Bekunsi pelian taja nadai agi bemanang

MANANG benung belabuh ngatur pelian iya diperati bala mayuh.

AMAT meh kelia kitai bansa Iban endang bisi mayuh chara tauka jalai berubat, tang belian tauka bemanang meh ti udah ditemu chukup sidi kena ngeraika tudah ti sakit.

Enti sida bisi tabin birin enda nyamai, sakit lengit enggai makai sida terubah iya nganjung diri minta tubar tauka puchau manang, tauka orang bukai ke nemu muchau.

Manang tauka dukun mungkal atur ngubat ngena jalai begama dulu, kena iya ngelala pemedis orang nya. Udah iya ngelala penyakit, baru iya muchau pemedis nya. Enti penyakit nya patut diburah, iya lalu murah.

Enti penyakit nya bedau gerai dibela dukun tauka manang ngena jalai burah tauka puchau, nya baru ngatur pelian.

    Ngelansa chara bemanang

“Tang enti manang udah belian, lalu apin ga gerai, dia sida sebilik ti ngintu orang sakit nya lalu berunding deka ngambi lemambang besugi tauka berenung. Enti orang ke sakit nya enda gerai udah diperenung tauka dipesugika lemambang, dia sida serumah nya nyangka lalu baum deka begawai sakit ke alai lemambang mengapka orang sakit nya,” ku Majit Chundi, 68, iya nya anak niang Manang Chundi ari Tanjung Sikup, Malupa.

Majit anak iru Manang Chundi lalu bisi belajar sekeda pelian ari apai iya sampaika iya nemu belian, tang nadai ngemeranka pengawa nya, laban nadai kala bebangun. Ninga iya madah bisi nemu mimit sekeda pelian dia deh penulis bisi dibagi iya mimit genteran pelian munyi tu:

“Ni nuan Seriginda ke ngaga tanah enggau menua, ni nuan Seragindai ke ngaga pantai radai Raja Baya, ni nuan Seragindung ke ngaga kampung lulung kerapa.

“Ni nuan Seragindam ke ngaga malam petang kelita, ni nuan Seragindai ke ngaga ke ngaga hari rau rangkai keranjai ruai bansa.

“Ni nuan Seragindit ke ngaga langit enggau dunya, ni nuan Seragindan ke ngaga bulan tanggar peranama, ni nuan Seragindang ke ngaga bintang tumbuh segala, ni nuan Selampandai ke ngaga kerigai anak mensia.

“Raja Petara bela ngemata, Seragindah bela madah, ngemeranka subak tanah lang. Seragindi bela meda ngemeranka ai mesai puluh gerunung sanggang. Seleledu bela meda ngemeranka jumpu mesai jugu jambul bejampung.

“Seleledang bela meda ngemeranka tinting lurus pematang. Selingiling bela meda ngemeranka pating sega enseluang. Segunggung bela meda ngemeranka bungkung mesai benung tajau bujang.

“Bunsu Rembia bela meda ngemeranka lempa maram jarang. Bemata Raja Petara bela ngelala sampai nilik ari remang rerat bela sampai ngijap baka kempat kajang sabidang. Ari pandau banyak bela nampai Petara Guyak baka pantak tabung palang. Ari sintau kemarau sanggau bela ngilau Petara Radau baka likau nabau sawa bekengkang.

“Ari dinding hari bela meda nampai meremi Petara Menani Manang Matai, baka kaki lung tetukang. Ari bulan bela nampai Petara Tebaran, betempan kaki subang. Ari matahari bela meremi Petara Kami Manah Mati baka Segundi Manang Begitang. Ari jerit tisi langit bela nampai Petara Megit baka kepit tanggi tudung temelang. Ari pandau dunya Petara Megu bela nampai meki langgu katunsung lelayang.”

         CHARA BERUBAT BUKAI

Udah nya penulis nanya nama jalai berubat bukai enti pelian enda ngasi. Kebuah nanya laban penulis nemu unggal tu sigi nemu mengap enggau timang jalung mimit tambah mega nemu pasal sekeda tusun main enggau adat asal kitai Iban. Penulis pan lalu nanya ngagai iya pasal ripih atur pengawa enggau pengap Gawai Sakit.

“Menya lebuh begawai sakit pan orang bisi beambi ngabang kulu kili ba kelingi genturung menua sida dia.  Tu siti utai ti manah ba adat asal kitai bansa laban enti sepintu diri serumah nya bisi pengawa manah tauka enda manah baka mati, tauka penusah bukai, orang serumah nya sigi sama enggau kiruh sereta sama ngintu,” ku Majit nampung pemadah iya.

Apin lemambang datai ba rumah nya, bala sida serumah nya deka mansutka manuk kena ngerah orang beranchau tikai. Enti bala lemambang udah nuntung datai ba tengah laman, orang empu rumah nya lalu nganchau tikai ba tanah alai sida lemambang duduk ke lalu ditunga bala sida serumah nya.

Sida pan lalu nanya bala lemambang nyangka bisi burung. Enti bisi burung, sida lalu ngatur ai burung. Jalai ngirup ai burung nya baka ke ngirup ai burung ba jalai gawai bukai, iya nya setengah irup lemambang lalu setengah irup orang empu gawai.

Orang empu rumah lalu angkat ari endur nanya lemambang tadi. Bala lemambang pan angkat lalu nyebut leka pengap ke manah muji rumah orang nya.

