Bujang Berani Iban Dua

Tusun Ke-12

MUNAN ‘PENGHULU DALAM’

, bujang berani Iban ti tebilang ukai laban iya ti ngelaban perintah tang suah agi tegal iya nanahka perintah Sarawak (Raja Brooke) ngaluska pengelikun menua. Munan kurang pegari  ba mua mata bansa Iban laban iya udu mantu perintah Raja Brooke ngelaban tuai kayau Iban ti bukai. Ulah enggau pengawa iya enda  sebaka enggau Bantin tauka Ngumbang tauka jauh amat baruh enti dibandingka enggau Libau-Rentap.

Munan asal iya ari Paku. Udah nya iya pindah ke Awik sebedau matak bala Iban ke menua Batang Rajang ili (Sibu). Nya mih kebuah iya tau mega dikumbai Iban Batang Rajang laban iya bulih penampak sepengudah iya pindah ke Sibu.

Munan tu anak Penghulu Minggat seduai Jara ari Awik, Kerian, Saratok (Uji bacha cherita Minggat sebedau tu). Munan ada di Paku, sebedau sida sebilik pindah ke Awik, lebih kurang dalam taun 1854. Dalam taun 1890, iya nyempulang apai iya Penghulu Minggat bejalai pegi ke Sumatera ti endur apai iya parai di Panai.

 Munan bebini ngambi Subang ke diau di Entabai, Julau. Subang tu anak iru Tambong seduai Layang, uchu Libau “Rentap” tuai Iban Skrang ke ngetanka Bukit Sadok 1853 ngagai1861. Entua Munan nya Layang, menantu Rentap ke bedengah Tuan Allan Lee di Lintang Batang, semak nanga Skrang dalam taun 1850 maya Raja James Brooke nyerang Libau-Rentap ba Nanga Skrang.

MUNAN MANTU PERINTAH RAJA BROOKE

Dalam pengidup iya, Munan bisi tujuh kali matak kayau. Semua kayau tu endang diasuh Perintah Raja Brooke. Tang tiga kali kayau iya ke mujur amat keterubah iya nya ngalahka rumah Penghulu Jimbau di Engkari, ngalahka Bantin seduai Ngumbang di Ulu Batang Ai, enggau ketiga ngalahka Kayan di Ulu Batang Rajang.

Lebuh iya baru angkat bujang, Munan bisi mimpi. Iya bemimpi asai ke bejalai nengah tingkah tebing tinggi ke bebatu. Lama-lama udah nya, Munan pan tepedaka semambu marau, puchuk semambu marau nya nadai temu puchuk di langit din.

 “Tarit semambu nya ….Sebedau nuan, nadai siku orang udah tetaritka semambu nya,” pia ku munyi jaku didinga Munan.

 “Enti pia, enda ga aku berani nguji narit semambu nya,” pia ku Munan nyaut.

“Tarit mih. Lapa nuan baka ke ukai anak lelaki. Buyan nuan tu…!” pia ku jaku orang nya meransang Munan. Ninga munyi nya, Munan pan narit semambu nya enggau naka tulang iya. Dinga tak bemunyi guntur di langit din naka iya penginggar.

“Nya iya, Munan. Ninga nuan munyi guntur nya? Baka nya mih Munan, jemah ila. Enti orang ninga nama nuan, sida takut, baka orang ke takutka Guntur,” ku munyi nyawa orang nya.

Munan pan lalu tedani lalu berunding dalam ati diri. Nama reti mimpi aku tu? Munan nanya diri empu dalam ati.

 Lebuh Munan enggau bala iya datai di Awik ari Sumatera dalam taun 1890, Ampan endang udah dichiri perintah nyadi penghulu nganti Penghulu Minggat. Ampan tu keras bendar deka berimba pulau kampung galau sida Minggat di menua Awik kenyau ari sida ti pindah kia ari Paku menya. Munan enggau bala menyadi iya sereta bala nembiak apai iya Minggat nagang Ampan berimba kampung galau nya, enggaika nadai alai ngiga rutan, ngiga danan, ngiga kayu ke perau ke guna anak telesak, uchu ambu ke dudi hari ila. Tang Ampan enda ulih tagang iya. Meda iya enda alah tagang, Munan lalu nemuai ngagai Penghulu Garan di Paku enggau Nanang di Padeh deka nanyaka pasal adat tuai ke ngalau pulau.

