-jimat mih lebuh milih agama tauka pengarap ti tau nyadi lalau sereta teladan jalai pengidup diri empu ti manah.

Nya alai, enti pemacha  bisi utai deka ditanya tauka deka bebagi penemu pasal tiga kuasa mistik nya, tau SMS  HP: 01114019115 / 0138475146.  Pia mega pemacha tau ngirumka cherita sereta gambar pasal kuasa ‘alam ghaib’ nya ngagai Inbox FB aku.