Nyadi lebuh ke niki rumah bala lemambang pan lalu nyebut leka pengap ngerara pemanah tanggam tangga sida serumah nya. Datai ba pala tangga sida pan lalu mansa dinding, sida pan ngerara pemanah chat dinding orang nya. Enti bisi dirias orang enggau ukir, sida pan lalu muji pemanah likau enggau chura ukir orang nya.

Udah nya sida lalu tama ke dalam agi ngagai rumah orang nya lalu nyebut leka pengap muji pintu ke belagu anak orang. Sida pan lalu begelih enggau ripih tiang medang lamba lulai, ba batang iya ditanchang ka gelanggang manuk tawai, ukai enda ba puchuk iya, teleba alai endu Teruna Dara Pandai ngeredai punggai tali tengkebang.  

Nyadi lebuh bala lemambang deka nuduk ka diri ba ruai ti mela orang sakit nya, sida pan lalu muji pemanah anyam tikai ba ruai orang nya.

Abis pejalai niti rumah orang lalu bedijir lalu disibur enggau ai tuak. Tembu nyibur ai, manuk dibiau baru kena ngerah  niri ka tiang pandung ba tiap belah ruai. Udah pandung didiri nya baru miau manuk kena ngerandang jalai. Tembu nya lemambang lalu berengkah nyampi iya nya Sampi Gawai Sakit, tang sebedau nyampi sida dulu deka ngambi orang ke sakit nya pansut ari bilik lalu diengkah ba meligai di ruai sida empu.

     SAMPI LEMAMBANG

Lemambang ke nyampi nya lalu ngangau ka bala semengat tuai tuai menua ke udah lesi laban minta sukung, minta tulung sida nya ngeraika tudah ti sakit nya.

Nyadi sampi tu panjai, lebih agi enti lemambang nya lalu nyebut rintai siku-siku tuai sida menua nya. Enti dalam Batang Krian, iya deka nyebut bala tuai Krian baka Gun Mangku Bumi, baka Antau Linggang Nengeri.

Baka sida di Paku tauka di Padeh enggau pati Saribas bukai, nyangka deka ngena leka sampi munyi ngangauka

Uyut nama Bedilang, Atin Apai Saang, Sabuk Apai Maang,

enggau Dana Rekaya Bayang.

Tang batang kangau ti sebaka nya endang ngangau sida Keling enggau bala iya ari Panggau Libau Ke Lendat Dibiau Takang Isang, Merawa Lama Munyi Ke Berimba Buong Nebang, Tuchung Engkeranji Padi Baka Api Ke Nyadi Mau Ngerendang.

Nya alai kangau sampi ba senentang tu nya nyau deka sebaka, enda ngira dini menua alai orang ke begawai nya. Kebuah pia, laban orang ke dikangau nya sigi aki ini peturun kunsi bansa Iban.

Udah tembu lemambang nyampi, pengawa gawai nya lalu dipenggal orang enggau sibur ai tuak tauka utai irup enggau pemakai bukai.

Tembu nya baru lemambang belabuh mengap. Sida bedau angkat tang nyebut leka pengap nya agi mengkang duduk.

Nyadi udah nya nitih ka ripih pengap nya bala lemambang lalu Ngerara rumah orang ke deka begawai dientudika Ngading Iyang Lemambang ke alai lemambang ngerintai bala iyang sida sereta lalu ngichaka bala iyang nya datai mantu sereta nulung mai peminta ngena pengap sida awakka pengap nya sidi lalu ulih ngeraika orang ti sakit nya.

Nyadi sekali agi ga bala lemambang mengap ngerintai  benyawa tauka ngena kangau pengap. Entudi nya sida lalu nurunka Petara Manang ari langit.

Nyadi genteran leka main ti manah nya lebuh sida ngelulu deka Ngiga orang d’injau ngambi Menjaya Manang Raja datai ngabang.

Lemambang udah nya lalu nyebut leka pengap pasal orang ke d’injau ngambi ngabang, iya nya Kusing seduai Entawai ke nyikap diri deka nurun ngambi ngabang.

Apin nurun, ambai seduai dulu ngangau deka mekal seduai enggau pengaruh kena beruntu bejalai jauh. Seduai pan lalu nurun ari rumah, ku kelulu lemambang.  

Seduai lalu mansa menua Manang Ridun, udah nya menua Manang Sampuk, Manang Ruai, Menggung, menua Aki Ungkuk. Angkat ari nya seduai datai ba Kebung Langit, udah nya baru datai ba menua Menjaya Manang Raja ke alai seduai niki madah pejalai.

Udah Menjaya nutung pengaruh nya baru manang bukai nguang lalu sama nurun ngabang ari rumah iya.

Lebuh nurun ari langit bala Menjaya terengkah ba kayu perugan gasing. Udah nya terengkah di tanah. Mayuh menua kena pansa sida  datai ka sida terengkah ba pendai orang ke begawai nya. Sida lalu mandi ba pendai nya, ku kelulu bala lemambang.

Nyadi udah bekau mayuh kelulu pengawa bukai, bala lemambang lalu penudi iya nyebut leka pengap ngenang bala Menjaya Manang Raja ke ngambuh tubuh orang sakit nya di tanju.

Udah tembu ngambuh, nya baru lemambang mengap baru mulai ka semengat antu enggau semengat sida iya empu.

Tembu meh pengawa mengap ke lalu jadi pengujung Gawai Sakit. Tang gerai meh kitai ku Selempandai, gayu meh kitai ku antu, panjai nguan menua meh iya ti sakit nya, ku petara.

Nyadi ngagai pemacha pia mega, kitai endang semampai besampi minta penyelap, minta pengembap, minta pengerai, minta penyamai senang lantang belama.

Oleh TELESA EMPERAN