MUNAN DIPETENAH NGELABAN PERINTAH

Lebuh Munan nemuai ke Paku enggau Padeh, Penghulu Ampan betemu enggau Residen Bailey ari Simanggang ti bisi di Kabong maya nya. Ampan madahka Residen Bailey, tuju Munan ti nemuai ke Paku enggau Padeh laban deka minta bantu Nanang seduai Garan ngelaban perintah. Ninga munyi nya, Residen Bailey pedis amat ati. Tegal petenah nya Residen Bailey pan ngangauka Munan betemu enggau iya di kubu Kabong laban iya deka nentuka sekali ke utai ti ditusi Ampan ngagai iya nya amat tauka bula. Munan undur ke Kabong ngena perau panjai dikemudika Jungan Apai Chaong ari Sebelak. Meda perau Munan datai dia Tuan Bailey pan deka nimbak iya ngena dua puchuk pistol ba jari kanan enggau jari kiba iya. Meda pengachau nyau deka nyadi dia Pengiran Matali, kunsil ari Simanggang ke nyempulang penatai Tuan Bailey ke Kabong  madah, nadai kebuah belaya. Enti belaya ku iya, Tuan Residen seduai Munan sama mati.

“Manah agi aku mai Munan ke Sarawak (Kuching), nanyaka penemu Raja Brooke, baka ni ngaduka penyarut antara Munan enggau Tuan Bailey,” ku Pengiran Matali.

MUNAN DIJIL CHARLES BROOKE

Datai di Sarawak (Kuching), Munan pan ditan dalam rumah jil enggau nadai pechara. Kebuah pia, laban sebedau nya Tuan Bailey endang udah ngirum surat ngagai Raja Brooke pasal ripot Ampan nya.  

Maya ti ditan dalam jil, malam nya Munan bemimpi asaika betemu enggau Ranee Margeret, bini Raja Charles Brooke.

“Anang irau nuan, Munan. Raja Charles Brooke enda ngukum nuan. Pagila iya deka ngelepaska nuan,” ku Ranee Margeret.

Amat ga pagi nya engka Petara endang agi nyangkung, laban Munan amat nadai penyalah. Urung pukul sembilan pagi Munan pan dilepaska Raja.

Sebedau Munan ninggalka rumah jil nya, Raja Charles Brooke nangkan Munan enggau jaku.

“Nuan nadai kuasa agi di menua Saribas laban nuan  lama udah bebini nguaika Subang lalu nampung bilik penaik Rentap di Entabai, Julau,” ku Charles Brooke.

DICHIRI NYADI PENGHULU DALAM

Di Julau Munan dichiri nyadi Penghulu Dalam taun 1890. Iya mega dichiri Raja Charles Brooke nyadi tuai kayau ngalahka Kayan enggau Kenyah Badang di Ulu Belaga enggau Ulu Balui.

Kejang deka nurun ngayau, Munan bisi mimpi. Iya bemimpi asaika bumai maya nebang. Semua kayu udah ditengkalung sida magang, kelampai sekayu aja agi tinggal apin ditengkalung. Udah nya, datai lelaki seiku lalu bejaku                

“Tebang mih kelampai sekayu tu, Munan awakka semua kayu ke udah ditengkalung kita rebah magang ba umai tu,”  ku lelaki dalam mimpi iya.

Munan pan nebang kelampai ke besai sekayu nya. Peda tak sekejap aja kayu ba dandang umai nya rebah magang.

“Nya mih tanda, nuan deka menang ngelaban munsuh,” pia ku munyi jaku orang nya didinga Munan.

Maya ngayau begulai bala Iban ari Saribas, sida bulih amai dengah enggau tangkap (ulun). Ba taun 1895, Munan sekali agi nguluka bala Iban ngalahka bala Kayan enggau Kenyah di ulu Batang Rajang tegal sida ti munuh seiku Melayu, seiku orang China enggau bala Iban Saribas.

Maya iya agi di Julau, menua Ulu Batang Ai agi udu bendar kachau bebunuh ngelaban diri sama diri tauka ngelaban Raja ke diuluka Penghulu Ngumbang “Berauh Langit”, Bantin “Ijau Lelayang”, Penghulu Allam, Penghulu Imba enggau Penghulu Ngelingkung dalam taun 1898. Kena mutarka pengachau nya Raja Charles Brooke ngasuh Munan ngayau bedarat ngalahka menua ulu Batang Ai. Iya matak bala ngulu Sungai Katibas lalu melunggang ngili Lubang Baya ke alai bala iya lalu ngili Batang Ai datai ke Nanga Kaong. Maya nya munsuh nadai ngadang bala Munan  nuntung datai ari ulu Katibas, nya alai bala Munan bulih dengah lapan belas igi enggau tangkap (ulun).

Tekenyit amat Tuan Bailey di Simanggang kena pansa sida Munan ke pulai ngayau. Sida enda ngetu ba kubu di Simanggang lalu merau meraka tasik pulai ke Sibu. Berita pemujur kayau Munan tu ngasuh Tuan Bailey pedis agi ati ngagai Munan.

                (Betampung ba Tusun Ke-13  minggu nyin ila)

Nya mih asal penatai bujang berani Iban nyentuk ke jeman Raja Brooke. Bansa Melayu   Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal  nanjar bansa Iban maya sida bepindah ngiga menua baru endur bumai betaun.  Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146  

Oleh Harry Usup Umbar